မဒါဂတ်စကာသမ္မတ နိုင်ငံမှ ထွက်ပြေးတိမ်းရှောင်

မဒါဂတ်စကာနိုင်ငံ သမ္မတ အန်ဒရီ ရာဂျိုလီနာ သည် ပြီးခဲ့သည့်လနှောင်းပိုင်းက စတင်ခဲ့သည့် တစ်နိုင်ငံလုံးအနှံ့ ဆန္ဒပြမှုများဖြစ်ပွား‌နေသည့်ကြားကပင် မဒါဂတ်စကာနိုင်ငံမှ ထွက်ပြေးတိမ်းရှောင်သွားသည်။

ရာဂျိုလီနာသည် တနင်္ဂနွေနေ့က နိုင်ငံပြင်ပသို့ လေယာဉ်ဖြင့် ထွက်ခွာသွားသည်ဟူသော သတင်းများနှင့် ကောလာဟလများ ထွက်ပေါ်ပြီးနောက် ဘေးကင်းရာနေရာသို့ ရောက်ရှိ‌နေပြီဖြစ်ကြောင်း တနင်္လာနေ့တွင် ဖေ့စ်ဘွတ်ခ်မှတစ်ဆင့် သူက တိုက်ရိုက်ထုတ်လွှင့် ပြောကြား အတည်ပြုခဲ့သည်။ အသက် ၅၁ နှစ်အရွယ်ရှိ သမ္မတသည် သူ၏တည်နေရာကိုမူ ထုတ်ဖော်ပြောကြားခြင်း မရှိပါ။

ရာဂျိုလီနာသည် တနင်္လာနေ့ မွန်းလွဲပိုင်းတွင် ရုပ်မြင်သံကြားမိန့်ခွန်း ပြောကြားရန် စီစဉ်ထားသော်လည်း “လက်နက်ကိုင်အဖွဲ့တစ်ဖွဲ့က နိုင်ငံပိုင်မီဒီယာကို ထိန်းချုပ်ရန် ခြိမ်းခြောက်ခဲ့သောကြောင့်” အဆိုပါ မိန့်ခွန်းပြောကြားမှုကို ရွှေ့ဆိုင်းခဲ့ကြောင်း ရာဂျိုလီနာ၏ရုံးက ဖေ့စ်ဘွတ်ခ်တွင် ကြေညာခဲ့သည်။

ကုလသမဂ္ဂ၏ ပြောကြားချက်အရ ဆန္ဒပြသူများနှင့် လုံခြုံရေးတပ်ဖွဲ့များအကြား ပဋိပက္ခများတွင် အနည်းဆုံး လူ ၂၂ ဦး သေဆုံးခဲ့သည့် အခြေအနေများအပေါ် ပြင်သစ်သမ္မတ အီမန်နျူရယ် မက်ခရွန်က စိုးရိမ်ကြောင်း တနင်္လာနေ့က ထုတ်ဖော်ပြောကြားခဲ့သည်။ အီဂျစ်နိုင်ငံ ထိပ်သီးအစည်းအဝေးတစ်ခုမှ ထိုသို့ ပြောကြားခဲ့သည့် မက်ခရွန်က ရာဂျိုလီနာကို ပြင်သစ်သို့ ကယ်ထုတ်ပေးခဲ့ခြင်း ရှိ၊ မရှိကိုမူ မှတ်ချက်ပေးရန် ငြင်းဆိုခဲ့သည်။ “ကျွန်တော် ဘာမှ အတည်မပြုပါဘူး” ဟု ၎င်းက ပြောသည်။ “ကျွန်တော်တို့ရဲ့ ကြီးမားတဲ့ စိုးရိမ်ပူပန်မှုကိုသာ ဖော်ပြလိုပါတယ်” ဟုလည်း သူက ဆိုသည်။ မဒါဂတ်စကာနိုင်ငံသည် ယခင်က ပြင်သစ်၏ ကိုလိုနီ နိုင်ငံတစ်ခုဖြစ်သည်။

စစ်ဘက်သတင်းရင်းမြစ် တစ်ခုကမူ ရာဂျိုလီနာသည် ရဟတ်ယာဉ်ဖြင့် စိန့်မာရီလေဆိပ်သို့ ရောက်ရှိခဲ့ပြီးနောက် တနင်္ဂနွေနေ့က ပြင်သစ်စစ်တပ်၏ Casa လေယာဉ်ဖြင့် မဒါဂတ်စကာမှ ထွက်ခွာသွားခဲ့ကြောင်း ရိုက်တာသတင်းအေဂျင်စီကို ပြောကြားခဲ့သည်။