အားကစားကဏ္ဍ မြှင့်တင်ခြင်းသည် လူငယ်များ၏ ကာယဗလ ဖွံ့ဖြိုးရုံသာမက စည်းလုံးညီညွတ်မှု၊ စိတ်ဓာတ်ကြံ့ခိုင်မှုနှင့် အသင်းအဖွဲ့လိုက် ပူးပေါင်းဆောင်ရွက်တတ်သည့် အလေ့အကျင့်ကောင်းများကို ပျိုးထောင်ပေးခြင်းလည်း ဖြစ်သည်။ ထို့ကြောင့် မျိုးဆက်သစ် လူငယ်များအကြား ဘောလုံးအားကစား အခြေခံကျွမ်းကျင်မှုများ ထွန်းကားလာစေရန် ရည်ရွယ်၍ ရန်ကုန်တိုင်းဒေသကြီးအတွင်းရှိ မြို့နယ် (၂၀) တွင် ဘောလုံးသင်တန်းများကို Pilot Project အစီအစဉ်ဖြင့် စတင်တော့မည်ဖြစ်သည်။ အဆိုပါ သင်တန်းများကို ယခုလ မေလ (၄) ရက်မှ စတင်ကာ ဖွင့်လှစ်သွားမည်ဖြစ်ကြောင်း အားကစားနှင့် လူငယ်ရေးရာဝန်ကြီးဌာနထံမှ သိရသည်။
စီမံခန့်ခွဲမှုနှင့် သင်ကြားမည့်မြို့နယ်များ
သင်တန်းများအား အားကစားနှင့် လူငယ်ရေးရာဝန်ကြီးဌာန၏ လမ်းညွှန်မှု၊ ရန်ကုန်တိုင်းဒေသကြီး အစိုးရအဖွဲ့၏ အနီးကပ်ကြီးကြပ်မှုတို့ဖြင့် စနစ်တကျ သင်ကြားပို့ချပေးသွားမည်ဖြစ်သည်။ သင်တန်းဖွင့်လှစ်မည့် မြို့နယ် (၂၀) မှာ အောက်ပါအတိုင်းဖြစ်သည် ။
အရှေ့ပိုင်းနှင့် တောင်ပိုင်းခရိုင်
တောင်ဥက္ကလာပ၊ မြောက်ဥက္ကလာပ၊ ဒဂုံမြို့သစ် (အရှေ့ပိုင်း၊ တောင်ပိုင်း၊ မြောက်ပိုင်း) ၊ သာကေတ၊ သန်လျင်၊ ကျောက်တန်း။
အနောက်ပိုင်းနှင့် မြောက်ပိုင်းခရိုင်
လမ်းမတော်၊ အလုံ၊ စမ်းချောင်း၊ အင်းစိန်၊ မင်္ဂလာဒုံ၊ လှိုင်သာယာ (အရှေ့ပိုင်း၊ အနောက်ပိုင်း) ၊ ရွှေပြည်သာ။
နယ်မြေဒေသများ
တွံတေး၊ တိုက်ကြီး၊ ကွမ်းခြံကုန်း၊ လှည်းကူး။
ယခုကဲ့သို့ Pilot Project အနေဖြင့် စတင်ခြင်းသည် အခြေခံအဆင့်မှစတင်ကာ စနစ်တကျ လေ့ကျင့်ပျိုးထောင်ပေးခြင်းဖြင့် နောင်တွင် နိုင်ငံဂုဏ်ဆောင်နိုင်မည့် ထူးချွန်ထက်မြက်သော အားကစားသမားကောင်းများ ပေါ်ထွက်လာစေရန် ဦးတည်ဆောင်ရွက်ခြင်းဖြစ်ကြောင်း သိရသည်။