ယနေ့ ဖေဖော်ဝါရီ (၁၄)ရက် နံနက် (၆)နာရီခန့်မှ စတင်၍ ရန်ကုန်မြို့၌ မြူများ ထူထပ်စွာ ကျင်းဆင်းလျက်ရှိကြောင်းနှင့် မြို့တွင်း ရုံးသွားလာသူများလည်း သတိထားသွာလာကြရကြောင်း ရန်ကုန် မြို့ခံများထံမှ သိရသည်။
မိုးလေဝသနှင့်ဇလဗေဒညွှန်ကြားမှုဦးစီးဌာနမှ ၂၀၂၅ ခုနှစ်၊ ဖေဖော်ဝါရီ(ဒုတိယ)ဆယ်ရက်ပတ်အတွင်း ရန်ကုန်တိုင်းဒေသကြီး၊ စစ်ကိုင်းတိုင်းဒေသကြီး အထက်ပိုင်း၊ ဧရာဝတီတိုင်းဒေသကြီး၊ တနင်္သာရီတိုင်းဒေသကြီး၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် (၇) ရက်မှ (၉) ရက်ခန့် မြုထူများဆိုင်းနိုင်ကြောင်း ထုတ်ပြန်ထားပြီး ယနေ့တွင် ရန်ကုန်မြို့တွင်း မြူများထူထပ်စွာ ကျဆင်းလျက်ရှိကြောင်း သိရသည်။
ထို့အတူ နေပြည်တော်၊ မန္တလေးတိုင်းဒေသကြီး၊ ပဲခူးတိုင်းဒေသကြီး(အရှေ့ပိုင်း)၊ စစ်ကိုင်းတိုင်းဒေသကြီးအောက်ပိုင်း၊ ကယားပြည်နယ်နှင့် ချင်းပြည်နယ်တို့တွင် (၃) ရက်မှ (၆) ရက်ခန့်နှင့် ပဲခူးတိုင်းဒေသကြီး(အနောက်ပိုင်း)နှင့် မကွေးတိုင်းဒေသကြီးတို့တွင် (၁) ရက်မှ (၂) ရက်ခန့် နံနက်ပိုင်းတို့တွင် မြုထူများဆိုင်းနိုင်ကြောင်း မိုး/ဇလမှ ထုတ်ပြန်ထားသည်။
“ဒီမနက် ၆ နာရီလောက် အိပ်ယာနိုးတော့ တော်တော်လေး အံ့သြသွားတယ်။ မြူတွေကျနေတာမှ အများကြီး အိမ်အောက်ကို လှမ်းကြည့်တာ မြူတွေထူထပ်နေတော့ မမြင်ရဘူး။ ပြီးခဲ့တဲ့ ရက်တွေက မြူကျတယ်ဆိုပေမယ့် ခုလောက်ထိ မဟုတ်ဘူး။ သာမန်ပဲပေါ့နော်။ ဒီနေ့တော့ အေးလည်း အေးတယ်။ ရုံးသွားဖို့ ကားကိုလည်း သတိထားမောင်းရမှာပေါ့။ လေကြောင်းလိုင်းတွေလည်း မြူတွေကြောင့် ခရီးစဉ်စောင့်ဆိုင်းရတာရှိတယ်လို့လည်း ပြောနေကြတာ ကြားတယ်။”ဟု ရန်ကုန်မြို့ခံ တစ်ဦးက ပြောသည်။
အဆိုပါ အခြေအနေများကြောင့် လေကြောင်းပျံသန်းသွားလာသည့် ခရီးစဉ်များအပြင်၊ သင်္ဘောများနှင့် အမြန်လမ်းပေါ် သွားလာသည့် ခရီးသွားယာဉ်များလည်း နံနက်စောစောအချိန်များတွင် သတိထားရမည့် ရာသီဥတုအခြေအနေများ ဖြစ်နေကြောင်းလည်း ပြင်ပမိုးလေဝသပညာရှင် ဦးဝင်းနိုင်က ၎င်း၏ လူမှုကွန်ရက်စာမျက်နှာတွင် အသိပေး/ သတိပေး ရေးသားထားသည်။