ရန်ကုန်တိုင်းဒေသကြီး၊ မြို့နယ်အချို့တွင် ဇန်နဝါရီလ ၉ ရက် (ယနေ့)၌ မြေပြင်လူဦးရေစာရင်း ကွင်းဆင်းကောက်ယူခြင်းလုပ်ငန်းစဉ်များစတင်ပြုလုပ်နေပြီဖြစ်ကြောင်း သိရသည်။
” ဒီနေ့ မနက်ပိုင်းမှာ အုပ်ချုပ်ရေးမှူးအဖွဲ့တွေ လဝကအဖွဲ့တွေနဲ့ အခြားလူကြီးတွေပါတဲ့အဖွဲ့က လူဦးရေ စာရင်းကောက်နေတာတွေ့တယ်။ တစ်အိမ်ဝင်တစ်အိမ်ထွက်ပေါ့။ ဘာကိစ္စဖြစ်ဖြစ် ပြည်သူကတော့ လုပ်ပေးနိုင်တာလုပ်ပေးရမှာပေါ့။”ဟု မြောက်ဥက္ကလာပမြို့နယ်အတွင်းနေထိုင်သူ ပြည်သူတစ်ဦးကဆိုသည်။
ယနေ့ နံနက်ပိုင်းတွင် မြောက်ဥက္ကလာပမြို့နယ်အတွင်းရှိ ရပ်ကွက်အချို့တွင်မြေပြင်လူဦးရေစာရင်းကောက်ယူမှုကို စတင်ပြုလုပ်လျက်ရှိနေသည်ဟု ယင်းမြို့နယ်အတွင်း သတင်းကွန်ရက်တစ်ခုက ဖော်ပြထားသည်။
ယမန်နေ့ ဇန်နဝါရီလ ၈ ရက်နံနက်ပိုင်းနှင့် ညနေပိုင်းအချိန်တို့တွင် ရန်ကုန်မြို့မြို့နယ်အများစု၌ မြေပြင်လူဦးရေစာရင်းကောက်ယူသွားမည်ဖြစ်ကြောင်း ရပ်ကွက်အုပ်ချုပ်ရေးမှူးရူံးအဖွဲ့က လိုက်လံကြေညာခဲ့သည်။
အဆိုပါကြေညာချက်တွင် မြေပြင်လူဦးရေစာရင်းကောက်ယူခြင်းအတွက် မိမိတို့၏နေအိမ်ရှိသူများ၏ သန်းခေါင်စာရင်း၊ နိုင်ငံသားစိစစ်ရေးကတ်ပြားများကို အဆင်သင့် ပြင်ဆင်ထားကြရန်နှင့် ခရီးသွားလာသူများရှိပါက ၎င်း၏ နိုင်ငံသားစိစစ်ရေးကတ်ပြားကို မိတ္ထူကူးယူထားပေးပါရန်မေတ္တာရပ်ခံထားသည်။
ယင်းသို့ မြေပြင်လူဦးရေစာရင်းကောက်ယူခြင်းသည် နစက ကပြုလုပ်မည့် ၂၀၂၃ ရွေးကောက်ပွဲအတွက်ဖြစ်နိုင်သည်ဟု ရန်ကုန်မြို့နေ ပြည်သူအများစုကလည်း သုံးသပ်ပြောကြားနေသည်။
အဆိုပါ မြေပြင်လူဦးရေစာရင်း ကွင်းဆင်း ကောက်ယူမှုကို တစ်အိမ်တက်ဆင်းစနစ်ဖြင့် တစ်နိုင်ငံလုံးတွင် တစ်ပြိုင်နက်တည်းကောက်ယူသွားမည်ဖြစ်ကြောင်း ပြီးခဲ့သော ဒီဇင်ဘာ ၂၀ ရက်က မြေပြင်ကွင်းဆင်းစာရင်းကောက်ယူရေး ကြီးကြပ်မှုကော်မတီက ထုတ်ပြန်ထားသည်။