ရန်ကုန်တိုင်းအပါအဝင် တိုင်းနှင့်ပြည်နယ်အသီးသီးမှ မီးသတ်တပ်ဖွဲ့ဝင်များသည် လာမည့် မေ ၅ ရက်တွင်ကျရောက်မည့် နှစ် (၈၀) ပြည့် မြန်မာနိုင်ငံမီးသတ်တပ်ဖွဲ့နေ့ကို ဂုဏ်ပြုကြိုဆိုသည့်အနေဖြင့် စုပေါင်းသွေးလှူဒါန်းမှုများပြုလုပ်ခဲ့ကြသည်။
မြန်မာနိုင်ငံမီးသတ်တပ်ဖွဲ့ဌာနချုပ်နှင့် ရန်ကုန်တိုင်းမီးသတ်တပ်ဖွဲ့ဝင်များစုပေါင်း၍ ရန်ကုန်ပြည်သူ့ဆေးရုံကြီး၌ ယနေ့ မေ ၂ ရက်နံနက်ပိုင်းက သွေးလှူဒါန်းခဲ့ကြရာ ပြည်ထဲရေးဝန်ကြီးဌာန၊ ပြည်ထောင်စုဝန်ကြီး ဒု- ဗိုလ်ချုပ်ကြီး ညွန့်ဝင်းဆွေ၊ ကျန်းမာရေးဝန်ကြီးဌာန၊ ပြည်ထောင်စုဝန်ကြီးဒေါက်တာသက်ခိုင်ဝင်းနှင့် တာဝန်ရှိသူများက ကြည်ရှု့အားပေးပြီး သွေးလှူဒါန်းသည့် တပ်ဖွဲ့ဝင်များကို ခွန်အားဖြည့်အစားအစာများ ထောက်ပံ့ပေးအပ်ခဲ့ကြသည်။
ထို့ပြင် နေပြည်တော်ရှိ မီးသတ်တပ်ဖွဲ့ဝင်များစုပေါင်း၍ နေပြည်တော်ကုတင် (၁၀၀၀) ပြည်သူ့ဆေးရုံကြီး၌ သွေးလှူဒါန်းရာ ပြည်ထဲရေးဝန်ကြီးဌာန၊ ဒု-ဝန်ကြီး ဗိုလ်ချုပ်မင်းသူ၊ ကျန်းမာရေးဝန်ကြီးဌာန၊ ဒု-ဝန်ကြီး ဒေါက်တာအေးထွန်း၊ အမြဲတမ်းအတွင်းဝန်များနှင့် တာဝန်ရှိသူများကကြည်ရှု့အားပေးပြီး ခွန်အားဖြည့်အဟာရအစားအစာများကို ထောက်ပံ့ပေးအပ်ခဲ့သည်။
ထို့အတူ တနင်္သာရီတိုင်း၊ ထားဝယ်မြို့၊ အမှတ် (၁၂) တပ်မတော်ဆေးရုံကုတင် (၁၀၀) ၊ ဧရာဝတီတိုင်း၊ ပုသိမ်ပြည်သူ့ဆေးရုံကြီး၊ ကရင်ပြည်နယ်၊ ဘားအံမြို့ ပြည်သူ့ဆေးရုံကြီးတို့တွင်လည်း မီးသတ်တပ်ဖွဲ့ဝင်များက စုပေါင်းသွေးလှူဒါန်းမှုများပြုလုပ်ခဲ့ကြသည်။