ရန်ကုန်စီးပွားရေးတက္ကသိုလ်တွင် ၂၀၂၆–၂၀၂၇ ပညာသင်နှစ်အတွက် မဟာဘွဲ့သင်တန်းများနှင့် ဘွဲ့လွန်ဒီပလိုမာသင်တန်းများကို ဖွင့်လှစ်သင်ကြားမည်ဖြစ်ပြီး ဝင်ခွင့်လျှောက်ထားနိုင်ကြောင်း တက္ကသိုလ်မှ ထုတ်ပြန်ကြေညာထားသည်။
ဖွင့်လှစ်မည့် မဟာဘွဲ့သင်တန်းများတွင် စီးပွားရေးလုပ်ငန်းစီမံခန့်ခွဲမှု (MBA, EMBA)၊ လူမှုစီးပွားတည်တံ့ရေးတီထွင်ဖန်တီးမှုပညာ (MSESI)၊ ဖွံ့ဖြိုးရေးပညာ (MDevS, EMDevS)၊ အသုံးချစာရင်းအင်းပညာ (MAS)၊ ပြည်သူ့ရေးရာစီမံခန့်ခွဲမှုပညာ (MPA, EMPA)၊ စျေးကွက်စီမံခန့်ခွဲမှုပညာ (MMM)၊ ဧည့်ဝတ်နှင့်ခရီးသွားလာရေးစီမံခန့်ခွဲမှုပညာ (MHTM) နှင့် ဘဏ်လုပ်ငန်းနှင့် ဘဏ္ဍာရေးပညာ (MBF) တို့ ပါဝင်သည်။
ထို့ပြင် ဘွဲ့လွန်ဒီပလိုမာသင်တန်းများအဖြစ် သုတေသနပညာ (PGDRS)၊ စီမံအုပ်ချုပ်မှုပညာ (PGDMA) နှင့် လူ့စွမ်းအားအရင်းအမြစ်စီမံခန့်ခွဲမှု (PGDHRM) တို့ကိုလည်း ဖွင့်လှစ်မည်ဖြစ်သည်။ ရုံးလုပ်ငန်းစီမံခန့်ခွဲမှုပညာဒီပလိုမာ (DSM) ကိုလည်း သင်ကြားမည်ဖြစ်သည်။
သင်တန်းတက်ရောက်ရန်အတွက် အရည်အချင်းသတ်မှတ်ချက်များကိုလည်း ထုတ်ပြန်ထားပြီး ဒီပလိုမာသင်တန်းများအတွက် တက္ကသိုလ်ဝင်တန်းအောင်မြင်ပြီးသူ ဖြစ်ရမည်ဖြစ်ကာ မဟာဘွဲ့နှင့် ဘွဲ့လွန်ဒီပလိုမာသင်တန်းများအတွက် ဘွဲ့ရရှိပြီးသူဖြစ်ရမည်ဟု သတ်မှတ်ထားသည်။
ထို့အပြင် သက်ဆိုင်ရာသင်တန်းအလိုက် လုပ်သက်နှင့် အသက်အရွယ် သတ်မှတ်ချက်များလည်း ရှိပြီး MAS, MMM, MHTM နှင့် MBF သင်တန်းများအတွက် သတ်မှတ်လုပ်သက်နှင့် အသက်အရွယ် ပြည့်မီရမည်ဖြစ်သည်။ EMBA, EMDevS နှင့် EMPA သင်တန်းများအတွက်လည်း အစိုးရဝန်ထမ်းနှင့် ပုဂ္ဂလိကအဆင့်စီမံခန့်ခွဲမှု အတွေ့အကြုံလိုအပ်ချက်များ သတ်မှတ်ထားသည်။
လျှောက်လွှာပုံစံများနှင့် သင်တန်းဆိုင်ရာစာရွက်စာတမ်းများကို ကမာရွတ်နှင့် လှိုင်နယ်မြေများတွင် သတ်မှတ်ရက်များအတိုင်း တင်သွင်းလျှောက်ထားနိုင်ကြောင်း သိရသည်။