ယူ-၁၅ လူငယ်လိဂ်ပြိုင်ပွဲကို ယခုလ ဒီဇင်ဘာနောက်ဆုံးပတ်မှစတင်၍ (၆) လ ကြာ ကျင်းပြုလုပ်သွားမည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်က အသိပေးထုတ်ပြန်ထားသည်။
ပြိုင်ပွဲကို အပတ်စဉ် စနေနှင့် တနင်္ဂနွေနေ့များတွင် ကျင်းပမည်ဖြစ်ပြီး ပြိုင်ပွဲကာလမှာ ပထမအကျော့ (၃) လ၊ ဒုတိယအကျော့ (၃)လဖြင့် စုစုပေါင်း (၆) လ ကြာ ကျင်းပသွားမည်ဖြစ်သည်။
FIFA-MFF U15 Boys Leagu2024-2025 ကို ရန်ကုန်၊ မန္တလေး၊ တောင်ကြီးမြို့များတွင် ကျင်းပသွားရန် စီစဉ်ဆောင်ရွက်လျက်ရှိပြီး၊ ပြိုင်ပွဲဝင်ခွင့်ရအသင်းများအား ပြိုင်ပွဲစရိတ် ထောက်ပံ့သွားမည်ဖြစ်ကာ ပထမ၊ ဒုတိယ၊ တတိယ ဆုရအသင်းများအား ဆုကြေးငွေ၊ ဆုဖလားနှင့် ဆုတံဆိပ်များ ပေးအပ် ချီးမြှင့်သွားမည်ဖြစ်ကြောင်း သိရသည်။
အဆိုပါ ပြိုင်ပွဲကို မြန်မာနိုင်ငံ ဘောလုံးအဖွဲ့ချုပ်က နှစ်စဉ်ကျင်းပပြုလုပ်ပေးလျက်ရှိပြီး၊ လူငယ်မျိုးဆက်သစ်များ ဘောလုံးလှုပ်ရှားမှုများတွင် ပါဝင်လာရေး၊ ပြည်တွင်း လူငယ်ပြိုင်ပွဲများ စဉ်ဆက်မပြတ် ကျင်းပနိုင်ရေး၊ မျိုးဆက်သစ် လူငယ်ကစားသမားများ ပေါ်ထွက်လာရေး၊ FIFA, AFC, AFF လူငယ်ပြိုင်ပွဲများတွင် မြန်မာ့လက်ရွေးစင် လူငယ်အသင်းများ အောင်မြင်မှု ရရှိရေးအတွက် ရည်ရွယ်၍ ဖီဖာလမ်းညွှန်ချက်များနှင့်အညီ အသက် (၁၅) နှစ်အောက် လူငယ်ဘောလုံး လိဂ်ပြိုင်ပွဲကျင်းပပေးလျက်ရှိသည်။
ယခင်နှစ် ၂၀၂၃-၂၀၂၄ ပြိုင်ပွဲတွင် ရှမ်း (တောင်)အသင်းက အနိုင်ရဗိုလ်စွဲထားပြီး ယူ-၁၅ လိဂ်ပြိုင်ပွဲ၏ ပထမဆုံး ချန်ပီယံအသင်းအဖြစ် မှတ်တမ်း ရေးထိုးထားနိုင်ခဲ့သည်။