ခရိုင်းမီးယားကျွန်းဆွယ်ကို ပစ်လွှတ်တိုက်ခိုက်ခဲ့တဲ့ ယူကရိန်းရဲ့ ဒရုန်း ၃၈ စင်းလုံးကို ရုရှား လေကြောင်းကာကွယ်ရေးစနစ်တွေက ဖျက်ဆီးချေမှုန်းပစ်ခဲ့တယ်လို့ ရုရှားကာကွယ်ရေးဝန်ကြီးဋ္ဌာနက ပြောဆိုပါတယ်။ ဖီအိုဒိုဆီးယားဆိပ်ကမ်းမှာ ပြင်းထန်တဲ့ ပေါက်ကွဲမှုတွေဖြစ်ခဲ့တယ်လို့ ယူကရိန်းနဲ့ ရုရှားရှိ လူမှုကွန်ရက် မီဒီယာတွေပေါ် သတင်းတွေတက်လာခဲ့ပြီးနောက် ကာကွယ်ရေးဝန်ကြီးဋ္ဌာနက ယင်းသို့ ထုတ်ပြန်ခဲ့တာဖြစ်ပါတယ်။
ရုရှားကာကွယ်ရေးဝန်ကြီးဋ္ဌာနရဲ့ တယ်လီဂရမ်အကောင့်ကနေ သတင်းထုတ်ပြန်ခဲ့တာဖြစ်ပြီး ဖြစ်စဉ်အတွင်း ပျက်ဆီးထိခိုက်မှုနဲ့ လူေ-သဆုံးမှုရှိ မရှိကိုတော့ ပြောဆိုခဲ့ခြင်း မရှိပါဘူး။
ဖီအိုဒိုဆီးယားဆိပ်ကမ်းအနီးက လမ်းတွေမှာ ယာဉ်ကြောပိတ်ဆို့မှုတွေ သိသိသာသာဖြစ်ပေါ်ခဲ့တယ်လို့ ရုရှားခန့်ထားတဲ့ ခရိုင်းမီးယားဒေသ အရာရှိတွေက အစောပိုင်းမှာ ပြောဆိုပါတယ်။ ခရိုင်းမီးယားကျွန်းဆွယ်နဲ့ ရုရှား ကုန်းမကြီးကို ဆက်သွယ်ထားတဲ့ တံတားပေါ်မှာ ယာဉ်ဖြတ်သန်းမှုတွေ ၂ နာရီခန့်ရပ်တန့်သွားခဲ့ပြီး ညနေ ၂ နာရီနီးပါးလောက်မှသာ ပြန်လည်ဖြတ်သန်းနိုင်ခဲ့တယ်လို့ ယင်း အရာရှိတွေက ပြောဆိုပါတယ်။
တနင်္ဂနွေနေ့ ဒေသစံတော်ချိန် မနက် ၂ နာရီလောက်မှာ ဆီသိုလှောင်ရုံတစ်ခုနဲ့ ပင်လယ်ဆိပ်ကမ်း ဧရိယာမှာ ပြင်းထန်တဲ့ ပေါက်ကွဲသံတွေ ကြားခဲ့ရတယ်လို့ ဖီအိုဒိုဆီးယား ဒေသခံတွေက ပြောဆိုကြောင်း ရုရှားနဲ့ ယူကရိန်း လူမှုကွန်ရက်မီဒီယာတွေက ဖော်ပြပါတယ်။
၂၀၁၄ ခုနှစ်မှာ ရုရှားသိမ်းပိုက်ခဲ့တဲ့ ခရိုင်းမီးယားကျွန်းဆွယ်နဲ့ ပင်လယ်နက်ဒေသဟာ ၂ နှစ်ကြာ ယူကရိန်းစစ်ပွဲမှာ အရေးပါတဲ့ စစ်ရေးနယ်မြေတစ်ခုဖြစ်လာခဲ့ပါတယ်။
ယူကရိန်းက ရုရှားရဲ့ စစ်ရေးပစ်မှတ်တွေကို လေကြောင်းနဲ့ ရေပြင် ဒရုန်းတွေသုံးကာ တိုးမြှင့်တိုက်ခိုက်လာခဲ့တာကြောင့် ဆီဗာစတိုပိုလ်ဆိပ်ကမ်းရှိ စစ်သင်္ဘောတွေ၊ ရေတပ် ပြုပြင်ထိန်းသိမ်းရေးနေရာတွေနဲ့ အခြား ပစ်မှတ်တွေ ထိုခိုက်ပျက်စီးမှုဖြစ်ခဲ့ကြောင်း သိရပါတယ်။
Ref: U.S.News