မြန်မာနိုင်ငံမှ ပနားမီး ရေငန်ပုစွန်များကို ပြည်ပသို့ နှစ်စဉ်တင်ပို့လျက်ရှိရာ ယခုဘဏ္ဍာနှစ်တွင် တန်ချိန်ပေါင်း (၅၉၄၆ ဒသမ ၁၈၇)တန် တင်ပို့နိုင်ခဲ့ပြီဖြစ်ကြောင်း တနင်္သာရီတိုင်းဒေသကြီး ငါးလုပ်ငန်းအဖွဲ့ချုပ်မှ သိရသည်။
ရေငန်ပုစွန်များကို ပြည်ပသို့ တင်ပို့ရာတွင် တရုတ်နိုင်ငံသို့ ပြုတ်၍လည်းကောင်း ဂျပန်နိုင်ငံသို့အေးခဲ၍ တင်ပို့လျက်ရှိကြောင်း၊ ပြည်ပသို့ လက်ရှိထက် ပိုမိုတင်ပို့နိုင်ရန် ပင်လယ်ပြင်တွင် ဖမ်းဆီးမှုထက် တိုးချဲ့မွေးမြူရေးကို ဆောင်ရွက်လိုကြကြောင်းလည်း သိရသည်။
ထို့ပြင် ရေငန်ပုစွန်မွေးမြူမှုအတွက် ပုစွန်သားပေါက်နှင့် အစာအား ထိုင်းနိုင်ငံမှ နှစ်စဉ်ဝယ်ယူနေရပြီး တနင်္သာရီတိုင်းဒေသကြီး ရေဖြူမြို့နယ်၊ ကျွန်းစုမြို့နယ်၊ ပုလောမြို့နယ်နှင့်ကော့သောင်းမြို့နယ်တို့တွင် ပနားမီးပုစွန်ဖြူများကို (၂၂ ၁၇ ဒသမ ၅၆) ဧက၌ မွေးမြူထုတ်လုပ်လျက်ရှိကြောင်း သိရသည်။
အလားတူ ထားဝယ်ခရိုင် သရက်ချောင်း၊ မြိတ်ခရိုင် မြိတ်၊ ပုလော၊ ကျွန်းစုမြို့နယ်၊ ဘုတ်ပြင်းခရိုင် ဘုတ်ပြင်းမြို့နယ်၊ ကော့သောင်းခရိုင် ကော့သောင်းမြို့နယ်တို့တွင် ခွင့်ပြုမိန့်ဖြင့် တိုးချဲ့ (၂၆၆၂ ဒသမ ၆၈) ဧကနှင့် ကျွန်းစုမြို့နယ်တွင် (၃၉၀ ဒသမ ၁၂)ဧက မွေးမြူကြောင်း သိရသည်။
ယခု ၂၀၂၄-၂၀၂၅ ဘဏ္ဍာနှစ် မိုးရာသီရေငန်ပုစွန်မွေးမြူရာတွင် ရေငန်နှုန်းကျဆင်းခြင်းကြောင့် ပုစွန်ကြီးထွားနှုန်းကျဆင်းခြင်း၊ ရောဂါပိုးဝင်ခြင်းများဖြစ်ခဲ့သည့်အတွက်မွေးမြူရေးလုပ်ငန်းရှင်များ အနေဖြင့် ၂၀၂၅-၂၀၂၆ ဘဏ္ဍာနှစ် မိုးရာသီကာလတွင် ပုစွန်လျှော့မွေးပြီး နွေရာသီ၌ ပိုပြီးမွေးမြူထုတ်လုပ်ရန် ဆောင်ရွက်နေကြကြောင်း သိရသည်။