မွန်ပြည်နယ်မှလွဲ၍ ကျန် တိုင်းနှင့်ပြည်နယ်အနှံ့တွင် မတ် ၁ ရက်မှ ၈ ရက်အတွင်း မတ်လ၏ ပုံမှန်ထက်နေ့အပူချိန်များပိုမိုမြင့်တက်လာနိုင်သည်ဟု မိုးလေဝသမြန်မာ(ရန်ကုန်ဌာနခွဲ)ထံမှ သိရသည်။
အဆိုပါ မတ် ၁ ရက်မှ မတ် ၈ ရက်အတွင်း ရန်ကုန်တိုင်း၊ ပဲခူးတိုင်း(တောင်ပိုင်း)၊ ဧရာဝတီတိုင်းနှင့် ရှမ်းပြည်နယ်(တောင်ပိုင်း)တို့တွင် မတ်လ၏ ပုံမှန်နေ့အပူချိန်ထက် (၅)ဒီဂရီဆဲလ်စီးယပ်ခန့်၊ စစ်ကိုင်းတိုင်း(အထက်ပိုင်း)၊ ပဲခူးတိုင်း (အရှေ့ပိုင်း)နှင့် ကချင်ပြည်နယ်(အောက်ပိုင်း)တို့တွင် မတ်လ၏ ပုံမှန်နေ့အပူချိန်ထက် (၆)ဒီဂရီဆဲလ်စီးယပ်ခန့်မြင့်တက်လာနိုင်ကြောင်း သိရသည်။
ထို့ပြင် ကရင်ပြည်နယ်(အောက်ပိုင်း)၊ ရှမ်းပြည်နယ်(အရှေ့ပိုင်း)နှင့်(မြောက်ပိုင်း)တို့တွင် မတ်လ ၏ ပုံမှန်နေ့အပူချိန်ထက် (၄)ဒီဂရီဆဲလ်စီးယပ်ခန့်၊ နေပြည်တော်၊ စစ်ကိုင်းတိုင်း(အောက်ပိုင်း)၊ မန္တလေးတိုင်း၊ မကွေးတိုင်း၊ ပဲခူးတိုင်း(အနောက်ပိုင်း)နှင့် ချင်းပြည်နယ်တို့တွင် မတ်လ၏ ပုံမှန်နေ့အပူချိန်ထက် (၃)ဒီဂရီဆဲလ်စီးယပ်ခန့်၊ ရခိုင်ပြည်နယ်နှင့် ကရင်ပြည်နယ်(အထက်ပိုင်း)တို့တွင် မတ်လ၏ ပုံမှန်နေ့အပူချိန်ထက် (၂)ဒီဂရီဆဲလ်စီးယပ်နှင့် တနင်္သာရီတိုင်းနှင့် ကယားပြည်နယ်တို့တွင် မတ်လ၏ ပုံမှန်နေ့အပူချိန်ထက် (၁) ဒီဂရီဆဲလ်စီးယပ်ခန့် မြင့်တက်လာနိုင်ကြောင်း သိရသည်။
ထို့ကြောင့် မတ် ၁ ရက်မှ မတ် ၈ ရက်အတွင်း နေ့အပူချိန်များ ပုံမှန်ထက်ပိုမိုမြင့်တက်လာနိုင်၍ ပြည်သူများအနေဖြင့် သက်ဆိုင်ရာ ကျန်းမာရေးဋ္ဌာနများနှင့် အဖွဲ့အစည်းများမှထုတ်ပြန်ထားသည့် အပူဒဏ်ကာကွယ်ရေးသတိပေးနှိုးဆော်ချက်များကို ပူးပေါင်းပါဝင်လိုက်နာကြရန်နှင့် မီးဘေးအန္တရာယ်ကြိုတင်သတိပြုကြရန် မိုးလေဝသမြန်မာ(ရန်ကုန်ဌာနခွဲ)က အသိပေးခဲ့သည်။