မြန်မာ–ထိုင်း လုံခြုံရေး၊ ကုန်သွယ်ရေးနှင့် စွမ်းအင်ပူးပေါင်းဆောင်ရွက်မှု ပိုမိုမြှင့်တင်မည်

ဗန်ကောက်၊ ဩဂုတ် ၆

မြန်မာနိုင်ငံတော်သမ္မတ ဦးမင်းအောင်လှိုင်၏ ထိုင်းနိုင်ငံသို့ တရားဝင်ခရီးစဉ်အတွင်း မြန်မာနှင့် ထိုင်း နှစ်နိုင်ငံသည် လုံခြုံရေး၊ ကုန်သွယ်ရေး၊ စွမ်းအင်၊ အလုပ်သမားရေးရာနှင့် နယ်စပ်ဖြတ်ကျော် ရေထုညစ်ညမ်းမှုဆိုင်ရာကိစ္စရပ်များတွင် ပူးပေါင်းဆောင်ရွက်မှု ပိုမိုမြှင့်တင်ရန် သဘောတူညီခဲ့ကြပြီး ပူးပေါင်းဆောင်ရွက်ရေးဆိုင်ရာ စာချုပ်စာတမ်းများကို လက်မှတ်ရေးထိုးလဲလှယ်ခဲ့ကြသည်။

ထိုင်းအစိုးရပြောရေးဆိုခွင့်ရှိသူ ရာချာဒါ သနာဒီရက်၏ ထုတ်ပြန်ချက်အရ ထိုင်းနိုင်ငံဝန်ကြီးချုပ် မစ္စတာ အနုထင် ချာဝီရကွန်က ဦးမင်းအောင်လှိုင် နိုင်ငံတော်သမ္မတတာဝန် စတင်ထမ်းဆောင်ခဲ့သည့်အပေါ် ဝမ်းမြောက်ကြောင်း ပြောကြားခဲ့သည်။

ထို့ပြင် ဧပြီလအတွင်း သမ္မတတာဝန် စတင်ထမ်းဆောင်ပြီးနောက် ပထမဆုံးသွားရောက်သည့် နိုင်ငံများအနက် ထိုင်းနိုင်ငံကို ရွေးချယ်ခဲ့ခြင်းသည် မြန်မာ–ထိုင်း နှစ်နိုင်ငံအကြား နီးကပ်ခိုင်မာသည့် ဆက်ဆံရေးကို ထင်ဟပ်စေကြောင်း ထိုင်းဝန်ကြီးချုပ်က ပြောကြားခဲ့သည်။

ထိုင်းနိုင်ငံအနေဖြင့် အာဆီယံဆိုင်ရာ လုပ်ငန်းစဉ်များတွင် မြန်မာနိုင်ငံ ပါဝင်ဆောင်ရွက်မှုကို ထောက်ခံအားပေးရန် အသင့်ရှိကြောင်းလည်း ၎င်းက ဆိုသည်။

လုံခြုံရေးကဏ္ဍနှင့်ပတ်သက်၍ နှစ်နိုင်ငံထိစပ်နေသည့် နယ်စပ်ဒေသ တည်ငြိမ်အေးချမ်းရေး၏ အရေးပါမှုကို ထိုင်းဝန်ကြီးချုပ်က အလေးထားပြောကြားခဲ့ပြီး မူးယစ်ဆေးဝါး၊ အွန်လိုင်းငွေလိမ်ဂိုဏ်းများနှင့် ငွေကြေးခဝါချမှုအပါအဝင် နယ်စပ်ဖြတ်ကျော်ဂိုဏ်းဖွဲ့ရာဇဝတ်မှုများကို ပိုမိုထိရောက်စွာ ပူးပေါင်းနှိမ်နင်းရန် အဆိုပြုခဲ့သည်။

စီးပွားရေးကဏ္ဍတွင် နယ်စပ်ကုန်သွယ်ရေး ပြန်လည်အားကောင်းလာစေရန် ကုန်သွယ်ရေးဆိုင်ရာ အတားအဆီးများ ဖယ်ရှားရေးနှင့် သယ်ယူပို့ဆောင်ရေးချိတ်ဆက်မှု မြှင့်တင်ရေးတို့ကို နှစ်ဖက်ပူးပေါင်းဆောင်ရွက်ရန် တိုက်တွန်းခဲ့သည်။

ထိုင်းနိုင်ငံသည် ယခုနှစ်အတွင်း ပူးတွဲကုန်သွယ်ရေးကော်မတီ အစည်းအဝေးကို အိမ်ရှင်အဖြစ် လက်ခံကျင်းပရန် အသင့်ရှိကြောင်း၊ စွမ်းအင်ပူးပေါင်းဆောင်ရွက်မှု ဆက်လက်မြှင့်တင်ရေး၊ နှစ်နိုင်ငံငွေပေးချေမှုစနစ်များ တိုးချဲ့ရေးနှင့် ဒေသတွင်းစီးပွားရေးစင်္ကြံများ၌ ပူးပေါင်းဆောင်ရွက်ရေးတို့ကိုလည်း အဆိုပြုခဲ့သည်။

ထို့အပြင် ထိုင်းနိုင်ငံ၏ စီးပွားရေးဖွံ့ဖြိုးမှုတွင် မြန်မာရွှေ့ပြောင်းလုပ်သားများ၏ အရေးပါမှုကို မီးမောင်းထိုးပြခဲ့ပြီး ၎င်းတို့၏ အခွင့်အရေးနှင့် အကျိုးခံစားခွင့်များကို အကာအကွယ်ပေးရေး၊ တရားဝင်အလုပ်အကိုင်အခွင့်အလမ်းများ ရရှိရေးတို့အတွက် ဆက်လက်ဆောင်ရွက်သွားမည်ဖြစ်ကြောင်း အတည်ပြုပြောကြားခဲ့သည်။

တွေ့ဆုံဆွေးနွေးမှုများအပြီးတွင် ခေါင်းဆောင်နှစ်ဦး၏ရှေ့မှောက်၌—

အလုပ်သမားရေးရာ ပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ၊
အလုပ်သမားများ ခန့်ထားရေးဆိုင်ရာ သဘောတူညီချက်၊
ကမ္ဘာမြေလေ့လာရေးနှင့် အာကာသနည်းပညာကို ငြိမ်းချမ်းစွာ အသုံးချရေးဆိုင်ရာ နားလည်မှုစာချွန်လွှာနှင့်
နယ်စပ်ဖြတ်ကျော်မြစ်များ၏ ရေအရည်အသွေး စီမံခန့်ခွဲမှုဆိုင်ရာ လုပ်ငန်းလမ်းညွှန်များ

အပါအဝင် နှစ်နိုင်ငံပူးပေါင်းဆောင်ရွက်ရေး စာချုပ်စာတမ်း လေးခုကို လက်မှတ်ရေးထိုးလဲလှယ်ခဲ့ကြောင်း သိရသည်။

Ref: ဆင်ဟွာ