မြန်မာသွင်းကုန်များကို ယူအက်စ်က အခွန် ၄၀ ရာခိုင်နှုန်း သတ်မှတ်       

အမေရိကန်သမ္မတ ဒေါ်နယ်ထရမ့်ပ်သည် ဂျပန်နှင့် တောင်ကိုရီးယားနိုင်ငံတို့မှ ကုန်စည်များအပေါ် ၂၅ ရာခိုင်နှုန်း အခွန်သတ်မှတ်ထားမှု အပါအဝင် သြဂုတ်လ ၁ ရက်နေ့မှစ၍ အဓိကကုန်သွယ်ဖက်နိုင်ငံများကို ပိုမိုမြင့်မားသည့် အခွန်စည်းကြပ်မှုများလုပ်မည်ဟု ပြောကြားထားသည့် စည်းကြပ်ခွန်စာလွှာများကို ထုတ်ဖော်ပြသလိုက်သည်။
           
ထရမ့်ပ်က မလေးရှား၊ ကာဇက်စတန်နှင့် တူနီးရှားကုန်စည်များအပေါ် ၂၅ ရာခိုင်နှုန်း၊ တောင်အာဖရိကကို ၃၀ ရာခိုင်နှုန်း၊ လာအိုနှင့် မြန်မာကုန်စည်များကို ၄၀ ရာခိုင်နှုန်းစီ အခွန်ကောက်မည်ဟုလည်း ကြေညာခဲ့သည်။ ထို့အပြင် အင်ဒိုနီးရှားကို အခွန် ၃၂ ရာခိုင်နှုန်း၊ ဘင်္ဂလားဒေ့ရှ်ကို ၃၅ ရာခိုင်နှုန်း ထိုင်းနှင့် ကမ္ဘောဒီးယားကို ၃၆ ရာခိုင်နှုန်းစီနှင့် ဘော့စနီးယားကို ၃၀ ရာခိုင်နှုန်း ဆာဘီးယားကို ၃၅ ရာခိုင်နှုန်း စည်းကြပ်ရန် သတ်မှတ်ထားခဲ့သည်။
           
ထရမ့်ပ်က တစ်ဖက်သတ် သတိပေးချက်များနှင့် ကုန်သွယ်ရေးသဘောတူညီချက်များသည် လှုပ်လှုပ်ခတ်ခတ်ဖြစ်လိမ့်မည်ဟု ပြောကြားထားရာ၌ ပထမဆုံး စည်းကြပ်ခွန်သတ်မှတ်နိုင်ငံများစာရင်းကို ကြေညာခဲ့ခြင်းဖြစ်သည်။ ဧပြီလ ၂ ရက် နေ့တွင် ၎င်းက အပြန်အလှန်အခွန်စည်းကြပ်မှုများဟု ခေါ်ဆိုခဲ့သော သွင်းကုန်ခွန်အသစ်များနှင့် ပတ်သက်၍ ကုန်သွယ်ဖက်နိုင်ငံများနှင့် သဘောတူညီချက်များကို မရရှိမီ ၂ ရက်အလို တနင်္လာနေ့တွင် ယခု ကြေညာချက်ထွက်‌ေပါ်လာခြင်းဖြစ်သည်။
        
  “ကျွန်ုပ်တို့ရဲ့ ဆက်ဆံရေးက ကံမကောင်းစွာဘဲ အပြန်အလှန် ဝေးကွာခဲ့ပါတယ်” ဟု ထရမ့်ပ် ၏ စာများတွင် ရေးသားခဲ့သည်။
         
ယခုအချိန်အထိ တနင်္လာနေ့တွင် ထုတ်ပြန်ခဲ့သော စာများသည် ၎င်း၏ အပြန်အလှန်အခွန်းစည်းကြပ်ခြင်းဟု ခေါ်ဆိုသော အစီအစဉ်အတွက် ဇူလိုင်လ ၉ ရက် နေ့နောက်ဆုံးသတ်မှတ်ရက်ကို သြဂုတ်လအစပိုင်းအထိ နောက်တစ်ကြိမ်အကဲစမ်းသည့် နည်းလမ်းတစ်ခုဖြစ်ပုံရသည်။ ၎င်း၏ ထရုဆိုရှယ်မီဒီယာပေါ်တင်ခဲ့သော သတ်မှတ်အခွန်နှုန်းထားအများစုသည် ထရမ့်ပ် ယခင်ကကြေညာထားခဲ့ပြီးဖြစ်သော အခွန်စည်းကြပ်မှုအသစ်များ ရင်ဆိုင်ရမည့်နိုင်ငံများ၏ အခွန်နှုန်းထားများနှင့် တူညီခဲ့သည်။
        
တနင်္လာနေ့တွင် ၎င်းတို့၏ စည်းကြပ်ခွန်များနှင့် ပတ်သက်၍ သမ္မတထံမှ တိုက်ရိုက်သတိပေးချက်များကို လက်ခံရရှိသည့် နိုင်ငံပေါင်း တစ်ဒါဇင်ခန့်ရှိသည်ဟု အိမ်ဖြူတော် သတင်းထုတ်ပြန်ရေးမှူး ကာရိုလိုင်း လီဗစ်က ပြောကြားခဲ့သည်။ လာမည့်ရက်များတွင် နောက်ထပ်စာများ ထပ်ရောက်လာမည်ဖြစ်ကြောင်းလည်း ၎င်းက ပြောကြားခဲ့သည်။ ထရမ့်ပ်က နစကဥက္ကဌ ဗိုလ်ချုပ်မှူးကြီး မင်းအောင်လှိုင်ထံသို့ လိပ်မူ၍ ကိုယ်တိုင် လက်မှတ် ရေးထိုးကာပေးပို့သောစာတွင် အခွန်တိုးကောက်ရခြင်းမှာ ကုန်သွယ်ရေးရှင်းတမ်း၌ မမျှတဘဲ သွင်းကုန်က ပို့ကုန်ထက်နည်းနေသောကြောင့် ဖြစ်ကြောင်း အကျိုးအကြောင်းဖေါ်ပြထားသည်။

Ref: ဘန်ကောက်ပို့စ်