မြန်မာနေရှင်နယ်လိဂ် အမျိုးသား /အမျိုး သမီးရာသီသစ်ပြိုင်ပွဲအတွက် Chief Operating Officer-COO များအဖြစ် ဦးစည်သူဝင်းနှင့် ဦးမိုးဝေအောင်တို့ကို ခန့်အပ်တာဝန်ပေးအပ်ခဲ့ကြောင်း မြန်မာနေရှင်နယ်လိဂ်ကော်မတီမှ သိရသည်။
ဦးစည်သူဝင်းသည် MNL အမျိုးသားလိဂ် ပြိုင်ပွဲကျင်းပရေး Chief Operating Officer -COO အဖြစ်တာဝန်ယူကိုင်တွယ်မည်ဖြစ်ပြီး ၎င်းသည် မြန်မာနိုင်ငံဘောလုံးအဖွဲ့ချုပ်၏ တွဲဖက်အထွေထွေအတွင်းရေးမှူးတစ်ဦးဖြစ်သည်။
ထို့အတူ ဦးမိုးဝေအောင်သည် MWL မြန်မာအမျိုးသမီးလိဂ်ပြိုင်ပွဲကျင်းပရေး Chief Operating Officer-COO အဖြစ်တာဝန်ယူမည်ဖြစ်ကာ၊ ၎င်းသည် မြန်မာနိုင်ငံဘောလုံးအဖွဲ့ချုပ် (Vice Chairman of MFF Media and Communications Committee) တစ်ဦးဖြစ်သည်။
ယမန်နေ့ ဧပြီ (၅)ရက်က မြန်မာနိုင်ငံဘောလုံးအဖွဲ့ချုပ် မြန်မာနေရှင်ရှယ်လိဂ် ကော်မတီအစည်းအဝေးကို ရန်ကုန်မြို့ရှိ Novotel Yangon Max Hotel တွင် ကျင်းပပြုလုပ်ခဲ့ကြပြီး၊ လာမည့် ရာသီသစ်အတွက် MNL မှ ပြင်ဆင်မှုများ ပြုလုပ်ရာတွင် ယခင်နှစ်များထက် ပိုမိုတိုးတက်ကောင်းမွန်စေရန် MNL နှင့် ကလပ်များ ဆွေးနွေးခဲ့ကြသည်။
ဆွေးနွေးပွဲအတွင်း MNL နှင့် MFF အပါအဝင် သက်တမ်းအလိုက် ပြိုင်ပွဲများတွက်အသက်၊ စာရင်းအချက်အလက် လှည့်ဖျားပါဝင်ကစားမှုများအား ပြတ်သားစွာ အရေးယူရန်၊ မြန်မာ့ဘောလုံးလောကအား နစ်နာစေမည့် အဂတိမှုများအတွက် တည်ဆဲဥပဒေများနှင့်အညီ ထိရောက်စွာအရေးယူသွားရန် ဦးစားပေး ဆွေးနွေးခဲ့ကြကြောင်း သိရသည်။
အစည်းအဝေးတွင် လာမည့် MNL ရာသီသစ်အား အိမ်ကွင်း/အဝေးကွင်း အပါအဝင် အမျိုးသားလိဂ်၊ အမျိုးသမီးလိဂ်များပို၍ ကောင်းမွန်သော ရာသီသစ် ဖြစ်လာရန် ကြိုးပမ်းမည်ဖြစ်ရာ MNL-MFF အပြင် Forever Media Group ကဲ့သို့ မီဒီယာပံ့ပိုးမှုများ၊ Sponsorship/ Promotion လုပ်ငန်းများ၊ ငွေကြေးသုံးစွဲ စီမံခန့်ခွဲမှုများအပါအဝင် ပို၍ပွင့်လင်းထင်သာရေးအတွက် ဆောင်ရွက်မှုများ ပိုမိုတိုးတက်ရန် ကြိုးပမ်းသွားမည့် ကိစ္စရပ်များကို ထည့်သွင်းဆွေးနွေးခဲ့ကြကြောင်း သိရသည်။