မြန်မာနိုင်ငံ၏ခန့်မှန်းလူဦးရေမှာ ၂၀၂၄ ခုနှစ်၊ လူဦးရေနှင့်အိမ်အကြောင်းအရာ သန်းခေါင်စာရင်း၏ ရှေ့ပြေးလူဦးရေစာရင်းအရ (၅၁ ဒသမ ၃)သန်းကျော်ရှိကြောင်း ဒီဇင်ဘာ ၃၁ ရက်ကထုတ်ပြန်ခဲ့သည်။
အဆိုပါ ၂၀၂၄ ခုနှစ်၊ လူဦးရေနှင့်အိမ်အကြောင်းအရာ သန်းခေါင်စာရင်းကောက်ယူခြင်းမှရရှိသည့် အချက်အလက်များနှင့်ပတ်သက်၍ ရှေ့ပြေးလူဦးရေစာရင်းထုတ်ပြန်ခြင်းအခမ်းအနားကို နေပြည်တော်ရှိ(MICC-2)၌ကျင်းပခဲ့သည်။
အခမ်းအနား ဗဟိုသန်းခေါင်စာရင်းကော်မရှင် ဥက္ကဋ္ဌ၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီးဦးမြင့်ကြိုင်က သန်းခေါင်စာရင်းကောက်ယူခြင်းလုပ်ငန်းသည် အခြားလူဦးရေစာရင်းကောက်ယူ မှတ်တမ်းတင်ခြင်းလုပ်ငန်းများနှင့်မတူဘဲ အချိန်ကာလကြာမြင့်စွာ၊ ဘဏ္ဍာငွေများစွာဖြင့် စနစ်တကျစီမံဆောင်ရွက်ရသည့် နိုင်ငံတော်စီမံကိန်းလုပ်ငန်းတစ်ခုဖြစ်သည်ဟု ပြောသည်။
ထို့ပြင် ပင်မအစီရင်ခံစာကို အသေးစိတ်ပြုစုကာ ၂၀၂၅ ခုနှစ်မကုန်မီ ထုတ်ပြန်ပေးသွားမည်ဖြစ်ပြီး နေပြည်တော်၊ တိုင်း/ပြည်နယ်အလိုက်အစီရင်ခံစာများ၊ ဘာသာရပ်အလိုက် သုတေသနစာတမ်းများကိုလည်း ဆက်လက်ပြုစု၍အဆင့်ဆင့်ထုတ်ပြန်သွားမည်ဖြစ်ကာ ယခုသန်းခေါင်စာရင်းကောက်ယူရာတွင် လုံခြုံရေးနှင့်လမ်းပန်း ဆက်သွယ်ရေးအခြေအနေများကြောင့် တစ်စိတ်တစ်ဒေသသာကောက်ယူနိုင်သည့် မြို့နယ်များရှိသကဲ့သို့ လုံးဝမကောက်ယူနိုင်သည့် မြို့နယ်များလည်းရှိသည်ဟု ပြောသည်။
” မကောက်ယူနိုင်တဲ့ ဒေသတွေမှာရှိတဲ့ လူဦးရေကို လူဦးရေပညာ၊ Remote Sensing နည်းပညာ၊ နိုင်ငံတကာအကြံပေးရဲ့ခန့်မှန်းတွက်ချက်မှု၊ ဌာနဆိုင်ရာစာရင်းအင်းတွေကိုအသုံးပြုပြီး ခန့်မှန်းလူဦးရေစာရင်းကို တွက်ချက်ထားတာဘဲဖြစ်ပါတယ်”ဟု ပြည်ထောင်စုဝန်ကြီးကပြောသည်။
၂၀၂၄ ခုနှစ်လူဦးရေနှင့် အိမ်အကြောင်းအရာသန်းခေါင်စာရင်းမှရရှိသည့် မြန်မာနိုင်ငံအတွင်းရှိ လူဦးရေမှာ(၅၁၃၁၆၇၅၆)ဦးဖြစ်ကာ စာရင်း၌ သန်းခေါင်စာရင်းကောက်ယူရရှိသည့်လူဦးရေ(၃၂၁၉၁၄၀၇)ဦးဖြစ်ပြီး စာရင်းမကောက်ယူနိုင်သည့်ဒေသများ၏ ခန့်မှန်းလူဦးရေမှာ (၁၉၁၂၅၃၄၉)ဦးတို့ဖြစ်ကြောင်း သိရသည်။
ထို့ပြင် စာရင်းအရ အမျိုးသား(၄၆ ဒဿမ ၉) ရာခိုင်နှုန်း၊ အမျိုးသမီး (၅၃ ဒဿမ ၁)ရာခိုင်နှုန်းဖြစ်ကာ လူဦးရေအချိုးတွင် ရန်ကုန်တိုင်းတွင် (၁၄ ဒဿမ ၄)ရာခိုင်နှုန်းဖြင့် အများဆုံးဖြစ်ပြီး ကယားပြည်နယ်တွင်(၀ ဒဿမ ၆)ရာခိုင်နှုန်းဖြင့် လူဦးရေအနည်းဆုံးဖြစ်ကြောင်း သိရသည်။