နေပြည်တော်၊ ဩဂုတ် ၁
မြန်မာနိုင်ငံပိုင်ဂြိုဟ်တုကို တရုတ်နိုင်ငံနှင့်ပူးပေါင်း၍ လွှတ်တင်နိုင်ရေးအတွက် လိုအပ်သည့် နည်းပညာပိုင်းဆိုင်ရာလုပ်ငန်းများနှင့် လူ့စွမ်းအားအရင်းအမြစ် ဖွံ့ဖြိုးတိုးတက်ရေးလုပ်ငန်းများကို စတင်ပြင်ဆင်နေပြီဖြစ်ကြောင်း နိုင်ငံတော်သမ္မတ ဦးမင်းအောင်လှိုင်က အစိုးရရက်ပေါင်း ၁၀၀ ပြည့် နိုင်ငံတော်အခြေပြမိန့်ခွန်းတွင် ပြောကြားသည်။
မြန်မာနိုင်ငံအနေဖြင့် အာကာသနည်းပညာကဏ္ဍတွင် ကမ္ဘာ့နိုင်ငံများနှင့် ရင်ပေါင်တန်းဆောင်ရွက်နိုင်ရေးအတွက် မြန်မာအာကာသအေဂျင်စီကို လိုအပ်သည့် လုပ်ငန်းတာဝန်နှင့် လုပ်ပိုင်ခွင့်များပေးအပ်၍ ဖွဲ့စည်းတာဝန်ပေးထားကြောင်း သိရသည်။
မြန်မာအာကာသအေဂျင်စီအနေဖြင့် အာကာသပြတိုက်ဖွင့်လှစ်ခြင်း၊ လူငယ်များအတွက် အာကာသဆိုင်ရာပြိုင်ပွဲများ ကျင်းပပေးခြင်းနှင့် လူထုပညာပေးအစီအစဉ်များ ဆောင်ရွက်ခြင်းတို့မှသည် ဂြိုဟ်တုမြေပြင်ထိန်းချုပ်ရေးစခန်း တည်ဆောက်ခြင်းအထိ အကောင်အထည်ဖော်ဆောင်ရွက်လျက်ရှိသည်။
ထို့ပြင် ဂြိုဟ်တုမှရရှိသည့် အချက်အလက်များနှင့် ဉာဏ်ရည်တုနည်းပညာ (AI) တို့ကို ပေါင်းစပ်၍ စိုက်ပျိုးရေး၊ သဘာဝဘေးအန္တရာယ်စီမံခန့်ခွဲရေး၊ မြေအသုံးချမှုစီမံခန့်ခွဲရေးနှင့် အခြားလူမှုစီးပွားဖွံ့ဖြိုးတိုးတက်ရေးကဏ္ဍများတွင် လက်တွေ့အသုံးချနိုင်ရေး ကြိုးပမ်းဆောင်ရွက်နေကြောင်း သိရသည်။
နိုင်ငံတကာပူးပေါင်းဆောင်ရွက်မှုအနေဖြင့် ရုရှားနိုင်ငံနှင့် အစိုးရအချင်းချင်း သဘောတူညီချက် လက်မှတ်ရေးထိုးထားပြီး တရုတ်၊ အိန္ဒိယနှင့် ဘယ်လာရုစ်နိုင်ငံတို့အပါအဝင် နိုင်ငံတကာအာကာသအဖွဲ့အစည်းများနှင့်လည်း အာကာသနည်းပညာကဏ္ဍစုံ၌ ပူးပေါင်းဆောင်ရွက်လျက်ရှိသည်။
မြန်မာနိုင်ငံပိုင်ဂြိုဟ်တုကို တရုတ်နိုင်ငံနှင့်ပူးပေါင်း၍ လွှတ်တင်နိုင်ရေးအပြင် Nano Satellite နှင့် Micro Satellite များကိုလည်း မိတ်ဖက်အဖွဲ့အစည်းများနှင့် ပူးပေါင်းတည်ဆောက်လွှတ်တင်သွားရန် စီစဉ်ထားသည်။
အလားတူ မြန်မာနိုင်ငံသားများ အာကာသခရီးစဉ်၌ ပါဝင်နိုင်ရေးအတွက် ရုရှားနိုင်ငံနှင့်ပူးပေါင်း၍ အာကာသယာဉ်မှူးလောင်းများ စိစစ်ရွေးချယ်လေ့ကျင့်ပေးနိုင်ရန် ဆောင်ရွက်နေကြောင်းလည်း နိုင်ငံတော်သမ္မတက ပြောကြားသည်။
အနာဂတ်တွင် မြန်မာနိုင်ငံသား အာကာသယာဉ်မှူးတစ်ဦး နိုင်ငံတကာအာကာသစခန်း၌ တာဝန်ထမ်းဆောင်နိုင်ခြင်းသည် နိုင်ငံနှင့် နိုင်ငံသားများအတွက် ဂုဏ်ယူဖွယ် သမိုင်းမှတ်တိုင်တစ်ရပ် ဖြစ်လာမည်ဟု ဆိုသည်။
အာကာသနည်းပညာကဏ္ဍသည် ကုန်ကျစရိတ်များပြားပြီး အချိန်ယူအကောင်အထည်ဖော်ရသည့် ကဏ္ဍဖြစ်သော်လည်း နိုင်ငံ၏ရေရှည်အနာဂတ်အတွက် မဖြစ်မနေရင်းနှီးမြှုပ်နှံရမည်ဖြစ်ကြောင်း၊ ပြည်တွင်းနည်းပညာအခြေခံနှင့် လူ့စွမ်းအားအရင်းအမြစ်ကို မြှင့်တင်ကာ နိုင်ငံတကာမိတ်ဖက်များနှင့် လက်တွဲ၍ မြန်မာနိုင်ငံ၏ အာကာသနည်းပညာဆိုင်ရာ ရည်မှန်းချက်များကို လက်တွေ့အကောင်အထည်ဖော်သွားမည်ဖြစ်ကြောင်း နိုင်ငံတော်သမ္မတက ပြောကြားသည်။