အလုပ်ရှင်အလုပ်သမားများ၏ အခွင့်အရေးအတွက် အဖွဲ့အစည်းများ ဖွဲ့စည်းခွင့်ပြုခဲ့ခြင်းနှင့် ပတ်သက်၍ နစက ဥက္ကဋ္ဌမှ ယနေ့ မေ (၁)ရက်တွင် ကျရောက်သည့် အပြည်ပြည်ဆိုင်ရာအလုပ်သမားနေ့ အခမ်းအနားသို့ ပေးပို့သည့် သဝဏ်လွှာ၌ ရေးသားပြောဆိုခဲ့ခြင်း ဖြစ်သည်။
အလုပ်သမားများ၏ အခွင့်အရေးကို ကာကွယ်စောင့်ရှောက်နိုင်ရန်၊ အလုပ်ရှင်နှင့် အလုပ်သမားတို့ကြားဆက်ဆံရေးကောင်းမွန်စေရန်၊ အလုပ်သမားအဖွဲ့အစည်းများစနစ်တကျနှင့် လွတ်လပ်စွာ ဖွဲ့စည်းဆောင်ရွက်နိုင်ရန်၊လုပ်ငန်းခွင်ဘေးအန္တရာယ်ကင်းရှင်းရေးနှင့် ကျန်းမာရေး၊ လူမှုဖူလုံရေး အပါအဝင် အခြားအကျိုးခံစားခွင့်များရရှိနိုင်ရန်အတွက် အသင်းအဖွဲ့များ လွတ်လပ်စွာ ဖွဲ့စည်းခွင့်နှင့် စည်းရုံးဆောင်ရွက်ခွင့်ဆိုင်ရာ ILO ပြဋ္ဌာန်းချက်အမှတ်(၈၇)ကို လက်ခံကျင့် သုံးလျက်ရှိကြောင်း နစက ဥက္ကဋ္ဌက ဆိုသည်။
ထို့ပြင် ၂၀၁၁ ခုနှစ် အလုပ်သမားအဖွဲ့အစည်းဥပဒေအရ အလုပ်သမားအဖွဲ့အစည်း(၃၀၁၅)ဖွဲ့နှင့် အလုပ်ရှင်အဖွဲ့အ စည်း(၂၈)ဖွဲ့ကို ဖွဲ့စည်းခွင့်ပြုခဲ့ပြီး ယင်းအဖွဲ့ အစည်းများနှင့် ပူးပေါင်းဆောင်ရွက်လျက်ရှိသည်ဟုလည်း ဥက္ကဋ္ဌက ၎င်း၏ သဝဏ်လွှာတွင် ထည့်သွင်းပြောကြားထားသည်။
အလုပ်ရှင်၊ အလုပ်သမားများကြား လုပ်ငန်းခွင်အတွင်း ဆွေးနွေးညှိနှိုင်းမှု ပြုလုပ်ခြင်းဖြင့် ထုတ်ကုန်များ ပိုမိုထုတ်လုပ်နိုင်ခြင်း၊ ပူးပေါင်းဆောင်ရွက်မှုအလေ့အထအားကောင်းလာခြင်း၊ ကောင်းမွန်သော လုပ်ငန်းခွင်ဆိုင်ရာ ရလဒ်များရရှိနိုင်ခြင်း၊ အငြင်းပွားမှုများလျော့ကျနိုင်ခြင်း၊ လုပ်ငန်းခွင်အတွင်းအပြန်အလှန်ယုံကြည်မှုတိုးတက်ခြင်းတို့အတွက် ခုံသမာဓိကောင်စီ၊ ခုံသမာဓိအဖွဲ့နှင့်ညှိနှိုင်းဖျန်ဖြေရေးအဖွဲ့များဖွဲ့စည်း၍လည်း ညှိနှိုင်းဖြေရှင်းဆောင်ရွက်ပေးလျက်ရှိကြောင်း သိရသည်။
“နိုင်ငံတော်ရဲ့ စီးပွားရေး ဖွံ့ဖြိုးတိုးတက်ဖို့နဲ့အလုပ်အကိုင်အခွင့်အလမ်းတွေ ဖန်တီးဖော်ဆောင်နိုင်ဖို့အတွက် လုပ်သားအင်အားအခြေပြုဆောင်ရွက်ရတဲ့ အထည်ချုပ်လုပ်ငန်းတွေအပါအဝင် စက်ရုံ၊ အလုပ်ရုံတွေ စဉ်ဆက်မပြတ်လုပ်ငန်းလည်ပတ် လုပ်ကိုင်နိုင်ဖို့ အစိုးရ၊ အလုပ်ရှင်၊အလုပ်သမားသုံးပွင့်ဆိုင် လက်တွဲကြိုးပမ်းဆောင်ရွက်နေပါတယ်”ဟု နစက ဥက္ကဋ္ဌက သဝဏ်လွှာတွင် ပြောဆိုခဲ့သည်။
ထို့အပြင် ပြည်ပနိုင်ငံများသို့ သွားရောက်အလုပ်လုပ်ကိုင်သည့် မြန်မာရွှေ့ပြောင်းအလုပ်သမားများအား သက်ဆိုင်ရာနိုင်ငံများ၏ ဥပဒေနှင့်အညီ ရပိုင်ခွင့်များရရှိနိုင်ရန် မြန်မာအလုပ်သမား အများဆုံး သွားရောက်အလုပ်လုပ်ကိုင်သည့် ထိုင်း၊ မလေးရှားနှင့် ကိုရီးယားနိုင်ငံတို့တွင် အလုပ်သမားသံအရာရှိများ ခန့်ထားကာ နိုင်ငံတကာရှိ မြန်မာသံရုံးများမှလည်း လိုအပ်သည့်ကာကွယ်စောင့်ရှောက်မှုများပြုလုပ်ပေးလျက်ရှိကြောင်း သဝဏ်လွှာတွင် ရေးသားထားသည်။
