တရုတ်နိုင်ငံ (ချုံချင့်ပိရှန်း)ဒေသရှိ စီးပွားရေးလုပ်ငန်းရှင်များအနေဖြင့် မြန်မာနိုင်ငံတွင် စွမ်းအင်ကဏ္ဍနှင့် လျှပ်စစ်သုံး လုပ်ငန်းသုံးယာဉ် ထုတ်လုပ်ခြင်း၊ ခရီးသွားကဏ္ဍ၊ စက်မှုလယ်ယာကဏ္ဍနှင့် ကျန်းမာရေးစောင့်ရှောက်မှုကဏ္ဍတို့တွင် လာရောက်ရင်းနှီးမြှုပ်နှံလိုကြောင်း တရုတ်(ချုံချင့်ပိရှန်း)- မြန်မာ စီးပွားရေးပူးပေါင်းဆောင်ရွက်မှုမိတ်ဆက်ပွဲမှ သိရသည်။
“ မနေ့က တရုတ်(ချုံချင့်ပိရှန်းဒေသ)-မြန်မာနှစ်နိုင်ငံအကြား စီးပွားရေးပူးပေါင်းဆောင်ရွက်မှုမြှင့်တင်ရေးကို ကျွန်တော်တို့ ကုန်သည်စက်မှုအသင်းချုပ်ရုံးမှာ ဆွေးနွေးခဲ့ပါတယ်။မြန်မာနဲ့ ချုံချင့်တို့ကြားမှာ တိုက်ရိုက်လေကြောင်းပြေးဆွဲခြင်းနဲ့ ခရီးသွားကဏ္ဍမှာ ပူးပေါင်းလိုတာရယ်၊ လျှပ်စစ်သုံး လုပ်ငန်းယာဉ်တွေ ထုတ်လုပ်ခြင်းတင်ပို့ခြင်းကဏ္ဍ၊ စက်မှုလယ်ယာပစ္စည်းတွေကို ထုတ်လုပ်တင်ပို့မယ့် အပိုင်းတွေ၊ ကျန်းမာရေးစောင့်ရှောက်မှုကဏ္ဍ စတဲ့ကဏ္ဍလေးရပ်မှာ ပိုမိုပူးပေါင်းဆောင်ရွက်ဖို့ စိတ်ဝင်စားတယ်လို့ သိရပါတယ်။” ဟု မြန်မာနိုင်ငံကုန်သည်များနှင့်စက်မှုလုပ်ငန်းရှင်မျာအသင်းချုပ် (UMFCCI) ဥက္ကဋ္ဌ ဦးအေးဝင်းက ပြောသည်။
အဆိုပါစီးပွားရေးကဏ္ဍလေးခုသည် မြန်မာနိုင်ငံရှိ ပုဂ္ဂလိက စိတ်ဝင်စားသော စီးပွားလုပ်ငန်းကဏ္ဍများဖြစ်သည့်အတွက် မြန်မာနိုင်ငံနှင့် တရုတ်နိုင်ငံ (ချုံချင့်ပိရှန်း)ဒေသတို့ နှစ်ဦးနှစ်ဖက်အကျိုးရှိမည့် ရင်းနှီးမြှုပ်နှံမှုများ ဖြစ်လာမည်ဖြစ်ကြောင်း၊ မြန်မာနိုင်ငံတွင် သဘာဝသယံဇာပေါကြွယ်ဝပြီး လုပ်သားအင်အားများစွာရှိသည့်အတွက် တရုတ်နိုင်ငံ (ချုံချင့်ပိရှန်း)ဒေသရှိ စီးပွားရေးလုပ်ငန်းရှင်များမှ ကမ်းလှမ်းမှုသည် နှစ်ဦးနှစ်ဖက်များစွာ အကျိုးဖြစ်ထွန်းမည်ဖြစ်သည့်အပြင် မြန်မာနိုင်ငံတွင်လည်း အဆိုပါစီးပွားရေးကဏ္ဍတွင် ပူးပေါင်းရင်းနှီးမြှုပ်နှံလိုသည့် အသေးစား၊ အငယ်စား၊ အလတ်စား MSME စီးပွားရေး လုပ်ငန်းရှင်များစွာလည်း ရှိကြောင်း ၎င်းက အဆိုပါမိတ်ဆက်ပွဲအခမ်းအနားတွင် ပြောကြားခဲ့သည်။
၂၀၂၃ ခုနှစ် ဖေဖော်ဝါရီလအထိ မြန်မာနိုင်တွင် တရုတ်နိုင်ငံမှ ကုမ္ပဏီပေါင်း ၅၈၀ ကျော်လာရောက် ရင်းနှီးမြှုပ်နှံထားပြီး ရင်းနှီးမြှုပ်နှံမှုပမာဏ ဒေါ်လာ ၂၁ ဒသမ ၇ ဘီလျံကျော်ရှိကာ စုစုပေါင်းနိုင်ငံခြား ရင်းနှီးမြှုပ်နှံမှု၏ ၂၃ ရာခိုင်နှုန်းကျော်ဖြင့် ဒုတိယအများဆုံး လာရောက် ရင်းနှီးမြှုပ်နှံထားခြင်းဖြစ်ကြောင်း မြန်မာနိုင်ငံရင်းနှီးမြှုပ်နှံမှုနှင့် ကုမ္ပဏီများစီမံခန့်ခွဲရေးဦးစီးဌာနမှ ဒုတိယညွှန်ကြားရေးမှူးချုပ် ဦးမင်းဇော်ဦးက ယင်းအခမ်းအနားတွင် ပြောကြားခဲ့သည်။
