မြန်မာကြူအာ(MMQR)ဖြင့် ငွေပေးချေမှုအမျိုးမျိုးအပြင် စီးပွားရေးလုပ်ငန်းစုံစုံလင်လင်၌ အသုံးပြုနိုင်မည်ဟု နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဖေဖော်ဝါရီ ၂၇ ရက်နံနက်ပိုင်းကပြုလုပ်သည့် မြန်မာနိုင်ငံ၏ ဒီဂျစ်တယ်ငွေပေးချေမှုအတွက် National QR Standard ဖြစ်သည့် MMQR စတင်အသုံးပြုခြင်းအခမ်းအနားတွင် ပြောကြားခဲ့ခြင်းဖြစ်သည်။
မြန်မာကြူအာ(MMQR)အသုံးပြု၍ ငွေပေးချေမှုနှင့် အစိုးရကို အခွန်အခ၊ မီတာခပေးဆောင်ခြင်း ၊ ခရီးသွားလုပ်ငန်း၊ နိုင်ငံ့ဝန်ထမ်းများလစာပေးခြင်း၊ ပင်စင်ထုတ်ပေးခြင်း၊ အသေးစားစီးပွား ရေးလုပ်ငန်း၊ စက်သုံးဆီအရောင်းဆိုင်၊ ပုဂ္ဂလိက ဆေးရုံများ၊ ကျောင်းများနှင့် လူသုံးကုန်ပစ္စည်းများရောင်းချခြင်းစသည့် စီးပွားရေးလုပ်ငန်းစုံစုံလင်လင်တွင်အသုံးပြုနိုင်မည်ဟု ပြောသည်။
” အခုလို ကဏ္ဍစုံက စီးပွားရေးလုပ်ငန်းတွေ စုံစုံလင်လင်ပါဝင်လာနိုင်မှာဖြစ်တဲ့အတွက် လွယ် ကူထိရောက်မြန်ဆန်ပြီး စွမ်းဆောင်ရည်ပြည့်တဲ့ ငွေပေးချေမှုစနစ်တစ်ရပ်ကိုဖော်ဆောင်နိုင်မှာဖြစ်ပါတယ်”ဟု နစက ဥက္ကဋ္ဌက ပြောသည်။
ထို့ပြင် ဗဟိုဘဏ်မှ မြန်မာကြူအာ(MMQR)ကိုတည်ထောင်နိုင်ခဲ့သဖြင့် နိုင်ငံတကာနှင့် ချိတ်ဆက်ဆောင်ရွက်ရသည့် ငွေရေးကြေးရေးဆိုင်ရာလုပ်ငန်းများနှင့် ငွေလွှဲပြောင်းပေးပို့မှုများတွင် အဆင်ပြေချောမွေ့ကာ လုံခြုံစိတ်ချစွာဖြင့် အခြားနိုင်ငံများနည်းတူ ရင်ဘောင်တန်းဆောင် ရွက်လာနိုင်တော့မည်ဖြစ်ပြီး နိုင်ငံတော်၏ ဒစ်ဂျစ်တယ်စီးပွားရေးအဆောက်အအုံဖွံ့ဖြိုးလာရန်တွန်းအားပေးသည့် စနစ်တစ်ခုလည်းဖြစ်သည်ဟု ပြောသည်။
” နည်းပညာတိုးတက်လာတာနဲ့အတူ အခုလို စ နစ်တကျအဆင်ပြေချောမွေ့အောင် စီမံဆောင် ရွက်ပေးနိုင်တာနဲ့အမျှ တစ်ဘက်မှာလည်း Online လိ-မ်လည်မှုတွေမဖြစ်အောင် စနစ်တကျစောင့်ကြည့်ထိန်းကျောင်းကြီးကြပ်ဖို့လိုအပ်ပါတယ်”ဟု နစက ဥက္ကဋ္ဌက မှာကြားသည်။
ထို့ကြောင့် ငွေပေးချေမှုစနစ်ဆိုင်ရာဖွံဖြိုးတိုး တက်မှုစနစ်တစ်ခုဖြစ်သည့် မြန်မာကြူအာ (MMQR)ဒစ်ဂျစ်တယ်ငွေပေးချေမှုချိတ်ဆက်စနစ်ကို ငွေပေးချေမှုစနစ်များခေတ်နှင့်အညီဖွံ့ ဖြိုးတိုးတက်ရန်၊ နိုင်ငံ၏ ငွေရေးကြေးရေးကဏ္ဍ ပိုမိုခိုင်မာအားကောင်းလာစေရန်နှင့် နိုင်ငံတော် ၏ အကျိုးစီးပွားကို တစ်ဖက်တစ်လမ်းမှအထောက်အကူပြုစေရန် ဝိုင်းဝန်းကြိုးပမ်းဆောင်ရွက်သွားကြရမည်ဟုလည်း နစက ဥက္ကဋ္ဌက တိုက်တွန်းပြောကြားခဲ့သည်။