မြစ်ရေများ ဆက်လက်မြင့်တက်နေ

မြင်းမူ၊ ပခုက္ကူ၊ ညောင်ဦး၊ ဘားအံ၊ မဒေါက်နှင့် မြစ်ငယ်မြို့တို့ရှိ မြေနိမ့်ပိုင်းနေထိုင်သူများအနေဖြင့် ရေဘေးလွတ်ရာနေရာများသို့ ကြိုတင်ရှောင်ရှားကြရန် သတိပေး

နေပြည်တော်၊ ဩဂုတ်-၁၁

မြန်မာနိုင်ငံရှိ မြစ်ရေများ ဆက်လက်မြင့်တက်နေပြီး မြင်းမူ၊ ပခုက္ကူ၊ ညောင်ဦး၊ ဘားအံ၊ မဒေါက်နှင့် မြစ်ငယ်မြို့များတွင် မြစ်ရေသည် သက်ဆိုင်ရာမြို့များ၏ စိုးရိမ်ရေမှတ်အထက် ရောက်ရှိနေကြောင်း မိုးလေဝသနှင့် ဇလဗေဒဆိုင်ရာ ထုတ်ပြန်ချက်များအရ သိရသည်။

ဩဂုတ် ၁၁ ရက် နံနက် ၆ နာရီခွဲ တိုင်းတာချက်အရ ဧရာဝတီမြစ်ရေသည် မြင်းမူမြို့တွင် စိုးရိမ်ရေမှတ်အထက် ၂၆ စင်တီမီတာ ကျော်လွန်ရောက်ရှိနေပြီး လာမည့်တစ်ရက်အတွင်း ၁၅ စင်တီမီတာခန့် ထပ်မံမြင့်တက်နိုင် ကြောင်း ခန့်မှန်းထားသည်။

ထို့အပြင် ပခုက္ကူမြို့တွင် ၃၄ စင်တီမီတာ၊ ညောင်ဦးမြို့တွင် ၅၁ စင်တီမီတာ စိုးရိမ်ရေမှတ်အထက် ရောက်ရှိနေပြီး နှစ်မြို့လုံးတွင် လာမည့်တစ်ရက်အတွင်း မြစ်ရေ ၂၀ စင်တီမီတာခန့် ထပ်မံမြင့်တက်နိုင် ကြောင်း သိရသည်။

ချင်းတွင်းမြစ်ရေမှာလည်း မုံရွာမြို့တွင် စိုးရိမ်ရေမှတ်အထက် ၈ စင်တီမီတာ ရောက်ရှိနေသော်လည်း လာမည့်တစ်ရက်အတွင်း စိုးရိမ်ရေမှတ်အောက်သို့ ပြန်လည်ကျဆင်းနိုင်ကြောင်း ခန့်မှန်းထားသည်။

အလားတူ သံလွင်မြစ်ရေသည် ဘားအံမြို့တွင် စိုးရိမ်ရေမှတ်အထက် ၈၀ စင်တီမီတာ ကျော်လွန်နေပြီး လာမည့်တစ်ရက်အတွင်း ၁၀ စင်တီမီတာခန့် ထပ်မံမြင့်တက်နိုင် ကြောင်း သိရသည်။

စစ်တောင်းမြစ်ရေမှာ မဒေါက်မြို့တွင် ၁၈ စင်တီမီတာ စိုးရိမ်ရေမှတ်အထက် ရောက်ရှိနေပြီး လာမည့်တစ်ရက်အတွင်း ၅ စင်တီမီတာခန့် ကျဆင်းနိုင်သော်လည်း စိုးရိမ်ရေမှတ်အထက်တွင် ဆက်လက်တည်ရှိနိုင်သည်။

ထို့ပြင် ဒုဋ္ဌဝတီမြစ်ရေသည် မြစ်ငယ်မြို့တွင် စိုးရိမ်ရေမှတ်အထက် ၁၁၆ စင်တီမီတာ အထိ ကျော်လွန်ရောက်ရှိနေပြီး လာမည့်တစ်ရက်အတွင်း ၂၀ စင်တီမီတာခန့် ကျဆင်းနိုင်သော်လည်း စိုးရိမ်ရေမှတ်အထက်တွင် ဆက်လက်ရှိနိုင်ကြောင်း ထုတ်ပြန်ချက်တွင် ဖော်ပြထားသည်။

သို့ဖြစ်ရာ မုံရွာမြို့နယ်အတွင်းရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများအနေဖြင့် အထူးသတိပြုနေထိုင်ရန် နှင့် မြင်းမူ၊ ပခုက္ကူ၊ ညောင်ဦး၊ ဘားအံ၊ မဒေါက်နှင့် မြစ်ငယ်မြို့များရှိ မြစ်ကမ်းအနီးနှင့် မြေနိမ့်ပိုင်းနေထိုင်သူများအနေဖြင့် ရေဘေးလွတ်ရာနေရာများသို့ ကြိုတင်ရှောင်ရှားကြရန် သက်ဆိုင်ရာက သတိပေးနှိုးဆော်ထားသည်။

လက်ရှိအခြေအနေတွင် မြစ်ရေမြင့်တက်မှု ဆက်လက်ဖြစ်ပေါ်နိုင်သည့် မြို့များရှိ မြစ်ကမ်းအနီးနှင့် မြေနိမ့်ပိုင်းဒေသများတွင် နေထိုင်သူများအနေဖြင့် ရေကြီးရေလျှံမှုအခြေအနေများကို အမြဲမပြတ် စောင့်ကြည့်ပြီး လိုအပ်ပါက လုံခြုံသည့်နေရာများသို့ အချိန်မီ ရွှေ့ပြောင်းနိုင်ရန် ကြိုတင်ပြင်ဆင်ထားရန် လိုအပ်သည်။