မျောက်ကျောက်ကိုဟန့်တားနိုင်ရန် နိုင်ငံခြားသားများနှင့်ထိတွေ့ဆက်ဆံခြင်းမပြုဖို့ တရုတ်ကျန်းမာရေးအကြီးတန်းအရာရှိသတိပေး
ပေကျင်း၊စက်တင်ဘာ ၁၉
တရုတ်ပြည်မကြီး၌ ပထမဆုံးမျောက်ကျောက်ဖြစ်ပွားမှုတွေ့ရှိပြီးနောက်ရောဂါကူးစက်နိုင်ခြေကို ကာကွယ်ရန်အတွက် နိုင်ငံခြားဧည့်သည်များနှင့် ရုပ်ပိုင်းဆိုင်ရာထိတွေ့ခြင်းမှ ရှောင်ကြဉ်ရန် တရုတ်အကြီးတန်း ကျန်းမာရေးအရာရှိတစ်ဦးက စက်တင်ဘာ ၁၆ ရက် သောကြာနေ့ကအကြံပြုထားသည်။
“မျောက်ကျောက်ရောဂါကူးစက်မှုကို ကာကွယ်ရန်နှင့် ကျန်းမာသောဘဝနေထိုင်မှုပုံစံအတွက် နိုင်ငံခြားသားများနှင့် တိုက်ရိုက်ထိတွေ့ခြင်းမပြုရန် အကြံပြုအပ်ပါသည်” ဟု တရုတ်ရောဂါထိန်းချုပ်ရေးနှင့် ကာကွယ်ရေးဗဟိုဌာနမှ ကူးစက်ရောဂါဆိုင်ရာဆေးမှုးချုပ် Wu Zunyou က ၎င်း၏တရားဝင် Weibo စာမျက်နှာတွင် စနေနေ့ကရေးသားဖော်ပြခဲ့သည်။
လွန်ခဲ့သည့်သုံးပတ်အတွင်း နိုင်ငံခြားသို့ရောက်ဖူးသူများအပြင် “သူစိမ်းများ” နှင့် “အရေပြားချင်း ထိတွေ့မှု” ကို ရှောင်ကြဉ်ရန်လည်း Wu ကသတိပေးထားသည်။
၎င်း၏ပို့စ်ကို ဆိုရှယ်မီဒီယာတွင် ကျယ်ကျယ်ပြန့်ပြန့် မျှဝေခဲ့ကြသော်လည်း မူလပို့စ်အောက်ရှိ ကွန်မန့်ပေးမှုအား တနင်္ဂနွေနှင့် ပေကျင်း၌ တနင်္လာနေ့အစောပိုင်းတို့ကပိတ်ထားခဲ့သည်ကိုတွေ့ရှိရသည်။
၎င်းပို့စ်၏ ထပ်ဆင့်ဝေမျှသူများ (သို့) စခရင်ရှော့ဗားရှင်းများတွင် မှတ်ချက်ပေးသူအချို့က တရုတ်နိုင်ငံရှိ နိုင်ငံခြားသားအများစုသည်ကိုဗစ်ကြောင့် နိုင်ငံတွင်း၌ရေရှည်နေထိုင်လျက်ရှိကြသဖြင့် ၎င်းတို့သည်ဒေသခံများထက် ပိုအန္တရာယ်ရှိသည်မှာမှန်ရဲ့လားဟု စောဒကတက်ခဲ့ကြသည်။
တရုတ်နိုင်ငံအနောက်တောင်ပိုင်း ချန်ချင်းမြို့၌ နိုင်ငံခြားမှရောက်ရှိလာသော လူတစ်ဦးတွင် မျောက်ကျောက်ရောဂါကူးစက်ခံရပြီး တရုတ်ပြည်မကြီး၏ ပထမဆုံးသော မျောက်ကျောက်ကူးစက်မှုဖြစ်လာခဲ့သည်။
အဆိုပါလူနာအား ချန်ချင်းသို့ရောက်ရှိချိန်ကတည်းက သီးခြားခွဲထားလိုက်နိုင်ခြင်းကြောင့် ကူးစက်နိုင်ခြေနည်းပါးကြောင်း မြူနီစီပယ်ကျန်းမာရေးကော်မရှင်၏ ထုတ်ပြန်ချက်တွင် ဖော်ပြထားသည်။၎င်း၏ အနီးကပ်အဆက်အသွယ်အားလုံးကိုလည်း သီးခြားခွဲထားပြီး ဆေးဘက်ဆိုင်ရာ စောင့်ကြည့်မှုအောက်တွင်ထားရှိခဲ့သည်ဟုဖော်ပြထားသည်။
Source -Reuters/ec