နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ ဇူလိုင် ၃ ရက်က နေပြည်တော်၌ ကျင်းပသည့် နိုင်ငံတကာမူပိုင်ခွင့်ညီလာခံ ၂၀၂၅ တွင် ပြောကြားခဲ့ခြင်းဖြစ်သည်။
နိုင်ငံတစ်နိုင်ငံ၏ စီးပွားရေးနှင့်လူနေမှုအဆင့် အတန်းမြင့်မားမှုသည် ကဏ္ဍအလိုက် ဆန်းသစ်တီထွင်ဖန်တီးနိုင်မှု၊ နိုင်ငံအတွင်းရှိ အသေးစား၊ အငယ်စားနှင့် အလတ်စားစီးပွားရေးလုပ်ငန်းများဖွံ့ဖြိုးတိုး တက်လာမှု၊ နိုင်ငံခြားရင်းနှီးမြှုပ် နှံမှုနှင့် ကုန်စည်စီးဆင်းမှုများပြားလာမှုအချက်များအပေါ်တွင်မူတည်လျက်ရှိသည်ဟုပြော သည်။
” အထူးသဖြင့် နိုင်ငံခြားကုန်သွယ်မှု၊ နိုင်ငံခြားရင်း နှီးမြှုပ်နှံမှု၊ သိပ္ပံနှင့်နည်းပညာပူးပေါင်းဆောင်ရွက်မှုနယ်ပယ်တွေမှာ မူပိုင်ခွင့်ကိစ္စဟာ ပိုမိုကျယ်ပြန့်လာပြီး မရှိမဖြစ်လိုအပ်ချက်တစ်ခုဖြစ်တာကိုတွေ့ရှိရပါတယ်။ ဒါ့ကြောင့် နိုင်ငံတော်ကို ခေတ်မီဖွံ့ဖြိုးတိုးတက်တဲ့ နိုင်ငံတော်အဖြစ်တည်ဆောက်ရာမှာ ခိုင်မာတောင့်တင်းတဲ့ မူပိုင်ခွင့်စနစ်တည်ရှိနေခြင်းဟာ စက်မှုဖွံ့ဖြိုးတိုးတက်ရေး၊ နိုင်ငံခြားရင်းနှီးမြှုပ်နှံမှုတွေမြင့်မားလာစေရေးတို့အတွက် များစွာအထောက်အကူပြုစေမှာဖြစ်ပါတယ်”ဟု နစက ဥက္ကဋ္ဌက ပြောသည်။
မူပိုင်ခွင့်ဥပဒေ(၄)မျိုးဖြစ်သည့် ကုန်အမှတ်တံ ဆိပ်မူပိုင်ခွင့်ဥပဒေ၊ စက်မှုဒီဇိုင်းမူပိုင်ခွင့်ဥပဒေ၊ တီထွင်မှု မူပိုင်ခွင့်ဥပဒေနှင့် စာပေနှင့် အနုပညာမူပိုင်ခွင့်ဥပဒေများကို ၂၀၁၉ ခုနှစ်အတွင်း၌ အတည်ပြုပြဋ္ဌာန်းခဲ့သည်။
ထို့ပြင် ကုန်အမှတ်တံဆိပ်မူပိုင်ခွင့်ဥပဒေ၊ စက်မှုဒီ ဇိုင်းမူပိုင်ခွင့်ဥပဒေနှင့် စာပေနှင့် အနုပညာမူပိုင်ခွင့်ဥပဒေများသည် ၂၀၂၃ ခုနှစ်၊ တီထွင်မှု မူပိုင်ခွင့်ဥပဒေသည် ၂၀၂၄ ခုနှစ်တို့အာဏာတည်ခဲ့ပြီး အထူးဥပဒေ(Special Law)များအနေဖြင့် အကောင်အထည်ဖော်ဆောင်ရွက်လျက်ရှိသည်ဟု နစက ဥက္ကဋ္ဌက ပြောကြားခဲ့သည်။
ဆန်းသစ်တီထွင်မှုနှင့် ဖန်တီးမှုများမြင့်မားတိုးတက်လာစေရန် တက္ကသိုလ်များ၊ သုတေသနဌာနများနှင့် MSME လုပ်ငန်းရှင်များကြား ချိတ်ဆက်ပေးမည့် ဂေဟစနစ်တစ်ရပ်ကိုဆောင်ရွက်ရန်လိုအပ်သည်ဟု ပြောသည်။
” တက္ကသိုလ်တွေနဲ့ သုတေသနဌာနတွေက တီထွင်ဖန်တီးမှုတွေကို ဈေးကွက်မှာဖြန့်ဖြူးနိုင်စေဖို့အတွက် အသေးစား၊ အငယ်စားနှင့် အလတ်စား စီးပွားရေးလုပ်ငန်းရှင်တွေနဲ့ ချိတ်ဆက်ဆောင်ရွက်ခြင်းဟာလည်း စီးပွားရေးဖွံ့ဖြိုးတိုးတက်တဲ့ ကမ္ဘာ့နိုင်ငံအသီးသီးမှာ ကျင့်သုံးနေတဲ့ စနစ်တစ်ရပ်ဖြစ်တာကိုတွေ့ရပါတယ်။ ဒါ့ကြောင့် MSME ကဏ္ဍမှာ မူပိုင်ခွင့်အသုံးချမှုမြှင့်တင်နိုင်ရေးကို တွန်းအားပေး ဆောင်ရွက်ကြဖို့လိုပါတယ်”ဟု နစက ဥက္ကဋ္ဌက ပြောသည်။
ထို့ပြင် နိုင်ငံတကာမူပိုင်ခွင့်ညီလာခံမှတစ်ဆင့်ရရှိလာမည့် ဆွေးနွေးသုံးသပ်ချက်ရလဒ်ကောင်းများနှင့် လေ့လာတွေ့ရှိချက်များကို စီးပွားရေးဂေဟစနစ်ဖွံ့ဖြိုးတိုးတက်စေရေးအတွက် ခေတ်မီကောင်းမွန်သည့် မူပိုင်ခွင့်စနစ်တစ်ရပ်ဖွံ့ဖြိုးတိုးတက်လာစေရန်တွန်းအားတစ်ရပ်အဖြစ် အသုံးချရန်၊သက်ဆိုင်ရာအားလုံးကလည်း မိမိတို့၏ကဏ္ဍအလိုက် တာဝန်ခံဝန်ကြီးဌာနနှင့် ဟန်ချက်ညီစွာ ပူး ပေါင်းဆောင်ရွက်ပေးကြရန်လည်း နစက ဥက္ကဋ္ဌက မှာကြားခဲ့သည်။