၂၀၂၅ ခုနှစ်၊ တက္ကသိုလ်ဝင်စာမေးပွဲ ပြန်လည်ဖြေဆိုကြမည့် ကျောင်းသား၊ ကျောင်းသူများကို မုံရွာမြို့ရှိ စာသင်ကျောင်း (၂) ကျောင်းတွင် စခန်းသွင်းသင်ကြားလျက်ရှိကြောင်း သိရသည်။
မုံရွာမြို့ အမှတ်(၂) အခြေခံပညာ အထက်တန်းကျောင်းနှင့်အမှတ်(၂)အခြေခံပညာ အထက်တန်းကျောင်း(အလုံ)တို့တွင် ကျောင်းသား၊ ကျောင်းသူ (၃၅၄) ဦးကို စခန်းသွင်းသင်ကြားလျက်ရှိကြောင်း သိရသည်။
“စခန်းသွင်းစာသင်နေချိန်ကာလအတွင်း စိတ်အေးချမ်းသာ နေထိုင်စားသောက်တာတွေ လိုအပ်ချက်မရှိ ပြည့်စုံဖို့ တာဝန်ရှိသူတွေက ဝိုင်းဝန်းပူးပေါင်း ဆောင်ရွက်ပေးနေပါတယ်။သောက်သုံးရေ၊ လျှပ်စစ်မီးပျက်တောက်မှုမရှိစေဖို့၊ ကျန်းမာရေး စောင့်ရှောက်လုပ်ငန်းတွေပေးထားပြီးအိပ်ဆောင်၊ စားဆောင်၊ စာသင်ဆောင်သန့်ရှင်းသပ်ရပ်မှုရှိစေဖို့နဲ့ စာမေးပွဲဖြေဆိုနေချိန်ကာလအတွင်း လုံခြုံအေးချမ်းဖို့ တာဝန်ရှိသူတွေအနေနဲ့ အလေးထားဆောင်ရွက်ပေးလျက်ရှိပါတယ်။မုံရွာမြို့ တက္ကသိုလ်/ဒီဂရီကောလိပ် ဆရာ၊ ဆရာမ တွေကလည်း သင်ကြားပေးနေပါတယ်” ဟု မုံရွာမြို့နယ်ပညာရေးမှူးက ပြောသည်။
စစ်ကိုင်းတိုင်းဒေသကြီး အစိုးရအဖွဲ့ ဝန်ကြီးချုပ်ဦးမြတ်ကျော်က စခန်းသွင်းသင်ကြားနေချိန်ကာလ အတွင်း ဆရာ၊ဆရာမများနှင့် ကျောင်းသား၊ကျောင်းသူများအတွက် ငွေကျပ် သိန်း (၁၀၀၀) နှင့် ကျောင်းသား၊ကျောင်းသူ (၄၅၄) ဦး အတွက် ကျောင်းသုံးပုံနှိပ်စာအုပ်များ၊ ဗလာစာအုပ်များနှင့် စာရေးကိရိယာများကို ဧပြီ (၂၈) ရက်က ပေးအပ်ခဲ့ပြီးဖြစ်ကြောင်း သိရသည်။
မုံရွာမြို့နယ်အတွင်းရှိ အမှတ်(၂)အခြေခံပညာအထက်တန်းကျောင်းတွင် စခန်းသွင်း ကျောင်းသား၊ ကျောင်းသူ (၁၇၀) ဦး နှင့် အမှတ်(၂)အခြေခံပညာအထက်တန်းကျောင်း(အလုံ) တွင် စခန်းသွင်း ကျောင်းသား၊ ကျောင်းသူ (၁၈၄) ဦးရှိကြောင်း သိရသည်။
၂၀၂၅ခုနှစ်၊ တက္ကသိုလ်စာမေးပွဲကို စစ်ကိုင်းတိုင်းဒေသကြီးအတွင်းရှိ မြို့နယ် (၂၁) မြို့နယ်ဖြေဆိုခဲ့ရာ ၂၀၂၅ ခုနှစ် မတ်လ (၂၈) ရက်တွင် ဖြစ်ပွားခဲ့သည့် အင်အားအလွန်ပြင်း ထန်သည့် မန္တလေးငလျင်ကြီးကြောင့် မန္တလေးတက္ကသိုလ်၌ အဖြေလွှာများ စာစစ်လုပ်ငန်းဆောင်ရွက်နေစဉ် မီးလောင်မှုဖြစ်ပွားခဲ့ရာ မုံရွာမြို့နယ် အပါအဝင်(၁၃)မြို့နယ် စာစစ်ဌာန (၂၅) ခုမှ ဘာသာစုံဖြေဆိုသူ ကျောင်းသား၊ကျောင်းသူ (၈၂ ၀၂) ဦး၏ တက္ကသိုလ်ဝင်တန်း အဖြေလွှာများ မီးလောင်ဆုံးရှုံးခဲ့ကြောင်း သိရသည်။