၂၀၂၄ ခုနှစ်(၁၃၈၅ ခုနှစ်) စစ်ကိုင်းတိုင်းဒေသကြီး မြန်မာ့ရိုးရာမဟာသင်္ကြန်ပွဲတော်ကို မုံရွာမြို့ကန်သာယာတွင် နိုင်ငံကျော်အနုပညာရှင်များဝန်းရံ၍ ဧပြီလ၁၃ရက် နံနက်ပိုင်းက ဖွင့်လှစ်လိုက်သည်။
သင်္ကြန်ပွဲတော်ဖွင့်ပွဲကို ကန်သာယာရှိ ဗဟိုမဏ္ဏပ်တွင်ကျင်းပရာ စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်က သင်္ကြန်ပွဲတော်ဖွင့်လှစ်လိုက်ကြောင်း စကားချွေပြီး နိုင်ငံကျော် ရုပ်ရှင်မင်းသားမင်းသမီးများခြံရံကာ စစ်ကိုင်းတိုင်းဒေသကြီးအစိုးရ တာဝန်ရှိသူများနှင့် ဝန်ကြီးချုပ်တို့ကဖဲကြိုးဖြတ်ဖွင့်လှစ်ခဲ့ခြင်းဖြစ်သည်။
မုံရွာမြို့မဟာသင်္ကြန်ပွဲတော် ဖွင့်လှစ်အပြီးတွင် ယိမ်းအလှအကလှပျိုဖြူများက နိုင်ငံကျော်ရုပ်ရှင်မင်းသားမင်းသမီးများ၊နိုင်ငံကျော် အဆိုတော်များ သီဆိုမှုများဖြင့် ကပြဖျော်ဖြေကြသည်။
သင်္ကြန်ပွဲတော်ဖွင့်လှစ်ပြီးချိန်မှစ၍ မုံရွာကန်သာယာတွင်ရှိသော ဝန်ကြီးဌာနမဏ္ဏပ်များက သီဆိုကပြဖျော်ဖြေမှုများနှင့်အတူ စတုဒီသာ မဏ္ဍပ်များတွင် စားသောက်ဖွယ်ရာများ၊ အချိုရည်များ၊ အဖျော်ယမကာများဖြင့် ဧည့်ခံကျွေးမွေးလျက်ရှိသည်။
မုံရွာမြို့မဟာသင်္ကြန်ပွဲတော်တွင် နိုင်ငံကျော် အနုပညာရှင်များဖြစ်သော နေအောင်၊ စိုးသူ၊ ရန်အောင်၊ ရဲအောင်၊ ခန့်စည်သူ၊ မင်းခန့်ထည်၊ မေသဥ္ဇာဦး၊ ကုဋာခင်၊ မေ့ချစ်သက်၊ တင်နီလာစိုး၊ ချိမ့်စန္ဒီလတ်၊ ချော၊ စနိုး၊ အင်ကြင်းမြင့်မြတ်၊ မိုးပြည့်သက်ချယ်၊ မိုးဖူးဖူးခင်၊ မိုးပြည့်ပြည့်ခင်တို့ကဖျော်ဖြေတင်ဆက်လျက်ရှိသည်။
မုံရွာမြို့ကန်သာယာတွင်မြန်မာ့ရိုးရာမဟာသင်္ကြန်ပွဲတော်တွင် ကျန်းမာရေးဆေးကုအဖွဲ့က ပွဲတော်ကွင်းအတွင်းအချိန်ပြည့်တာဝန်ယူစောင့်ရှောက်ပေးနေသလို မီးသတ်တပ်ဖွဲ့ဝင်များနှင့် လူမှုကူညီရေးအသင်းဝင်များကလည်း လိုအပ်သော လူမှုကူညီမှုများကို အချိန်ပြည့်တာဝန်ယူဆောင်ရွက်ပေးလျက်ရှိသည်။
