မိုးဦးကာလတွင် မြိတ်ဒေသထွက် ငါးခြောက်၊ ပုစွန်ခြောက်နှင့် ငါးပိစျေးနှုန်းများ မြင့်တက်

တနင်္သာရီတိုင်းဒေသကြီး၊ မြိတ်ဒေသထွက် ငါးခြောက်၊ ပုစွန်ခြောက်နှင့် ငါးပိစျေးနှုန်းများသည် မိုးဦးကာလတွင် စျေးနှုန်းများမြင့်တက်လျက်ရှိကြောင်း ဒေသခံများမှ သိရသည်။

သို့သော် ငါးသားပေါက်ရာသီနှင့် မိုးဦးကာလဖြစ်သည့်အတွက် ပင်လယ်ငါးဖမ်းလုပ်ငန်းများနှင့် ကျွန်းခရီးသွားလုပ်ငန်းများမှာ ခေတ္တရပ်နားထားရပြီး ပင်လယ်ထွက်ကုန်ရရှိမှု နည်းပါးလျက်ရှိသည်။

ထို့အပြင် မိုးများသည့်ဒေသဖြစ်သည့်အတွက် စိုစွတ်မှုများကာ နေရောင်ခြည်ရရှိမှုနည်းပါးသဖြင့် ငါးခြောက်၊ ပုစွန်ခြောက်နှင့် ငါးပိထုတ်လုပ်ရေးလုပ်ငန်းများတွင် အခက်အခဲများဖြစ်ပေါ်လျက်ရှိပြီး လုပ်ငန်းအနည်းငယ်သာ လုပ်ကိုင်နိုင်ကြောင်း သိရသည်။

ယင်းအခြေအနေများကြောင့် မြိတ်မြို့ပေါ်ရှိ စည်ပင်သာယာစျေးကြီးများတွင် ရောင်းချလျက်ရှိသော ငါးခြောက်၊ ပုစွန်ခြောက်နှင့် ငါးပိစျေးနှုန်းများမှာ ယခုနှစ် ဇွန်လပထမအပတ်အတွင်း စျေးမြင့်တက်လျက်ရှိကြောင်း သိရသည်။

လက်ရှိစျေးနှုန်းများအရ ငါးအူမျှင်းခြောက်(အူကြီးခြောက်) တစ်ပိဿာလျှင် ကျပ် ၉၀,၀၀၀၊ ငါးရောင်ခြောက်(ဇလုံးခြောက်) တစ်ပိဿာလျှင် ကျပ် ၆၀,၀၀၀၊ smart ဝိုင်းခြောက်(ငါးလိပ်ကျောက်) တစ်ပိဿာလျှင် ကျပ် ၁၂၀,၀၀၀၊ ငါးတံခွန်ခြောက် တစ်ပိဿာလျှင် ကျပ် ၃၀,၀၀၀၊ အာပြဲခြောက် တစ်ပိဿာလျှင် ကျပ် ၅၀,၀၀၀ နှင့် ရေကြည်ငယ်ခွဲခြောက် တစ်ပိဿာလျှင် ကျပ် ၆၀,၀၀၀ဖြင့် ရောင်းချလျက်ရှိသည်။

ထို့ပြင် ပုစွန်ခြောက်စျေးနှုန်းများမှာ အကောင်သေးတစ်ပိဿာလျှင် ကျပ် ၉၀,၀၀၀ မှ ၁၀၀,၀၀၀၊ အလတ်ဆိုဒ်တစ်ပိဿာလျှင် ကျပ် ၁၂၀,၀၀၀ မှ ၁၃၀,၀၀၀ နှင့် အကောင်ကြီးတစ်ပိဿာလျှင် ကျပ် ၁၆၀,၀၀၀ မှ ၁၈၀,၀၀၀အထိ ရောင်းချလျက်ရှိကြောင်း သိရသည်။

ငါးပိစျေးနှုန်းများအနေဖြင့် ရိုးရိုးငါးပိတစ်ပိဿာလျှင် ကျပ် ၁၃,၀၀၀ နှင့် မျှင်ငါးပိ(ဂွေးငပိ) ရှယ်တစ်ပိဿာလျှင် ကျပ် ၁၈,၀၀၀ဖြင့် ရောင်းချလျက်ရှိပြီး ဒေသတွင်းသာမက ရန်ကုန်၊ မန္တလေးနှင့် အခြားဒေသများသို့လည်း တင်ပို့ရောင်းချလျက်ရှိကြောင်း သိရသည်။

ဒေသခံလုပ်ငန်းရှင်များ၏ ပြောကြားချက်အရ မိုးကာလအတွင်း ပင်လယ်ထွက်ကုန်ရရှိမှု ပိုမိုနည်းပါးလာနိုင်သည့်အတွက် ငါးခြောက်၊ ပုစွန်ခြောက်နှင့် ငါးပိစျေးနှုန်းများ ဆက်လက်မြင့်တက်နိုင်ကြောင်း သိရသည်။

တနင်္သာရီတိုင်းဒေသကြီး၊ မြိတ်ခရိုင်သည် တောင်ကုန်းတောင်တန်းများ ပေါများပြီး ပင်လယ်နှင့်နီးကပ်စွာတည်ရှိသည့် ဒေသဖြစ်ရာ ရှေးယခင်ကတည်းက ဥယျာဥ်ခြံမြေစိုက်ပျိုးရေးနှင့် ပင်လယ်ရေလုပ်ငန်းများကို အဓိကအသက်မွေးဝမ်းကျောင်းအဖြစ် လုပ်ကိုင်လျက်ရှိသည်။

မြိတ်ဒေသတွင် ဒူးရင်း၊ မင်းဂွတ်၊ ကြက်မောက်၊ နာနက်၊ ရေငန်း၊ ဓနိ၊ အုန်း၊ ကွမ်းရွက်၊ သင်္ဘောပင်နှင့် အခြားဟင်းသီးဟင်းရွက်များ စိုက်ပျိုးလျက်ရှိသကဲ့သို့ ကွမ်းသီး၊ ရာဘာ၊ သီဟိုဠ်၊ ဆီအုန်းနှင့် ဆေးဖက်ဝင်ကမ်းဇော်ပင်များကိုလည်း စီးပွားဖြစ် စိုက်ပျိုးထုတ်လုပ်လျက်ရှိကြောင်း သိရသည်။

ထို့ပြင် ပင်လယ်နှင့်နီးစပ်သည့် ဒေသဖြစ်သည့်အတွက် ပုလဲ၊ ပုစွန်၊ ကမာ၊ ဂဏ္ဏန်းနှင့် ငါးအမျိုးမျိုးအပါအဝင် ပင်လယ်ထွက်ကုန်များစွာ ထွက်ရှိလျက်ရှိပြီး ယခုအခါ ပုစွန်နှင့် ဂဏ္ဏန်းပျော့ မွေးမြူရေးလုပ်ငန်းများကိုလည်း အကောင်အထည်ဖော် ဆောင်ရွက်လျက်ရှိကြောင်း သိရသည်။

ဒေသထွက်ကုန်များကို ဒေသတွင်းစားသုံးမှုအပြင် ရန်ကုန်၊ မန္တလေးနှင့် မွန်ပြည်နယ်များသို့ အဓိကတင်ပို့ရောင်းချလျက်ရှိပြီး ပြည်ပသို့လည်း တင်ပို့လျက်ရှိရာ ဒေသခံပြည်သူများအတွက် အလုပ်အကိုင်အခွင့်အလမ်းများနှင့် ဝင်ငွေတိုးတက်စေရန် အထောက်အကူပြုလျက်ရှိကြောင်းလည်း သိရသည်။

လက်ရှိကာလတွင် မြိတ်မြို့၌ ရာသီပေါ်သီးနှံများဖြစ်သည့် ဒူးရင်း၊ မင်းဂွတ်၊ ကြက်မောက်၊ ရေငန်းများအပြင် ဆေးဖက်ဝင်ကမ်းဇော်သီးများလည်း ရင့်မှည့်ကာ ကမ်းဇော်စေ့များ လှိုင်လှိုင်ထွက်ရှိလျက်ရှိပြီး အရောင်းအဝယ်သွက်လျက်ရှိကြောင်း သိရသည်။