အချိန်ကြာမြင့်စွာ မိုးသည်းထန်စွာ ရွာသွန်းမှုကြောင့် စစ်ကိုင်းတိုင်းဒေသကြီး မုံရွာမြို့ မြဝတီရပ်ကွက်၊ အင်းရွာသစ်ရပ်ကွက်၊ ပြည်တော်သာရပ်ကွက်နှင့် ချမ်းမြဝတီရပ်ကွက်များရှိ နေအိမ်များ ရေဝင်မြုပ်လျက်ရှိကြောင်းသိရသည်။
မုံရွာမြို့တွင် မေလ (၂၃)ရက်မှ စတင်ကာ မိုးအနည်းငယ်စတင်ရွာသွန်းခဲ့ရာမှ မေလ (၂၅) ရက်တွင် မိုးသည်းသည်းမဲမဲ အချိန်ကြာမြင့်စွာ ရွာသွန်းပြီးနောက်ပိုင်း နေအိမ်များရှိရာရပ်ကွက်များအတွင်း ရေဝင်ရောက်ခဲ့ခြင်းဖြစ်ကြောင်း သိရသည်။
“မေလ(၂၅)ရက် နေ့လယ် (၃) နာရီလောက်မှာ ရေဝင်ချလာတာ။ မြန်မြန်တိုးလာတာ (၆) နာရီလောက်မှာ ရေက အများကြီးဖြစ်လာတယ်။ အရင်နှစ်တွေက တစ်ခါမှ မရောက်ဖူးတဲ့ ရေအမြင့်ထိရောက်တယ်။ ခါတိုင်းမနှစ်က ရောက်ဖူးတာထက် (၅) လက်မလောက်ပိုတယ်။ (၂၅) ရက် ညပိုင်းကစတန့်ပြီး ညနက်တော့ တဖြည်းဖြည်း ရေကျတာ (၅)လက်မလောက်ကျတယ်။ (၂၅) ညက တစ်ညလုံးမိုးသည်းတာမှ ဆက်တိုက်ပဲ”ဟု မုံရွာမြို့ ရေဝင်ရပ်ကွက်နေသူက ပြောသည်။
ကပ္ပလီ ပင်လယ်ပြင်နှင့် ဘင်္ဂလားပင်လယ်အော်များတွင်လေထုမငြိမ်မသက်မှုများ ဖြစ်ပေါ်လာနိုင်ပြီး မုတ်သုံလေ အားကောင်းနေခြင်းများနှင့် အပူပျံတက်တိမ်များ ဖြစ်ထွန်းမှု အားကောင်းခြင်းများကြောင့် မေ (၂၅) ရက် ညနေမှ ဇွန် (၂)ရက်အထိ နိုင်ငံတစ်ဝန်းတွင် မိုးထစ်ချုန်းရွာပြီး မိုးကြီးနိုင်သည်ဟု မိုးလေဝသနှင့် ဇလဗေဒညွှန်ကြားမှု ဦးစီးဌာနက မေလ (၂၅) ရက် ညနေ (၆) နာရီက ထုတ်ပြန်ထားသည်။
နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်းဒေသကြီးတွေနှင့် ကချင်၊ ကယား၊ ကရင်၊ ချင်း၊ မွန်၊ ရခိုင်နှင့်ရှမ်းပြည်နယ်များတွင် နေရာစိပ်စိပ်မှ နေရာအနှံ့အပြား မိုးထစ်ချုန်းရွာပြီး အချို့ဒေသများတွင် နေရာကွက်ပြီး မိုးကြီးနိုင်သည်ဟု ထုတ်ပြန်ချက်တွင် ဖော်ပြထားသည်။