ပြီးခဲ့သည့် ဇွန်လအတွက် ပြည်ပ၌ အလုပ်လုပ်ကိုင်နေသူများမှ မိသားစုထံ လွှဲပို့ငွေ ရရှိမှုအထောက် အထားတင်ပြရန် အေဂျင် (၁၀၀) နီးပါးကျန်ရှိနေသေးကြောင်း အလုပ်သမားဝန်ကြီးဌာန၊ Safe Migration က ထုတ်ပြန်ထားသည်။
အဆိုပါ အေဂျင်စီများအနေဖြင့် အချိန်မီ ပေးပို့ခြင်းမရှိပါက Demand Letter အသစ်တင်ပြခွင့် ဆိုင်းငံ့ခြင်းခံရမည့်အပြင် ဒဏ်ကြေးပါ ပေးဆာင်ရမည်ဖြစ်ကြောင်း သိရသည်။
ဇွန်လအတွက် မိသားစုလွှဲပို့ငွေ ရရှိမှုအထောက်အထားတင်ပြရန် ကျန်ရှိသည့် အေဂျင်စီများအနေဖြင့် ဇူလိုင်လ (၁၀) ရက် နောက်ဆုံးထားပြီး သတ်မှတ်ထားသည့် မေးလ်မှတဆင့် အချိန်မီပေးပို့ရမည်ဖြစ်ကြောင်း အသိပေးထားသည်။
” မိသားစု လွှဲပို့ငွေတင်ပြဖို့ဆိုတာ တကယ်တော့ မလွယ်ကူဘူး။ အခက်အခဲတွေအများကြီးရှိတယ်။ များသောအားဖြင့်အလုပ်သမားတွေက သူ့နည်းသူ့ဟန်နဲ့ လွှဲကြတာများတယ်။ အလုပ်သမားကို မစေလွှတ်ခင် အလုပ်ရှင်အလုပ်သမား စာချုပ်ချုပ်တဲ့အခါ အဲဒီအချက်ကိုပါ တစ်ပါတည်းထည့်ချုပ်ရတာပေါ့” ဟု ပြည်ပအလုပ်အကိုင်ရှာဖွေအေဂျင်စီတစ်ခုမှ ပေါ်ပြူလာနယူးစ်သို့ ပြောသည်။
အလုပ်သမားဝန်ကြီးဌာန အနေဖြင့် ပြည်ပရောက် မြန်မာလုပ်သားများကို လစာ၏ (၂၅) ရာခိုင်နှုန်းအား မိသားစုဆီတရားဝင်လွှဲပို့ရန် ညွန်ကြားထားပြီးဖြစ်သည့်အတွက် အေဂျင်စီများအနေဖြင့် ယခုလို အလုပ်သမားများ ငွေလွှဲပို့ခြင်းကို ကြပ်မတ်ဆောင်ရွက်ပေးရခြင်း ဖြစ်သည်။