မသန်စွမ်းသူများကို အလုပ်အကိုင်အခွင့်အလမ်းများအပြင် သင်တန်းများကိုပါ ပို့ချသွားမည့် ‘မျှတ’ အစီအစဉ်ကို အက်တမ် (ATOM) မှ မိတ်ဆက်ပေးခဲ့

အက်တမ် (ATOM) မှ မသန်စွမ်းသူများကို အလုပ်အကိုင်အခွင့်အလမ်းများပေးမည့် “မျှတ”အစီအစဉ်ကို မိတ်ဆက်ခဲ့ပြီး ယင်းအစီအစဉ်တွင်ပါဝင်ရန် တိုက်တွန်းထားသည်။

“မတူကွဲပြားတဲ့အရည်အချင်းတွေ ကိုယ်စီပိုင်ဆိုင်ထားတဲ့ မသန်စွမ်းသူတွေကလည်း အဓိပ္ပာယ်ပြည့်ဝတဲ့ လုပ်ငန်းခွင်တစ်ခုအဖြစ် ပြောင်းလဲနိုင်စွမ်းရှိတာကို ကျွန်တော်တို့အနေနဲ့ သေချာနားလည်ထားပြီး သူတို့ကို ပံ့ပိုးကူညီဖို့ဆိုတဲ့ ရည်ရွယ်ချက်နဲ့ ဒီအစီအစဥ်ကို စတင်ခဲ့တာပဲဖြစ်ပါတယ်။ မသန်စွမ်းသူတွေအားလုံး ဒီအစီအစဉ်မှာ ပါဝင်ကြဖို့ တိုက်တွန်းလိုပြီး သူတို့အနေနဲ့ အောင်မြင်မှုတွေ ရရှိပိုင်ဆိုင်နေကြတာကို မြင်တွေ့ရဖို့ကိုလည်း ကျွန်တော်တို့ မျှော်လင့်နေမိပါတယ်” ဟု အက်တမ် (ATOM) ၏ ဒုတိယအမှုဆောင်အရာရှိချုပ် ဦးဝင်းပိုင်ကျော် ကပြောကြားခဲ့သည်။

၂၀၂၃ ခုနှစ်၊ နိုဝင်ဘာလ (၁၄) ရက်နေ့တွင် မြန်မာနိုင်ငံ၏ အကောင်းဆုံး 4.5G VoLTE ဝန်ဆောင်မှု ပေးအပ်လျက်ရှိသည့် အက်တမ် (ATOM) သည် မသန်စွမ်းသူများကို အဓိပ္ပာယ်ပြည့်ဝသည့် လုပ်ငန်းခွင်အတွေ့အကြုံနှင့် သင်ကြားမှုများကို ထောက်ပံ့ပေးအပ်နိုင်ရန်ဆိုသည့်ရည်ရွယ်ချက်ဖြင့် ‘မျှတ’ အစီအစဉ်သစ်ကို စတင်မိတ်ဆက်လိုက်ကြောင်း ကြေညာခဲ့သည်။

အက်တမ် (ATOM) သည် လူတိုင်းသာတူညီမျှ ပါဝင်နိုင်သော လုပ်ငန်းခွင်ယဉ်ကျေးမှုနှင့် မြန်မာနိုင်ငံရှိ အကောင်းဆုံးလုပ်ငန်းခွင်တစ်ခုဖြစ်အောင် ကြိုးပမ်းအားထုတ်သွားမည်ဆိုသည့် ကတိကဝတ်များနှင့် လူမှုအကျိုးပြုလုပ်ငန်းများ ဆောင်ရွက်နေမှုများကို ထင်ဟပ်နေသော ယခုကဲ့သို့အစီအစဉ်ကိုစတင်သည့် နိုင်ငံတွင်း ပထမဦးဆုံးနှင့်တစ်ခုတည်းသော တယ်လီကွန်းကုမ္ပဏီတစ်ခုဖြစ်သည်။

‘မျှတ’ အစီအစဉ်တွင် ရွေးချယ်ခံရသည့်သူများသည် တန်ဖိုးရှိသော လုပ်ငန်းခွင်အတွေ့အကြုံများနှင့် အသက်မွေးဝမ်းကြောင်းကျွမ်းကျင်မှုများကို သင်ယူလေ့လာနိုင်မည့် (၂) လတာအလုပ်လုပ်ကိုင်ခွင့် (အစမ်းခန့်ကာလ) ရရှိမည်ဖြစ်ပြီး အဆိုပါ (၂) လတာ အစမ်းခန့်ကာလပြီးဆုံးချိန်တွင် စွမ်းဆောင်ရည်၊ အသက်မွေးဝမ်းကြောင်းရည်မှန်းချက်၊ စိတ်နေသဘောထားအပြင် လုပ်ငန်းလုပ်ကိုင်နိုင်စွမ်း၊ လုပ်ငန်းစွမ်းဆောင်ရည် အရည်အသွေးနှင့် ဗဟုသုတတို့အပေါ် မူတည်ပြီး (၁) နှစ်တာ အလုပ်လုပ်ကိုင်နိုင်မည့် ဝန်ထမ်းအဖြစ်သို့ ရောက်ရှိနိုင်ကြောင်း သိရသည်။

ယခုအစီအစဉ်ကာလတစ်လျှောက်တွင် ရွေးချယ်ခံရသူများအနေဖြင့် ဒစ်ဂျစ်တယ်ပိုင်းဆိုင်ရာ အသိပညာဗဟုသုတနှင့် ရုံးတွင်းသုံး မိုက်ခရိုဆော့ဖ် ဆော့ဖ်ဝဲများကိုလည်း အသုံးပြုနိုင်ရန် လိုအပ်သည့်အခြေခံကျွမ်းကျင်မှုများနှင့်ပတ်သက်ပြီး အကျယ်တဝင့် သင်ကြားပြသပေးသွားမည့်သင်တန်းများကို တက်ရောက်နိုင်မည်ဖြစ်ကြောင်း၊ ထို့အပြင် လုပ်ငန်းခွင်အတွင်း တန်းတူညီညွတ်မှုရှိစေရန် ရွေးချယ်ခံရသူများအားလုံးအတွက် အခြားဝန်ထမ်းများနှင့် ထပ်တူညီမျှသောလစာငွေကြေး၊ အကျိုးခံစားခွင့်များ ဖန်တီးလုပ်ဆောင်ပေးခြင်းဖြင့် လူတိုင်းသာတူညီမျှ ပါဝင်နိုင်သော လုပ်ငန်းခွင်ပတ်ဝန်းကျင်ကောင်းတစ်ခု ဖြစ်လာစေရန် အကောင်အထည်ဖော်ဆောင်ရွက်သွားမည်ဖြစ်ကြောင်း သိရသည်။

“လူသားတိုင်းမှာ အောင်မြင်မှုတွေကို ရရှိပိုင်ဆိုင်နိုင်ဖို့ အခွင့်အရေးတွေရှိသင့်တယ်လို့ ကျွန်တော်တို့ အက်တမ် (ATOM) က လက်ခံယုံကြည်ထားပါတယ်” ဟု အက်တမ် (ATOM) ၏ အမှုဆောင်အရာရှိချုပ် Mr. Muhammad Ziaullah Siddiqui က ပြောကြားခဲ့သည်။

အဆိုပါ ‘မျှတ’ အစီအစဉ်တွင် လူ့စွမ်းအားအရင်းအမြစ်ဆိုင်ရာ၊ ကော်ပိုရိတ်ကိစ္စရပ်များဆိုင်ရာ၊ စီးပွားရေးပိုင်းဆိုင်ရာနှင့် အမှုဆောင်အရာရှိချုပ်ရုံးပိုင်းဆိုင်ရာ အစရှိသည့် အက်တမ် (ATOM) ၏ သက်ဆိုင်ရာဌာနများ၌ လုပ်ဆောင်နိုင်မည့် အလုပ်အကိုင်အခွင့်အလမ်းများကို ပေးအပ်သွားမည်ဖြစ်ကြောင်း သိရသည်။

ထို့ပြင် ဧည့်ကြိုကောင်တာဝန်ထမ်း (Receptionist)၊ အသင်းအဖွဲ့တာဝန်ခံ (Team Coordinator)၊ ရုံးတွင်းအမှတ်တံဆိပ်ဆိုင်ရာနှင့် ပွဲစီစဉ်မှုများ (Internal Branding & Events)၊ လူမှုအကျိုးပြုလုပ်ငန်းများ ကူညီထောက်ပံ့ပေးမှု (CSR Support)၊ ရုံးတွင်းပြောဆိုဆက်သွယ်ရေး (Internal Communications) နှင့် ဒေတာဖြည့်သွင်းမှု (Data Entry) အစရှိသည့်နယ်ပယ်အသီးသီးတွင်လည်း အလုပ်အကိုင်အခွင့်အလမ်းများ ရရှိသွားမည်ဖြစ်ကာ ဖော်ပြပါအလုပ်အကိုင်ရာထူးများသည် ရန်ကုန်မြို့တွင်းရှိ အက်တမ် (ATOM) ရုံးချုပ်သို့ လာရောက်လုပ်ကိုင်ရမည်ဖြစ်ကြောင်း သိရသည်။

‘မျှတ’ အစီအစဉ်အတွက် လျှောက်လွှာများကို ၂၀၂၃ ခုနှစ်၊ နိုဝင်ဘာလ ၁၃ ရက်နေ့မှ ၂၀၂၃ ခုနှစ်၊ နိုဝင်ဘာလ ၃၀ ရက်နေ့အထိ နောက်ဆုံးထားလျှောက်ထားနိုင်ပြီး လျှောက်ထားသူများသည် ကိုယ်ရေးအကျဉ်းကို hr@atom.com.mm အီးမေးလ်မှတစ်ဆင့် ပေးပို့နိုင်သည့်အပြင် အက်တမ် (ATOM) ၏ အလုပ်အကိုင် ဝက်ဘ်ဆိုဒ်စာမျက်နှာနှင့် အက်တမ် (ATOM) ၏ Facebook လူမှုကွန်ရက်စာမျက်နှာ သို့မဟုတ် LinkedIn လူမှုကွန်ရက်စာမျက်နှာ သို့ ပေးပို့လျှောက်ထားနိုင်ကြောင်း သိရသည်။

‘မျှတ’ အစီအစဉ်လျှောက်ထားသူများအတွက် တစ်ခုတည်းသောလိုအပ်ချက်မှာ အင်္ဂလိပ်ဘာသာစကား အခြေခံတတ်ကျွမ်းရန်ဖြစ်ပြီး ပဏာမရွေးချယ်ခံရသူများသာ လူတွေ့မေးမြန်းခြင်းအဆင့်တွင် ပါဝင်နိုင်မည်ဖြစ်ကာ ယခု (၂) လတာ အလုပ်သင်အစီအစဉ်ကို နောက်ဆုံးရွေးချယ်ခံရသူ (၄) ဦးနှင့်အတူ ၂၀၂၄ ခုနှစ်၊ ဇန်နဝါရီလတွင် စတင်သွားမည်ဖြစ်ကြောင်း သိရသည်။