မလေးရှားနိုင်ငံ ဂျိုဟာပြည်နယ်၌ လေးရက်တာကာလအတွင်း မိုးစံချိန်တင်ရွာသွန်းခဲ့ပြီး အဆိုပါရွာသွန်းမှုသည် ၁၉၉၁ ခုနှစ်နောက်ပိုင်းကာလများအတွင်း အများဆုံးမိုးရေချိန်ဖြစ်ကြောင်းသိရသည်။ မိုးအဆက်မပြတ်ရွာသွန်းမှုကြောင့် ရေကြီးရေလျှံမှုလည်း ဆက်လက်မြင့်တက်လာကာ ရေဘေးရှောင်သူပေါင်း လေးသောင်းခွဲနီးပါးရှိလာပြီဟုသိရသည်။
ဂျိုဟာပြည်နယ်အာဏာပိုင်များ၏ပြောကြားချက်အရ မိသားစုပေါင်း တစ်သောင်းသုံးထောင်ခန့်သည် ခရိုင်ဆယ်ခုရှိ ရေဘေးကယ်ဆယ်ရေးယာယီစခန်း ၂၆၀ ၌ ရွှေ့ပြောင်းနေထိုင်နေကြရကြောင်းသိရသည်။အခြားပြည်နယ်အသီးသီး၌လည်း ရေဘေးဒဏ်အားဆိုးရွားစွာခံနေရကြောင်းပြောကြားခဲ့သည်။
ရေလျှံမှုကြောင့်လမ်းများလည်း ထက်ပိုင်းကျိုးကာ လမ်းပန်းဆက်သွယ်ရေးခက်ခဲကုန်သည်။ ကားအချို့သည်လည်းရေနစ်မြုပ်ကုန်ပြီး ယာဉ်မောင်းများအခက်တွေ့နေရသည်ကို ဓာတ်ပုံများ၌ဖော်ပြထားသည်။
မိသားစုပေါင်းများစွာသည်လည်း ဘေးကင်းရေးအတွက် နေရပ်စွန့်ခွာရှောင်တိမ်းရန်ပြင်ဆင်နေကြသည်ကို ပုံများ၌တွေ့မြင်နိုင်ပြီး အာဏာပိုင်များ၏ပြောကြားချက်အရ ဗုဒ္ဓဟူးနေ့မှစ၍ ယနေ့အထိသေဆုံးသူ လေးဦးခန့်ရှိလာပြီဖြစ်ကြောင်းလည်းသိရသည်။
ကျန်းမာရေးဝန်ကြီးဌာနအနေဖြင့်လည်း ရေကြီးပြီးနောက် နောက်ဆက်တွဲဖြစ်လေ့ရှိသည့် ရောဂါများနှင့်အစာအဆိပ်သင့်မှုများအပါအဝင် ရောဂါကြိုတင်ကာကွယ်ရေးအတွက်လည်း အဆင်သင့်ပြင်ဆင်စောင့်ကြည့်နေကြောင်းပြောကြားခဲ့သည်။
Source : CNA
