မန္တလေးတိုင်းဒေသကြီးတွင် အိမ်ဖောက်ထွင်းမှု၊ ဆိုင်ကယ်လုယူမှုများ မကြာခဏ ဖြစ်ပွားခြင်းမျိုးရှိနေသောကြောင့် လုယက်ခံနေရသည့် နေရာများ၌ လုံခြုံရေး စောင့်ရှောက်မှုပေးရန် လိုအပ်ကြောင်း မြို့ခံတချို့က မှတ်ချက်ပြုနေကြသည်။
“ရေတံခွန်တောင် လမ်းသစ်တို့၊ ၅၈/၁၃၉ ကြားတို့ဆို တစ်ယောက်တည်းသွားဖို့ စဉ်းစားရတယ်နော်၊ လုံခြုံရေးလှည့်ကင်းတွေက အဲလိုနေရာတွေကို အချိန်အပိုင်းအခြားနဲ့ပတ်ပေးနေရင်တော့ တမျိုးတဖုံပြောင်းနိုင်တယ်” ဟု မြို့ခံတစ်ဦးက ပြောသည်။
မန္တလေးမြို့တွင် မကြာခဏ ခိုးဆိုးလုယက်မှုများ ဖြစ်သည့် နေရာများသည် မန္တလေးတောင် အနီးဝန်းကျင်၊ သိပ္ပံလမ်းပေါ် (၆၆ လမ်း နှင့် ၇၃ လမ်းကြား)၊ ရေတံခွန်တောင်လမ်းသစ်၊ (၅၈) လမ်း(လမ်း ၁၁၀ မှ ၁၃၉ လမ်းကြား)၊ (၆၉) လ မ်းမှ (၇၃) လမ်း ကြားနှင့် (၁၀၁) လမ်းမှ (၃၅) လမ်းကြား စသည့် နေရာများ၌ ဖြစ်သည်။
ပြီးခဲ့သည့် ဩဂုတ်လအတွင်းက ချမ်းမြသာစည်မြို့နယ် (၄၉) လမ်းနှင့် လမ်း(၅၀) ကြား၊ (၁၁၀) E လမ်းပေါ်တွင် သားအမိသုံးဦး ဆိုင်ကယ် စီးလာစဉ် အိမ်အနီးမှာပင် ဓားရှည်ကိုင်အမျိုးသားနှစ်ဦး၏ လုယက်ခြင်းခံခဲ့ရသည့် CC TV မှ မြင်ကွင်းသည် လူမှုကွန်ရက်တွင် ထင်ရှားသည်။
ထိုနည်းတူ မန္တလေးမြို့ရှိ အိမ်တအိမ်ကို ဖောက်ထွင်းဝင်ရောက်ခဲ့သည့် သူခိုးက ဖုန်းများကို ခိုးယူကာ မဖွယ်မရာပြုလုပ်နေသည့် CCTV မြင်ကွင်းကြောင့်လည်း လုံခြုံရေးဆိုင်ရာ စိုးရိမ်မှုများ ပိုမိုရှိလာနေကြသည်။
ထို့ပြင် မြို့ရှောင်လမ်း ရေနီမြောင်းဘောင်တွင် အလုပ်မှပြန် လာသည့် သားအမိနှစ်ဦး၏ ဆိုင်ကယ်လုယူခံရခြင်း၊ ဖုန်းများ လုပြေးခြင်းများလည်း ဩဂုတ်လအတွင်းက ဖြစ်ပွားခဲ့သည်။
ထို့ကြောင့် မှုခင်း ဖြစ်ပွားတတ်သည့် နေရာအများစုကို လုံ ခြုံရေးပေးရန် မြို့ခံအချို့က မှတ်ချက်ပြုကြခြင်း ဖြစ်သ ည်။
ထိုကဲ့သို့ ဖြစ်စဉ်ကျူးလွန်သူများကို ဖြစ်စဉ်ဖြစ်ပွားပြီး ဖမ်းဆီးရမိခဲ့ခြင်း မျိုးရှိသော်လည်း တချို့ကိုမူ လက်ရှိအထိ ဖမ်းဆီးအရေးယူနိုင်ခြင်း မျိုးမရှိသေးကြောင်းလည်း သိရသည်။
သက်ဆိုင်ရာ ဒေသအာဏာပိုင်များနှင့် နီးစပ်သူအချို့ကမူ လုယက်မှု ဓားပြမှုများလျော့ကျစေရေးအတွက် စီစဉ်ဆောင်ရွက်နေပြီး လုံခြုံရေးတပ်ဖွဲ့ဝင်များ ပူးပေါင်းဆောင်ရွက်နေသည်ဟု မှတ်ချက်ပေးထားသည်။