နိုင်ငံအတွင်းမှာ အထွေထွေအကြပ်အတည်းဆိုက်ရောက်နေတဲ့ကာလအပြင် ငလျင်ဒဏ်ကြောင့် ပျ-က်စီးဆုံးရှုံးမှုတွေများခဲ့တဲ့ မန္တလေးမြို့မှာ “ပိုသူလှူ လိုသူကူ”ဆိုတဲ့ Food Box အစီအစဉ်တစ်ခု ပြန်လည်ထွက်ပေါ်လာပါတယ်။
ပြီးခဲ့တဲ့ ကိုဗစ်ကာလမတိုင်မီ ၂၀၁၉ ခုနှစ် ကာလတူလအတွင်း အများပြည်သူသွားလာရာ နေရာစုံမှာ Food Box အစီအစဉ်ကို လုပ်ဆောင်ခဲ့ကြပေမယ့် အကြောင်းအမျိုးမျိုးကြောင့် (၆)နှစ်ကြာကာလအတွင်း ခတ္တပျေ-ာက်ကွယ်ရာကနေ ပြန်လည် ထွက်ပေါ်လာတာဖြစ်ပါတယ်။
အခုလို ” ပိုသူလှူ လိုသူကူ”Food Box အစီအစဉ်ကို ပြန်လည်အသက်သွင်းလိုက်သူက မြန်မာနိုင်ငံမှာ ၂၀၁၉ ခုနှစ် ဇွန်လအတွင်းမှာ Food Box ကို စတင်ပုံဖော်ပေးခဲ့တဲ့ မန္တလေးမြို့သား ပရဟိတသမား ကိုဝမ်း (ခ)ဦးစိုင်းနေမျိုးမောင်မောင် ဖြစ်ပါတယ်။
“ဒီ Food Box ကိုကျွန်တော်စလုပ်ခဲ့တာပေါ့။ အခု ၂၀၂၅ ဇွန်လမှာ ခြောက်နှစ်ပြည့်ခဲ့တာပေါ့။ အခုကလည်း လိုသူတွေကူပြီး ပိုသူတွေနိုင်သလောက် လှူလို့ရအောင် ပြန်လုပ်တာပါ။ မရှိသူတွေအခက်အခဲဖြစ်သူတွေအတွက်ကူလာနိုင်အောင် ပြန်နှိုးဆော်လိုက်တဲ့သဘောပါ။” လို့ သူက ဆိုပါတယ်။
သူ့အနေနဲ့ ” ပိုသူလှူ လိုသူကူ” Food Box ကို လုပ်ချင်သူတွေအတွက် အကြံဉာဏ်ပေးတာတွေ ပူးပေါင်းလုပ်ဆောင်တာမျိုးတွေရှိမယ်ဆိုရင်လည်း ကြိုဆိုတယ်လို့လည်း ဆိုပါတယ်။
လတ်တလော မန္တလေးမြို့မှာ Food Box တွေကို အခြေအနေအရ အများပြည်သူသွားလာရာနေရာမျိုးစုံမှာ မထားနိုင်ပေမယ့် သူဈေးရောင်းချရာ မန္တလေးမြို့ ၄၂လမ်း ၆၇-Aထောင့်က ONE ONE Electric City ဆိုင်ရှေ့မှာပြန်လည်အသက်သွင်းလုပ် ဆောင်လာတာဖြစ်ပါတယ်။
တစ်ရက်ကို မနက်(၈)နာရီကနေ ည(၈) နာရီအထိ မုန့်မျိုးစုံအပြင် အချိုရည်ဘူးတွေကို ထားပေးရာမှာ လိုတဲ့လူ (၂၀) ကျော်လောက် လာယူစားသောက်ကြတာမျိုးရှိနေတယ်လို့ဆိုပါတယ်။
“ဒါကောင်းတဲ့အစီအစဉ်ပါ၊ အဆာပြေပေါ့။ ရှိတဲ့သူတွေရှိပေမယ့် မရှိတဲ့သူက အဆာပြေလေး စားဖို့တောင်မရှိတဲ့သူတွေအတွက် ဒါနတစ်ခုပေါ့။ ဒီလိုအစီအစဉ်များများထွက်လာရင်ကောင်းပါတယ်။ တစ်ခုက စည်းကမ်းရှိဖို့ပါဘဲ”လို့
မန္တလေးဒေသခံတစ်ဦးက ဆိုပါတယ်။
ငလျင်ဒဏ်ကြောင့် မန္တလေးမြို့မှာ လူတန်းစားအလွှာ အသီးသီးထိခို-က်ဆုံးရှုံးမှုတွေရှိတဲ့အပြင် စားသောက်ရေးခက်ခဲသူတွေအတွက် အဆာပြေစားသောက်နိုင်ဖို့ တောင်းရမ်းစရာမလိုဘဲ အဆင်သင့်ယူပြီး စားသောက်နိုင်တဲ့ ကာလဒါနအလှူတစ်ခုဖြစ်တယ်လို့ ကိုဝမ်း(ခ)ဦးစိုင်းနေမျိုးမောင်မောင်က ဆိုပါတယ်။