မကွေး တမာပိုးသတ်ဆေးစက်ရုံမှ တန်ဖိုးမြင့် ထုတ်ကုန် ၈ မျိုးခန့် ထုတ်လုပ်၍ ပြည်တွင်း/ပြည်ပ ဈေးကွက်သို့ တင်ပို့ရန် ပြင်ဆင်

မကွေး၊ စက်တင်ဘာ ၅

မကွေးတိုင်းဒေသကြီး၊ မကွေးမြို့ရှိ တမာပိုးသတ်ဆေးစက်ရုံမှ အညာဒေသထွက် တမာစေ့များကို အခြေခံ၍ တန်ဖိုးမြင့် ထုတ်ကုန် ၈ မျိုးခန့် ထုတ်လုပ်ကာ ပြည်တွင်း/ပြည်ပ ဈေးကွက်သို့ တင်ပို့ရောင်းချနိုင်ရေး ပြင်ဆင်လျက်ရှိကြောင်း သိရသည်။

အဆိုပါ စက်ရုံမှ တမာစေ့အခွံမှ သဘာဝဓာတ်မြေဩဇာ၊ တမာဆီကြမ်းမှ တမာပိုးသတ်ဆေးများ ထုတ်လုပ်လျက်ရှိသည့်အပြင် တန်ဖိုးမြင့် လူသုံးကုန်ပစ္စည်းများဖြစ်သည့် တမာလက်ဆေးဆပ်ပြာရည်၊ ခံတွင်းသန့်စင်ဆေးရည်၊ ကိုယ်တိုက်ဆပ်ပြာရည်နှင့် တမာယားနာပျောက်ဆေးတို့ကိုလည်း တိုးမြှင့်ထုတ်လုပ်ရန် စီစဉ်နေခြင်းဖြစ်သည်။

မကွေးတိုင်းဒေသကြီး စိုက်ပျိုးရေးဦးစီးဌာန ညွှန်ကြားရေးမှူး ဦးယဉ်ထွန်းက “စက်ရုံကို ၂၀၁၇ ကတည်းက စတင်တည်ထောင်ခဲ့တာပါ။ အဓိကကတော့ အညာဒေသမှာ တမာပင်တွေ ဖြစ်ထွန်းတာကို အခြေခံပြီး ဒေသတွင်း သဘာဝပိုးသတ်ဆေးနဲ့ မြေဩဇာတွေ ထုတ်လုပ်သုံးစွဲနိုင်ဖို့၊ ဒေသခံတွေ အလုပ်အကိုင်ရရှိဖို့၊ ဓာတုဗေဒပစ္စည်း သုံးစွဲမှု လျှော့ချပြီး သဘာဝပတ်ဝန်းကျင် ထိန်းသိမ်းနိုင်ဖို့နဲ့ နိုင်ငံခြားငွေ သုံးစွဲမှုကို လျှော့ချနိုင်ဖို့ ရည်ရွယ်တည်ထောင်ခဲ့တာ ဖြစ်ပါတယ်” ဟု ပြောကြားသည်။

လက်ရှိတွင် စက်ရုံကို BOT စနစ်ဖြင့် မြန်မာပိုးသတ်ဆေး ကုမ္ပဏီလီမိတက်သို့ နှစ် ၃၀ ငှားရမ်းထားပြီး မကွေး၊ နတ်မောက်နှင့် ကျောက်ပန်းတောင်း မြို့နယ်တို့မှ တမာစေ့ ကုန်ကြမ်းများကို ဝယ်ယူ၍ တမာယူရီးယား၊ နိမ်းကုတ်တက်ယူရီးယား ဓာတ်မြေဩဇာများနှင့် သဘာဝပိုးသတ်ဆေးများကို ထုတ်လုပ်ဖြန့်ဖြူးပေးလျက်ရှိသည်။
မကွေးတမာပိုးသတ်ဆေးစက်ရုံ တာဝန်ခံ ဦးချစ်မင်းသူက “လက်ရှိမှာတော့ တမာဆီကြမ်းကို တစ်နေ့ ၇၆ ပိဿာလောက် ထုတ်လုပ်နိုင်ပါတယ်။ ဈေးကွက်ထဲမှာတော့ တမာဇိုင်း (နိမ်းကုတ်တက်ယူရီးယား) မြေဩဇာကို လိုင်စင်ရရှိပြီး ရောင်းချနေပြီး ကျန်တဲ့ ထုတ်ကုန် ၈ မျိုးလောက်ကိုလည်း မှတ်ပုံတင်နဲ့ လိုင်စင်လျှောက်ထားဆဲ အဆင့်မှာ ရှိပါတယ်။ လိုင်စင်ရရှိတာနဲ့ ပြည်တွင်းတင်မကဘဲ ပြည်ပအထိ တင်ပို့ပြီး နိုင်ငံခြားငွေ ရရှိအောင် ဆောင်ရွက်သွားမှာပါ” ဟု ပြောသည်။

အဆိုပါ စက်ရုံကို မကွေး-နတ်မောက် လမ်းဘေး မြေ ၅ ဒသမ ၃၂ ဧကပေါ်တွင် ၂၀၁၁ ခုနှစ်ကတည်းက စတင်တည်ဆောက်ခဲ့ခြင်းဖြစ်ပြီး လက်ရှိတွင် ထုတ်ကုန်များ စာရင်းသွင်း မှတ်ပုံတင်ရေးနှင့် ပြည်ပတင်ပို့နိုင်ရေး လုပ်ငန်းများကို ဆက်လက် ဆောင်ရွက်လျက်ရှိကြောင်း သိရသည်။