ဖေဖော်ဝါရီ ၂၅
ဘန်ကောက်မြို့တွင် စွန့်ပစ်အမှိုက်များ၏ ထက်ဝက်နီးပါးသည် အစားအသောက်များ ပါဝင်နေသောကြောင့် အမှိုက်စီမံခန့်ခွဲမှုနှင့်ပတ်သတ်၍ ကြီးစွာသော အခက်အခဲများနှင့် ရင်ဆိုင်နေရသည်။
၂၀၂၃ ခုနှစ် အောက်တိုဘာလ ၁ ရက်မှ ၂၀၂၄ ခုနှစ် စက်တင်ဘာလ ၃၀ ရက်နေ့အထိ အာဏာပိုင်များသည် တစ်နေ့လျှင် ပျမ်းမျှ အမှိုက် တန်ချိန် ၉,၂၃၈ တန် သိမ်းဆည်းခဲ့ကြောင်း Bangkok Metropolitan Administration (BMA) ၏ ပတ်ဝန်းကျင်ထိန်းသိမ်းရေးဌာနမှ သိရသည်။
“သိမ်းဆည်းထားတဲ့ အမှိုက်ပမာဏစုစုပေါင်းရဲ့ ၄၉ ရာခိုင်နှုန်းကျော်က အစားအသောက်နဲ့ဆိုင်သော စွန့်ပစ်ပစ္စည်းတွေပါ” ဟု ဌာနမှ မစ္စတာ ပနွတ် အွန်တက်စ် က ပြောကြားခဲ့သည်။
ပြန်လည်အသုံးပြုမထားသော ပလတ်စတစ်များသည် စုစုပေါင်းအမှိုက်များ၏ ၁၈ ရာခိုင်နှုန်းခန့်ရှိပြီး ပြန်လည်အသုံးပြုခြင်းမရှိသော စက္ကူများသည် နေ့စဉ်အမှိုက်စွန့်ပစ်မှု၏ ၁၀ ရာခိုင်နှုန်းကို ရှိသည်ဟု အဆိုပါဌာနမှ သိရသည်။
ထိုင်းစားသောက်ဆိုင်လုပ်ငန်းရှင်များ အသင်းက စားသောက်ဆိုင်ကြီးများသည် တစ်နေ့လျှင် အမှိုက်တစ်တန်အထိ စွန့်ပစ်နိုင်သည်ဟု မှတ်ချက်ပြုထားသည်။
ထို့ကြောင့် စားသောက်ဆိုင်လုပ်ငန်းရှင်များအတွက် အမှိုက်များခွဲထုတ်ခြင်းကဲ့သို့သော ထိရောက်သော အမှိုက်စီမံခန့်ခွဲမှုစနစ်များကို အကောင်အထည်ဖော်မဖြစ်မနေကျင့်သုံးရန် အရေးကြီးကြောင်း သတင်းမှဖော်ပြသည်။
BMA က အမှိုက်သိမ်းခကို ဘတ် ၂၀ မှ ဘတ် ၆၀ သို့ မကြာမီ တိုးမြှင့်ရန် စီစဉ်နေကြောင်း မစ္စတာ ပနွတ် က ပြောသည်။
သို့သော်လည်း BMA တွင် မှတ်ပုံတင်ပြီး အမှိုက်ခွဲခြင်း ကမ်ပိန်းတွင် ပါဝင်သည့် အိမ်ထောင်စုများသည် ၎င်းတို့၏ လိုက်ပါကြိုးပမ်းအားထုတ်မှုများကို ဓာတ်ပုံရိုက်ပြီး BKK WASTE PAY မိုဘိုင်းအက်ပ်မှတစ်ဆင့် တင်ပြနိုင်သည်။ အဆိုပါအိမ်ထောင်စုများသည် အမှိုက်သိမ်းခ လစဉ်ကြေးကို ဘတ် ၂၀ ဖြင့်သာ ဆက်လက်ပေးဆောင်သွားနိုင်မည်ဖြစ်ကြောင်း မစ္စတာ ပနွတ် က ပြောခဲ့သည်။
တစ်ရက်လျှင် အမှိုက် ၂၀၀ ကီလိုဂရမ်ထက် ပိုစွန့်ပစ်သည့် ဈေးဝယ်စင်တာများကဲ့သို့ ကြီးမားသည့် အိမ်ရာများအတွက် BMA က အမှိုက်သိမ်းမှု ပမာဏကို ၂၀၀ ကီလိုဂရမ်လျှင် ဘတ် ၂,၀၀၀ မှ ၈,၀၀၀ ဘတ်အထိ တိုးမြှင့်ကောက်ခံမည်ဖြစ်သည်။
အိမ်သုံးအမှိုက်များ၏ ၄၀ ရာခိုင်နှုန်း သည် အစားအသောက်စွန့်ပစ်ပစ္စည်းများဖြစ်ပြီး ၄၀ ရာခိုင်နှုန်း သည် ပြန်လည်အသုံးပြုနိုင်သည့်အမှိုက်ဖြစ်ပြီး ၂၀ ရာခိုင်နှုန်း သည် ပြန်လည်အသုံးပြု၍မရသောအမှိုက် ဖြစ်ကြောင်း ၎င်းက ပြောခဲ့သည်။
Ref: ဘန်ကောက်ပို့စ်