အိန္ဒိယနိုင်ငံသည် ဘဏ္ဍာငွေပံ့ပိုးခြင်း၊ အဓိကသွင်းအားစုများအပေါ် အခွန်လျှော့ချခြင်းနှင့် ပြည်တွင်း၌ ထုတ်လုပ်ရန် မက်လုံးများပေးခြင်းဖြင့် လာမည့်နှစ်ဘတ်ဂျက်တွင် ၎င်း၏ အထည်အလိပ်နှင့် အထည်ချုပ်ကဏ္ဍကို မြှင့်တင်ဆောင်ရွက်သွားရန် ရည်ရွယ်ထားသည်ဟု အစိုးရသတင်းရင်းမြစ်နှစ်ခုက ပြောကြားခဲ့သည်။
အိမ်နီးချင်း ဘင်္ဂလားဒေ့ရှ်နိုင်ငံတွင် ဆက်လက်ဖြစ်ပွားနေသည့် နိုင်ငံရေးအကျပ်အတည်းကြောင့် ကမ္ဘာတစ်ဝန်းရှိ လက်ရှိရောင်းချသူများသည် အထည်ချုပ်တင်သွင်းမှုများအတွက် အိန္ဒိယအပါအဝင် အခြားရွေးချယ်စရာနေရာများကို ရှာဖွေရန် ဖြစ်စေခဲ့သည်ဟု ပို့ကုန်လုပ်ငန်းရှင်များက ရိုက်တာကို ပြောကြားခဲ့သည်။
“အမေရိကန်ကုမ္ပဏီတွေက အခြားအစားထိုးဖြည့်ဆည်းပေးနိုင်သူတွေကို ရှာဖွေနေတာကြောင့် ပြီးခဲ့တဲ့လအနည်းငယ်မှာ ပို့ကုန်အမှာတွေ အမြန်ပြည့်မီဖို့ အိန္ဒိယပို့ကုန်သမားတွေ ကြိုးစားနေကြရပါတယ်” ဟု အိန္ဒိယအထည်ချုပ်ပို့ကုန်မြှင့်တင်ရေးကောင်စီအထွေထွေအတွင်းရေးမှူး Mithileshwar Thakur က ပြောဆိုခဲ့သည်။
အိန္ဒိယနိုင်ငံ၏ အထည်အလိပ်ကဏ္ဍသည် ခန့်မှန်းခြေ လူ ၄၅ သန်းခန့်ကို အလုပ်ပေးထားပြီး အစိုးရသည် အထည်အလိပ်လုပ်ငန်းဝန်ကြီးဌာနအတွက် ဘတ်ဂျက်ခွဲဝေမှုကို လက်ရှိ ရူပီး ၄၄ ဒဿမ ၁၇ ဘီလျံ(ဒေါ်လာ ၅၁၁ သန်း) မှ ၂၀၂၅/၂၆ တွင် ၁၀ ရာခိုင်နှုန်းမှ ၁၅ ရာခိုင်နှုန်းအထိ တိုးမြှင့်သွားရန် အစိုးရက စဉ်းစားနေသည်ဟု အစိုးရသတင်းရင်းမြစ်တစ်ခုက ပြောသည်။
အစိုးရသည် အထည်အလိပ်ကဏ္ဍ၏ ထုတ်လုပ်မှုဆိုင်ရာ မက်လုံးပေးမှုများအတွက် ဘဏ္ဍာငွေခွဲဝေချထားပေးမှုကိုလည်း လက်ရှိဘဏ္ဍာနှစ်တွင် ရူပီးသန်း ၄၅၀ ရှိရာမှ သန်း ၆၀၀ ဝန်းကျင်တိုးမြှင့်ပေးနိုင်သည်ဟု သတင်းရင်းမြစ်က ပြောဆိုခဲ့သည်။
အဆိုပါအစီအစဉ်အရ အစိုးရသည် ပြည်တွင်း၌ ထုတ်လုပ်ရန် ရွေးချယ်သော ကုမ္ပဏီများကို အခွန်လျှော့ချခြင်း မက်လုံးများနှင့် လိုက်လျောမှုများပေးမည်ဖြစ်သည်။