ဟနွိုင်း၊ စက်တင်ဘာ ၉
ဗီယက်နမ်နှင့် မြန်မာနိုင်ငံတို့အကြား ကုန်သွယ်ရေး၊ ရင်းနှီးမြှုပ်နှံမှုနှင့် စီးပွားရေးပူးပေါင်းဆောင်ရွက်မှုများကို ပိုမိုမြှင့်တင်ကာ အာဆီယံတန်ဖိုးကွင်းဆက်သစ်များ (New ASEAN Value Chain Linkages) ဖော်ဆောင်သွားရန် ကုန်သည်စက်မှုအသင်းချုပ် (UMFCCI) ဥက္ကဋ္ဌ ဦးအေးဝင်းက တိုက်တွန်းပြောကြားသည်။
အဆိုပါ ပြောကြားချက်ကို စက်တင်ဘာ ၆ ရက် နံနက် ၁၀ နာရီတွင် ဟနွိုင်းမြို့ Melia Hotel ၌ ကျင်းပသည့် “ဗီယက်နမ်-မြန်မာ စီးပွားရေးဖိုရမ် ၂၀၂၆” တွင် ပြောကြားခဲ့ခြင်းဖြစ်သည်။
အဆိုပါဖိုရမ်သို့ မြန်မာနိုင်ငံ နိုင်ငံတော်သမ္မတ ဦးမင်းအောင်လှိုင်၊ ဗီယက်နမ်ဆိုရှယ်လစ်သမ္မတနိုင်ငံ၏ နိုင်ငံရေးဗျူရိုအဖွဲ့ဝင်နှင့် ဒုတိယဝန်ကြီးချုပ် မစ္စတာ ငိုရင်ဗန်သန် (Mr. Nguyen Van Thang) အပါအဝင် နှစ်နိုင်ငံအဆင့်မြင့်အရာရှိကြီးများ၊ စီးပွားရေးလုပ်ငန်းရှင်များနှင့် ဧည့်သည်တော်များ တက်ရောက်ခဲ့ကြသည်။
အဆိုပါဖိုရမ်သည် နှစ်နိုင်ငံစီးပွားရေးအသိုက်အဝန်းများအကြား အပြန်အလှန်နားလည်မှုနှင့် ယုံကြည်မှုများ ပိုမိုတိုးမြှင့်ပေးနိုင်မည့်အပြင် ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ အခွင့်အလမ်းအသစ်များကို ဖော်ဆောင်ပေးနိုင်မည်ဟု ယုံကြည်ကြောင်း ဦးအေးဝင်းက ဆိုသည်။
ဗီယက်နမ်နိုင်ငံအနေဖြင့် စက်မှုထုတ်လုပ်မှု၊ နည်းပညာနှင့် ပို့ကုန်ကဏ္ဍများတွင် တိုးတက်ဖွံ့ဖြိုးမှုအားကောင်းသည့် အားသာချက်များရှိသကဲ့သို့ မြန်မာနိုင်ငံတွင်လည်း မဟာဗျူဟာကျသည့် တည်နေရာ၊ သဘာဝအရင်းအမြစ်များ၊ စိုက်ပျိုးရေးနှင့် ကုန်ထုတ်လုပ်မှုဆိုင်ရာ လုပ်သားအင်အားများ ရှိနေကြောင်း ၎င်းက ဆိုသည်။
အထူးသဖြင့် မြန်မာနိုင်ငံ၏ စိုက်ပျိုးရေးနှင့် အစားအသောက်ထုတ်လုပ်ရေး၊ ဆန်၊ ပဲမျိုးစုံ၊ အပူပိုင်းသီးနှံများ၊ ရေထွက်ကုန်များ၊ ကော်ဖီနှင့် လက်ဖက်၊ အထည်ချုပ်လုပ်ငန်းများတွင် အလားအလာကောင်းများ ရှိနေကြောင်း သိရသည်။
ထိုအလားအလာများနှင့် ဗီယက်နမ်နိုင်ငံ၏ ခေတ်မီနည်းပညာ၊ ထောက်ပံ့ပို့ဆောင်ရေးဆိုင်ရာ ကျွမ်းကျင်မှုများနှင့် ကမ္ဘာ့ဈေးကွက်ထိုးဖောက်နိုင်မှု အားသာချက်များကို ပေါင်းစပ်နိုင်ပါက နှစ်နိုင်ငံစလုံးအတွက် အပြန်အလှန်အကျိုးဖြစ်ထွန်းစေမည့် စီးပွားရေးအခွင့်အလမ်းများ ဖန်တီးနိုင်မည်ဖြစ်ကြောင်း ၎င်းက ပြောကြားသည်။
ထို့အပြင် နှစ်နိုင်ငံအကြား ပို့ဆောင်ရေးနှင့် ကုန်သွယ်ရေးလမ်းကြောင်းများ ချောမွေ့စေရေး၊ ဘဏ္ဍာရေးနှင့် ငွေပေးချေမှုစနစ်များ ပိုမိုလွယ်ကူချောမွေ့စေရေးနှင့် ရင်းနှီးမြှုပ်နှံသူများအတွက် ခိုင်မာသည့် အကာအကွယ်ပေးနိုင်ရေးတို့သည် ပုဂ္ဂလိကကဏ္ဍ ဖွံ့ဖြိုးတိုးတက်ရေးအတွက် အရေးကြီးကြောင်းလည်း ထည့်သွင်းပြောကြားခဲ့သည်။
“အာဆီယံဒေသတွင်း စီးပွားရေးပေါင်းစည်းမှု (ASEAN Economic Integration) ကနေ နှစ်နိုင်ငံ စိုက်ပျိုးရေး၊ စက်မှုထုတ်လုပ်မှုနဲ့ ကုန်သွယ်ရေးကဏ္ဍတွေမှာ အာဆီယံတန်ဖိုးကွင်းဆက်သစ် ချိတ်ဆက်မှုတွေ (New ASEAN Value Chain Linkages) ကို တည်ဆောက်သွားနိုင်မယ်လို့ ယုံကြည်ပါတယ်” ဟု ဦးအေးဝင်းက ပြောကြားသည်။
ယင်းကဲ့သို့ အာဆီယံတန်ဖိုးကွင်းဆက်သစ်များ ဖော်ဆောင်ခြင်းမှတစ်ဆင့် ဗီယက်နမ်နှင့် မြန်မာနိုင်ငံတို့အကြား စီးပွားရေးပူးပေါင်းဆောင်ရွက်မှုများ ပိုမိုခိုင်မာလာပြီး နှစ်နိုင်ငံစီးပွားရေးဆက်ဆံရေးသမိုင်းတွင် စာမျက်နှာသစ်တစ်ရပ်ကို အတူတကွ ရေးထိုးနိုင်မည်ဟု မျှော်လင့်ကြောင်း ၎င်းက ပြောကြားခဲ့သည်။