သမ္မတကို လုပ်ကြံသတ်ဖြတ်ရန် ခြိမ်းခြောက်မှု နှင့် ပြည်သူ့ရန်ပုံငွေကို သန်းနှင့်ချီ၍ အလွဲသုံးစားလုပ်ခဲ့မှု တို့ဖြင့် ဖိလစ်ပိုင် ဒုတိယသမ္မတ ဆာရာဒူတာတေးကို အောက်လွှတ်တော်က စွပ်စွဲပြစ်တင်လိုက်ကြောင်း သိရသည်။ ဖေဖော်ဝါရီ ၁၂ ရက် ကြားဖြတ်ရွေးကောက်ပွဲအတွက် ကွန်ဂရက်လွှတ်တော် လေးလကြာ ရပ်နားမည့်အချိန်မတိုင်မီ မိနစ်ပိုင်းအလိုတွင် ယခုကဲ့သို့ မဲခွဲဆုံးဖြတ်လိုက်ခြင်းဖြစ်သည်။
ဖေဖော်ဝါရီ ၅ ရက်တွင် မစ္စဒူတာတေးအပေါ် စွပ်စွဲပြစ်တင်လိုက်ခြင်းသည် အောက်လွှတ်တော် အမတ်ဦးရေ ၃၀၀ ကျော်တွင် မဟာမိတ်အမတ်အများစုကို ပိုင်ဆိုင်ထားသည့် သူ၏ မဟာမိတ်ဟောင်း သမ္မတ ဖာဒီနန်မားကို့စ်ဂျူနီယာနှင့် အကွဲအပြဲပိုမိုပြင်းထန်လာမှုကို ပြနေသည်။ အောက်လွှတ်တော်ဥက္ကဌသည် သမ္မတ၏ ဝမ်းကို ညီအစ်ကိုဖြစ်သည်။
မားကို့စ်၏ သမ္မတရာထူးအပေါ် ဆန္ဒခံယူပွဲတစ်ခုဟု ရှုမြင်ကြသော မေလရွေးကောက်ပွဲအတွက် ဖေဖော်ဝါရီ ၁၁ ရက်တွင် စတင်မည့် မဲဆွယ်စည်းရုံးရေးကာလမတိုင်မီ ရက်သတ္တပတ်နီးပါးအလိုတွင် စွပ်စွဲပြစ်တင်ခြင်းဆိုင်ရာ မဲခွဲဆုံးဖြတ်မှုလုပ်ခဲ့ခြင်းလည်းဖြစ်သည်။
သို့သော်လည်း မစ္စဒူတာတေးသည် လက်ရှိတွင် ဒုတိယသမ္မတအဖြစ်ဆက်လက်ရပ်တည်နေပြီး စွပ်စွဲပြစ်တင်သည့် ပုဒ်မများကို အထက်လွှတ်တော်သို့ ပေးပို့ရဦးမည်ဖြစ်ကာ အထက်လွှတ်တော်သည် တရားစွဲဆိုမှုလုပ်ငန်းစဉ်အတွက် တရားရုံးအဖြစ် ဆောင်ရွက်မည်ဖြစ်သည်။
အထက်လွှတ်တော်အမတ် ၂၃ ဦးအနက် ၁၆ ဦးက သူ့ကို စွပ်စွဲပြစ်တင်သော ပြစ်ချက်များဖြင့် စွဲချက်တင်ရန် သဘောတူပါက မစ္စဒူတာတေးသည် ဒုတိယသမ္မတအဖြစ်မှ ဖယ်ရှားခံရမည်ဖြစ်သည်။
အတိမ်းအစောင်း မခံသော၊ သီးခြားသတ်မှတ်ထားသော ရည်ရွယ်ချက်များအတွက် သုံးစွဲရန် ဖြစ်သောရံပုံငွေများမှ ပီဆို ၆၁၂ ဒဿမ ၅ သန်းကို အလွဲသုံးစားလုပ်မှုဖြင့် မစ္စဒူတာတေးကို စွပ်စွဲပြစ်တင်ရန် စုစုပေါင်း အမတ်ဦးရေ ၂၁၅ ရှိ အောက်လွှတ်တော်က ဖေဖော်ဝါရီ ၅ ရက်တွင် မဲခွဲဆုံးဖြတ်ခဲ့ခြင်းဖြစ်သည်။
Ref: သည်စထရိတ်တိုင်းမ်စ်