ဖလမ်းမြို့ နေရပ်ပြန် ဒေသခံပြည်သူများအား နိုင်ငံတော်မှ ထောက်ပံ့မှု အခြေအနေများကို ဆောက်လုပ်ရေးဝန်ကြီးဌာန ဒုတိယဝန်ကြီးဦးမျိုးမြင့် ကွင်းဆင်းစစ်ဆေး

ဖလမ်း၊ ဇူလိုင် ၂၅
ချင်းပြည်နယ်၊ ဖလမ်းမြို့ ရပ်ကွက်များသို့ နေရပ်စွန့်ခွာ၍ ပြန်လည်ဝင်ရောက်လာသည့် ဒေသခံပြည်သူများ၏ နေအိမ်များသို့ ဆောက်လုပ်ရေးဝန်ကြီးဌာန ဒုတိယဝန်ကြီးဦးမျိုးမြင့်နှင့် တာဝန်ရှိသူများက ဇူလိုင် ၂၄ ရက်တွင် သွားရောက်ကြည့်ရှုခဲ့ကြောင်း သိရသည်။

ထိုသို့ ကွင်းဆင်းကြည့်ရှုစဉ် နိုင်ငံတော်မှ ထောက်ပံ့ပေးအပ်သည့် အခြေခံဆောက်လုပ်ရေးလုပ်ငန်းသုံး ပစ္စည်းများ၊ လူသုံးကုန်ပစ္စည်းများ၊ ကယ်ဆယ်ရေးပစ္စည်းများနှင့် စားရေရိက္ခာများ ဒေသခံများထံ အပြည့်အဝ ရရှိရေး လိုအပ်သည်များကို တာဝန်ရှိသူများနှင့် ပေါင်းစပ်ညှိနှိုင်း ဆောင်ရွက်ပေးခဲ့သည်။
ထို့ပြင် အကြမ်းဖက်ဖြစ်စဉ်များကြောင့် ထိခိုက်ပျက်စီးခဲ့သည့် နေအိမ်များကို ဒေသခံပြည်သူများက မိသားစုအလိုက် ဝိုင်းဝန်း ပြန်လည်ပြုပြင်နေမှုများကိုလည်း ကြည့်ရှုအားပေးခဲ့ကြောင်း သိရသည်။

ဒုတိယဝန်ကြီးနှင့်အဖွဲ့သည် ဖလမ်းမြို့၊ ဗိုလ်ချုပ်လမ်းတွင် ဆိုင်ခန်းများ ဖွင့်လှစ်ရောင်းချ နေမှုများကို ကြည့်ရှုကာ ကျန်းမာရေးနှင့် ညီညွတ်သော ပစ္စည်းများရောင်းချရန်နှင့် ဈေးနှုန်းချိုသာစွာ ရောင်းချရေး မှာကြားခဲ့သည်။ ထို့နောက် နေရပ်ပြန်ပြည်သူများ၏ နိုင်ငံသားစိစစ်ရေးကတ်ပြား ပြုလုပ်ပြီးစီးမှုအခြေအနေများကို မေးမြန်း၍ လိုအပ်သည်များကို ဖြည့်ဆည်းဆောင်ရွက်ပေးခဲ့ကြောင်း သိရသည်။

ဖလမ်းမြို့တွင် နေရပ်ပြန်လာသူများ ရှိလာပြီး စီးပွားရေးဆိုင်အချို့ ပြန်လည်ဖွင့်လှစ်နိုင်ခြင်းမှာ ဒေသပုံမှန်ခြေအနေသို့ ပြန်ရောက်ရန် အလားအလာတစ်ခု ဖြစ်သော်လည်း၊ ချင်းပြည်နယ်တစ်ခုလုံး၏ လမ်းပန်းဆက်သွယ်ရေး လုံခြုံမှုနှင့် ကုန်စည်စီးဆင်းမှု လွယ်ကူစောစွာ မရှိသေးသမျှ ကာလပတ်လုံး နေရပ်ပြန် ပြည်သူများအတွက် စားဝတ်နေရေးနှင့် အိမ်ပြန်လည်တည်ဆောက်ရေးမှာ အချိန်နှင့် စရိတ်စကများစွာ လိုအပ်နေဦးမည် ဖြစ်သဖြင့် အစိုးရအနေဖြင့် ယခုကဲ့သို့ အားထည့်လုပ်ဆောင်နေခြင်းလည်း ဖြစ်သည်။