ဝန်ကြီးချုပ် ပေတုံတန် ရှင်နာဝပ်ထရာနှင့် သူ့မိသားစုအပေါ် ကမ္ဘောဒီးယား၏ သြဇာကြီးသော ဝန်ကြီးချုပ်ဟောင်း ဟွန်ဆန်က မကြုံစဖူး လူသိရှင်ကြား တို-က်ခို-က်ခဲ့မှုကြောင့် အံ့သြမိကြောင်း ထိုင်းနိုင်ငံခြားရေးဝန်ကြီးဌာနက ပြောကြားလိုက်သည်။ သို့ရာတွင် နှစ်နိုင်ငံ အငြင်းပွားမှု မြင့်တက်နေခြင်းကို သံတမန်နည်းအရ ဖြေရှင်းရန် လိုအပ်သည်ဟု အလေးပေး ပြောကြားခဲ့သည်။
နှစ်နိုင်ငံအကြား နယ်နိမိတ်အငြင်းပွားမှုတွင် မစ္စပေတုံတန်၏ စိတ်လိုက်မာန်ပါ ကိုင်တွယ်ခဲ့ပုံအတွက် ကမ္ဘောဒီးယားဝါရင့် နိုင်ငံရေးသမားကြီး ဟွန်ဆန်က နှစ်နာရီကျော်ကြာသည့် ရုပ်သံမိန့်ခွန်းတွင် ပြစ်တင်ရှုတ်ချခဲ့သည်။
၂၀၂၃ ခုနှစ်တွင် သားဖြစ်သူကို ဝန်ကြီးချုပ်ရာထူး လွှဲမပေးခင်အထိ နိုင်ငံကို ဆယ်စုနှစ်လေးစု နီးပါးကြာ ဦးဆောင်ခဲ့သည့် ဟွန်ဆန်သည် မကြာသေးခင်ကအထိ သူ၏ ရင်းနှီးသော မဟာမိတ်ဖြစ်ခဲ့သော မစ္စပေတုံတန်၏ ဖခင် ဘီလျံနာသူဌေးကြီး သက်ဆင် ရှင်နာဝပ်ထရာကိုလည်း ဦးတည်တို-က်ခို-က်ခဲ့သည်။
“ဒါဟာ ကျွန်တော်တို့ကို အံ့အားသင့်စေပါတယ်။ သံတမန်စံနှုန်းတွေအရ ဒါက အတော်ထူးခြင်းနေပါတယ်” ဟု ထိုင်းနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ Nikorndej Balankura က ရိုက်တာကို ပြောကြားခဲ့သည်။
“ထိုင်းနိုင်ငံဟာ တံခါးတွေ အများကြီးဖွင့်ထားပါတယ်။ နောက်ပြီး ဒီမနက်ဖြစ်ပျက်ခဲ့တာတွေအပြီးမှာတောင် ဒီတံခါးတွေကို ဖွင့်ထားဆဲပါ” ဟု ၎င်းက ဆိုသည်။
လက်ရှိတွင် ကမ္ဘောဒီးယား အထက်လွှတ်တော်ဥက္ကဌသာ ဖြစ်သော်လည်း သြဇာကြီးမားဆဲဖြစ်သည့် ဟွန်ဆန်က မစ္စပေတုံတန်သည် သူနှင့် သားဖြစ်သူ ဝန်ကြီးချုပ် ဟွန်မာနက်ကို အထင်အမြင်သေးသည်ဟု စွပ်စွဲခဲ့သည်။
ဆေးရုံတက်ရောက်သည့် ကာလကို တရားဝင် ထောင်ဒဏ်ပြစ်ဒဏ်ကျခံခြင်းအဖြစ် သတ်မှတ်ခွင့်ရခဲ့မှုအတွက် အမှုရင်ဆိုင်နေရသော သက်ဆင်နှင့် ပတ်သက်၍ ဟွန်ဆင်က ပြောကြားရာတွင် ထိုင်းဝန်ကြီးဟောင်းသည် ရောဂါအတုအယောင်ဖြင့် အကြောင်းပြခဲ့သည်ဟု ဆိုသည်။
သက်ဆင်သည် ပဋိပက္ခများဖြစ်နေသည့် ယင်းနှစ်ပတ်တာကာလအတွင်း ထူးထူးခြားခြား နှုတ်ဆိတ်နေခဲ့ကာ ဟွန်ဆန်၏ စွပ်စွဲမှုများကို လူသိရှင်ကြား တုန့်ပြန်ခဲ့ခြင်း မရှိပေ။
Ref: ဘန်ကောက်ပို့စ်