ဖနောင်ပင်၊ဧပြီ ၂၄
ကမ္ဘောဒီးယားနှင့်ထိုင်းတို့သည် ကမ္ဘာလုံးတစ်ဝန်း၌ဖြစ်ပွါးနေသော ကုန်သွယ်ရေးပွတ်တိုက်မှုများရှိနေချိန်၌ ကုန်သွယ်ရေး ဆက်ဆံရေးကို တိုးမြှင့်ရန်သန္နိဋ္ဌာန်ချထားဆဲဖြစ်ကြောင်း ကမ္ဘောဒီးယား နိုင်ငံခြားရေးဝန်ကြီးဌာနက သတင်းစာရှင်းလင်းပွဲ၌ ပြောကြားခဲ့သည်။
ယခုကတိကဝတ်ကို ကမ္ဘောဒီးယားဝန်ကြီးချုပ်ဟွန်မာနက်နှင့် အလည်အပတ်ရောက်ရှိနေသော ထိုင်းဝန်ကြီးချုပ် ပေတုန်တန်တို့က ထပ်လောင်းကတိပြုခဲ့ကြခြင်းဖြစ်ကြောင်း သတင်းထုတ်ပြန်ချက်တွင် ဖော်ပြထားသည်။
“ဝန်ကြီးချုပ်နှစ်ဦးသည် လွန်ခဲ့သည့်နှစ်က ပထမဆုံးအကြိမ်အဖြစ် အမေရိကန်ဒေါ်လာ ၁၀ ဘီလျံကျော်ရရှိခဲ့သည့် စီးပွားရေးပူးပေါင်းဆောင်ရွက်မှု၌ သိသိသာသာတိုးတက်မှုကို ကျေနပ်အားရမိကြောင်းကိုလည်း မှတ်ချက်ပြုပြောကြားခဲ့ကြသည်” ဟုသတင်းထုတ်ပြန်ချက်တွင် ဖေါ်ပြထားသည်။
ထို့ပြင် ကုန်သွယ်ရေးဆက်ဆံရေးကို ပိုမိုတိုးတက်ကောင်းမွန်လာစေရန်အတွက် ယခုနှစ်အတွင်း သတ္တမအကြိမ်မြောက် ကမ္ဘောဒီးယား-ထိုင်း ပူးတွဲကုန်သွယ်ရေးကော်မတီအစည်းအဝေးကို ကျင်းပရန် နှစ်နိုင်ငံသက်ဆိုင်ရာအဖွဲ့အစည်းများအား တိုက်တွန်းအားပေးခဲ့ကြသည်။
ပေတုန်တန်နှင့်တွေ့ဆုံရာ၌ ကမ္ဘောဒီးယားအထက်လွှတ်တော် ဥက္ကဌဆမ်ဒက် တက်ခိုဟွန်ဆန်က တစ်ကမ္ဘာလုံး ကုန်သွယ်ရေးစစ်ပွဲဖြစ်ပွားနေချိန်တွင် အာဆီယံမူဘောင်များနှင့် ဒေသတွင်းဘက်စုံစီးပွားရေး ပူးပေါင်းဆောင်ရွက်မှု (RCEP) သဘောတူညီချက်အောက်ရှိ ယန္တရားများကိုအသုံးပြု၍ နှစ်နိုင်ငံ ကုန်သွယ်မှုပမာဏတိုးမြှင့်ရန်မရှိမဖြစ်လိုအပ်ကြောင်း ပြောကြားခဲ့သည်။
RCEP သည် ၂၀၂၂ ခုနှစ်က စတင်အာဏာတည်ခဲ့ပြီး အာဆီယံအဖွဲ့ဝင် ၁၀ နိုင်ငံဖြစ်သည့် ဘရူနိုင်း၊ ကမ္ဘောဒီးယား၊ အင်ဒိုနီးရှား၊ လာအို၊ မလေးရှား၊ မြန်မာ၊ ဖိလစ်ပိုင်၊ စင်္ကာပူ၊ ထိုင်းနှင့် ဗီယက်နမ်နိုင်ငံတို့နှင့် ၎င်းတို့၏ ကုန်သွယ်ဖက်ငါးနိုင်ငံဖြစ်သည့် တရုတ်၊ ဂျပန်၊ တောင်ကိုရီးယား၊ သြစတြေးလျနှင့် နူးဇီလန်တို့ပါဝင်သည် RCEP တွင်ပါဝင်သည်ဟု သိရသည်။
Source : ရှင်းဟွာ