ပြန်ပေးဆွဲခံရသည့် ကျောင်းအုပ်ဆရာနှင့် ဆရာမနှစ်ဦး မြန်မာနိုင်ငံသို့ ပြန်လည်ရောက်ရှိ
ပြန်ပေးဆွဲခံရသော ကျောင်းအုပ်ဆရာ ဦးဘိုဝင်းနှင့်ဆရာမဒေါ်ဥမ္မာကျော်တို့နှစ်ဦးသည် ယမန်နေ့ ဇွန်၂၃ ရက် ည၁၀ နာရီ မိနစ် ၅၀ အချိန်တွင် ဘဂ်လားဒေ့ရှ်နိုင်ငံမှ မြန်မာနိုင်ငံသို့ ပြန်လည်ရောက်ရှိခဲ့ပြီးဖြစ်ကြောင်း သိရသည်။
မြန်မာနိုင်ငံညှိနှိုင်းရေးအဖွဲ့က ဇွန် ၂၂ ရက်တွပြန်ပေးအဖွဲ့ထံ မြန်မာကျပ်ငွေ ၁၀၄၁သိန်းအား လွှဲပေးပြီးနောက် ၎င်းတို့နှစ်ဦးကို ဘင်္ဂလားဒေ့ရှ်နိုင်ငံ၊ တက္ကနပ်ဖ်မြို့နယ်၊ နီလာအုပ်စု၊ ခြံချောင်း (ခ)Kharang Khali ကျေးရွာအနီး၌ လာရောက်လွှတ်ပေးခဲ့ခြင်းဖြစ်သည်။
ထို့နောက် အဆိုပါ ကျောင်းဆရာနှင့်ဆရာမနှစ်ဦးမှာ ဇွန် ၂၃ရက် နံနက်ပိုင်းတွင် အဆိုပါ ကျေးရွာ ဘုန်းကြီးကျောင်းသို့ သွားရောက်အကူအညီတောင်းခဲ့ရာ ဆရာတော်မှ ၎င်းကျေးရွာနေ ဦးကျော်ကျော်၏ နေအိမ်၌ ခေတ္တနေထိုင်ရန်အပ်နှံပေးခဲ့ကြောင်း သိရသည်။
ယင်းနေ့ နေ့လည် ၁ နာရီအချိန်တွင် တက္ကနာဖ်ပ် မြို့နယ် ရဲစခန်းမှ ရဲတပ်ဖွဲ့ဝင်များ ရောက်ရှိလာပြီး ၎င်းတို့ ၂ ဦးအားခေါ်ဆောင်၍ တက္ကနာဖ်ပ်မြို့နယ်ရဲစခန်းသို့ ရောက်ရှိထိန်းသိမ်းထားကြောင်းနှင့်တရားဝင်လွှဲပြောင်းပေးနိုင်ရေး နှစ်နိုင်ငံနယ်ခြားစောင့်တပ်ဖွဲ့အချင်းချင်း ချိတ်ဆက်ဆောင်ရွက်ခဲ့ကြသည်။
ယင်းနောက် ဇွန် ၂၃ ရက် ည ၁၀ နာရီခွဲချိန်ခန့်တွင် မောင်တောမြို့နယ်၊တောင်ပြိုလက်ဝဲမြို့ရှိ မြန်မာ-ဘင်္ဂလားဒေ့ရှ်နှစ်နိုင်ငံ ချစ်ကြည်ရေးတံတားထိပ်၌ ကော့ဘဇားမြို့ အခြေစိုက် အမှတ် (၃၄) BGB တပ်ကိုယ်စားလှယ်အဖွဲ့ဝင် ၈ ဦးမှ မြန်မာနိုင်ငံနယ်ခြားစောင့်ရဲတပ်ဖွဲ့မှ ကိုယ်စားလှယ်အဖွဲ့ဝင် ၈ ဦးထံသို့လာရောက် လွှဲပြောင်းအပ်နှံခဲ့သည်။
နှစ်နိုင်ငံကိုယ်စားလှယ်ခေါင်းဆောင်များမှ စနစ်တကျလွှဲပြောင်းလက်ခံမှုများ ဆောင်ရွက်ခဲ့ရာ ည ၁၀ နာရီ ၅၀ မိနစ်ခန့်တွင်လွှဲပြောင်းလက်ခံမှုပြီးစီးခဲ့ပြီး မြန်မာနိုင်ငံနယ်ခြားစောင့်ရဲတပ်ဖွဲ့ ကိုယ်စားလှယ်အဖွဲ့ဝင် ၈ ဦးသည် ဆရာနှင့် ဆရာမတို့နှစ်ဦးအား မော်တော်ယာဉ်ဖြင့်ခေါ်ဆောင်၍ ချစ်ကြည်ရေးတံတားမှ ထွက်ခွာခဲ့ရာ ည ၁၀ နာရီ ၅၈ မိနစ်တွင် သက်ဆိုင်ရာဌာနရှိ ဘေးကင်းလုံခြုံရာနေရာသို့ ပြန်လည်ရောက်ရှိခဲ့ကြောင်း သိရှိရသည်။
