ဒိုဟာ၊ဇန်နဝါရီ ၃
ပြည်ပရောက်ဆီးရီးယားသမ္မတဟောင်း ဘာရှားအယ်လ်အာဆက်သည် အစိုးရပြိုကွဲပြီးကတည်းက မော်စကို၌ ခိုလှုံနေခြင်းဖြစ်ကာ ယခုအခါ ၎င်းအား အဆိပ်ခတ်လုပ်ကြံခဲ့သည်ဟူသောသတင်းများလည်းထွက်ပေါ်လာခဲ့သည်။
The Sun သတင်းဌာန၏အဆိုအရ အသက် ၅၉ နှစ်အရွယ်ရှိ အာဆက်သည် ပြီးခဲ့သည့် တနင်္ဂနွေနေ့က ၎င်းအနေဖြင့် အသက်ရှူရခက်ခဲသည်ဟုငြီးငြူခဲ့ပြီး အပြင်းအထန်ချောင်းဆိုးကာ ရင်ကြပ်သလိုဖြစ်လာသည်ဟုသိရသည်။
၎င်း၏အခြေအနေသည် ရုတ်ချည်းဆိုသလိုဆိုးရွားလာသဖြင့် နေထိုင်ရာတိုက်ခန်း၌ပင် ဆေးကုသမှုခံယူခဲ့ရပြီး ၎င်းခံစားရသည့်ဝေဒနာများတွင် ခေါင်းကိုက်ခြင်းနှင့်အစာအိမ်နာခြင်းများလည်းပါဝင်သည်ဟုသိရသည်။
ရုရှားထောက်လှမ်းရေးဟောင်းတစ်ဦးကဖွင့်ထားသည့် တယ်လီဂရမ်ချန်နယ်တစ်ခု၌မူ အာဆက်၏ကျန်းမာရေးစစ်ဆေးမှုရလဒ်များအရ အဆိပ်သင့်သည်ဟုစစ်ဆေးတွေ့ရှိရသည်ဟုဆိုထားပြီး လုပ်ကြံသတ်ဖြတ်ခြင်းမျိုးဖြစ်နိုင်သည်ဟုဆိုသော်လည်း ခိုင်မာသည့်သတင်းရင်းမြစ်များနှင့် ရုရှားအာဏာပိုင်များထံကအတည်ပြုထားခြင်းမျိုးမရှိသေးပေ။
မစ္စတာအာဆက်အား ၎င်းနေထိုင်ရာတိုက်ခန်း၌ပင် ဆေးကုသမှုခံယူစေခဲ့ရာ တနင်္လာနေ့တွင် ပြန်လည်ပြီးထူထူထောင်ထောင်ဖြစ်လာကြောင်းသိရပြီး အဆိပ်သင့်မှုဖြစ်ရသည့်အကြောင်းအရင်းကို စုံစမ်းစစ်ဆေးမှုများစတင်လုပ်ဆောင်နေသော်လည်း အသေးစိတ်အချက်အလက်များကို ထုတ်ဖော်ပြောကြားခြင်းမရှိသေးပေ။
Source : မော်ရိုကို