ရန်ကုန်၊ စက်တင်ဘာ ၁၁
ရန်ကုန်တိုင်းဒေသကြီး၊ သာကေတမြို့နယ်ရှိ ပြည်ထောင်စုတိုင်းရင်းသားကျေးရွာ (ရန်ကုန်) ကို အဆင့်မြှင့်တင်ဆောင်ရွက်ရန်အတွက် တာဝန်ရှိသူများနှင့် ပြည်တွင်း၊ ပြည်ပလုပ်ငန်းရှင်များ စက်တင်ဘာ ၁၀ ရက်က တွေ့ဆုံဆွေးနွေးခဲ့ကြောင်း သိရသည်။
တွေ့ဆုံပွဲတွင် ပြည်ထောင်စုတိုင်းရင်းသားကျေးရွာအတွင်းရှိ မြေနေရာအချို့နှင့် အဆောက်အအုံများကို နှစ်တို၊ နှစ်ရှည် ငှားရမ်း၍ လုပ်ငန်းများ ဆောင်ရွက်နိုင်ရန် စိတ်ဝင်စားမှုဖော်ပြခြင်း (Expression of Interest – EOI) လျှောက်ထားလိုသူများအား ဖိတ်ခေါ်ရှင်းလင်းခဲ့သည်။
ဒုတိယဝန်ကြီး ဦးစိုင်းထွန်းညိုက ပြည်ထောင်စုတိုင်းရင်းသားကျေးရွာ (ရန်ကုန်) ကို အဆင့်မြှင့်တင်ရန် ရည်ရွယ်၍ ယခုကဲ့သို့ ဆောင်ရွက်ခြင်းဖြစ်ပြီး လုပ်ငန်းရှင်များအနေဖြင့် နိုင်ငံတော်နှင့် အများပြည်သူအတွက် အကျိုးရှိစေမည့် လုပ်ငန်းအဆိုပြုချက်များကို ပွင့်လင်းစွာ ဆွေးနွေးတင်ပြကြရန် ပြောကြားခဲ့သည်။
တက်ရောက်လာသည့် တိုင်းရင်းသားလုပ်ငန်းရှင်များနှင့် ကုမ္ပဏီတာဝန်ရှိသူများကလည်း ကျေးရွာအတွင်း အများပြည်သူ စိတ်ဝင်စားမှု ပိုမိုရရှိလာစေရန်နှင့် စိတ်ချမ်းမြေ့စွာ လာရောက်အပန်းဖြေနိုင်စေရန် အကောင်အထည်ဖော်လိုသည့် လုပ်ငန်းအစီအစဉ်များကို ရှင်းလင်းတင်ပြခဲ့ကြသည်။
ပြည်ထောင်စုတိုင်းရင်းသားကျေးရွာ (ရန်ကုန်) ရှိ မြေနေရာနှင့် အဆောက်အအုံများ ငှားရမ်းလုပ်ကိုင်နိုင်ရေးအတွက် ပထမအဆင့် EOI လျှောက်လွှာများကို ၂၀၂၆ ခုနှစ် မေ ၂၅ ရက်မှစတင်၍ ဖိတ်ခေါ်ခဲ့ခြင်းဖြစ်ကြောင်း သိရသည်။