ပဲခူးတိုင်းအတွင်း မြို့နယ်အလိုက် ရာနှုန်းပြည့်ကျောင်းအပ်နှံရေးအတွက် ဇူလိုင်လကုန်အထိကျောင်းအပ်လက်ခံပေးသွားမည်ဟု ပဲခူးတိုင်းဝန် ကြီးချုပ်ဦးမျိုးဆွေဝင်းမှ ဇွန် ၄ ရက်နံနက်ပိုင်းကကျင်းပသည့် ၂၀၂၅-၂၀၂၆ ပညာသင်နှစ်ကျောင်းအပ်နှံမှု၊ ကျောင်းတက်ရောက်မှုတို့နှင့် ပတ်သက်၍ ခရိုင်/တိုင်းပညာရေးမှူးများနှင့် လုပ်ငန်းညှိနှိုင်းအစည်းအဝေးတွင် ပြောကြားခဲ့ခြင်း ဖြစ်သည်။
အနာဂတ်နိုင်ငံတော်အား ယနေ့လူငယ်များမှ ပုခုံးပြောင်းတာဝန်ယူကြရမည်ဖြစ်၍ ပညာရေးနှင့် စာတတ်မြောက်ရေးသည် နိုင်ငံတော်အတွက်အလွန်ရေးကြီးသည့် အခန်းကဏ္ဍတစ်ခုဖြစ်ရာ နိုင်ငံတော်အစိုးရမှ ကျောင်းနေရွယ်ကလေးအားလုံး အနည်းဆုံးမဖြစ်မနေ(KG+9)အထိ အခမဲ့ပညာသင်ကြားနိုင်ရန် ဘက်ပေါင်းစုံဖြည့်ဆည်းပေးလျက်ရှိသည်ဟု ပြောသည်။
” ပဲခူးတိုင်းအတွင်းမှာ မြို့နယ်အလိုက်ရာနှုန်းပြည့် ကျောင်းအပ်နှံနိုင်ဖို့အတွက် ဇူလိုင်လကုန်အထိကျောင်းအပ်လက်ခံပေးသွားပါမယ်။ အဲဒါကို အများပြည်သူကျယ်ကျယ်ပြန့်ပြန့်သိရှိစေဖို့ဆောင် ရွက်ရပါမယ်”ဟု တိုင်းဝန်ကြီးချုပ်ဦးမျိုးဆွေဝင်းက ပြောသည်။
ထို့ပြင် အသက်မွေးပညာရပ်များဖွင့်လှစ်သင်ကြားပေးနေသည့် စက်မှု၊ စိုက်ပျိုးရေးနှင့် မွေးမြူရေး အထက်တန်းကျောင်းများတွင်လည်း သင်ထောက်ကူပစ္စည်းများပြည်စုံစေရန် လိုအပ်သည်များကိုဖြည့်ဆည်းပေးရမည်ဖြစ်ပြီး ခရိုင်/မြို့နယ် ပညာရေးမှူးများအနေဖြင့် ကျေးရွာအဆင့်စာသင် ကျောင်းများအထိ ကွင်းဆင်းစစ်ဆေးမှုများပြုလုပ်ရမည်ဟု ပြောသည်။
ထို့နောက် ပြည်ခရိုင်၊ နတ်တလင်းခရိုင်၊ သာယာဝတီခရိုင်၊ တောင်ငူခရိုင်၊ ညောင်လေးပင်ခရိုင်နှင့် ပဲခူးခရိုင်တို့မှပညာရေးမှူးများက မြို့နယ်အလိုက် အခြေခံပညာကျောင်းများဖွင့်လှစ်ထားရှိမှု၊ ကျောင်းအပ်နှံနိုင်မှုနှင့်ကျောင်းတက်ရောက်နိုင်မှု၊ ပဲခူးတိုင်း (အနောက်)ပညာရေးမှူးနှင့် ပဲခူးတိုင်းပညာရေးမှူးတို့က နှစ်အလိုက်ကျောင်းအပ်နှံမှု၊ ကျောင်းတက်ရောက်မှုနှင့် တန်းစဉ်ကူးပြောင်းမှုတို့ကို ရှင်းလင်းတင်ပြခဲ့ကြသည်။