ရုရှားသမ္မတ ဗလာဒီမာပူတင်သည် အောက်တိုဘာလ ၁၅ ရက် နေ့တွင် ပထမဆုံးအကြိမ် ရုရှား-အာရပ် ထိပ်သီးအစည်းအဝေးပွဲကို ကျင်းပရန်အတွက် အာရပ်အဖွဲ့ချုပ် အတွင်းရေးမှူးချုပ်နှင့် အဖွဲ့ဝင်နိုင်ငံများမှ ခေါင်းဆောင်အားလုံးကို ဖိတ်ကြားခဲ့သည်ဟု ခရမ္မလင်၏ သတင်းထုတ်ပြန်ချက်ကို ကိုးကား၍ ရုရှားသတင်းဌာနများက စနေနေ့တွင် သတင်းရေးသားဖော်ပြခဲ့ကြသည်။
“ဒီအစည်းအဝေးဟာ ကျွန်တော်တို့နိုင်ငံတွေအကြား အပြန်အလှန် အကျိုးရှိသောဘက်စုံပူးပေါင်းဆောင်ရွက်မှုတွေ အားကောင်းစေမယ်ဆိုတာနဲ့ အရှေ့အလယ်ပိုင်းနဲ့ မြောက်အာဖရိကမှာ ငြိမ်းချမ်းရေး၊ လုံခြုံရေးနဲ့ တည်ငြိမ်ရေးအတွက် နည်းလမ်းရှာဖွေရာမှာ အထောက်အကူဖြစ်လိမ့်မယ်လို့ ကျွန်တော် ယုံကြည်ပါတယ်” ဟု သတင်းထုတ်ပြန်ချက်တွင် ပူတင်ကပြောကြားထားကြောင်း အင်တာဖက်စ်သတင်းဌာနက ဖော်ပြခဲ့သည်။
အရှေ့အလယ်ပိုင်းနှင့် အာဖရိကရှိ အာရပ်နိုင်ငံများဆိုင်ရာ ဒေသတွင်းအဖွဲ့အစည်းဖြစ်သော အာရပ်အဖွဲ့ချုပ်တွင် အဖွဲ့ဝင် ၂၂ နိုင်ငံပါဝင်ပြီး ဒေသတွင်း နိုင်ငံရေး၊ စီးပွားရေးနှင့် စစ်ရေးဆိုင်ရာ ကိစ္စရပ်များ၊ အခြားအကြောင်းကိစ္စများတွင် ပူးပေါင်းဆောင်ရွက်ရန် ကတိပြုထားကြသည်။
ယခုသီတင်းပတ်အတွင်း အမေရိကန်သမ္မတ ဒေါ်နယ်ထရမ့်ပ်၏ ပင်လယ်ကွေ့ဒေသသို့ လေးရက်ကြာ ခရီးစဉ်အပြီးတွင် ယခုသတင်းထွက်ပေါ်လာခြင်းဖြစ်သည်။ ထရမ့်ပ်၏ ခရီးစဉ်အတွင်း ဆော်ဒီအာရေဗျက အမေရိကန်ပြည်ထောင်စုတွင် ဒေါ်လာ ၆၀၀ ဘီလျံဖိုး ရင်းနှီးမြှုပ်နှံမည့် ကတိကဝတ်၊ ဒေါ်လာ ၁၄၂ ဘီလျံဖိုး လက်နက်ပစ္စည်းများ ဆော်ဒီသို့ ရောင်းချပေးရေးနှင့် ယူအေအီးနိုင်ငံနှင့် ဉာဏ်ရည်တု(AI) ဆိုင်ရာ ပူးပေါင်းဆောင်ရွက်မှုများ အပါအဝင် သဘောတူညီချက်များစွာကို ရရှိထားသည်ဟု ဝါရှင်တန်က ပြောကြားခဲ့သည်။
Ref: အာရပ်နူးစ်