ဂျပန်နိုင်ငံသည် ပထမဆုံး ကမ္ဘာ့အမှိုက်ကောက် အားကစားပြိုင်ပွဲ (SpoGomi World Cup) ကို ၂၀၂၃ ခုနှစ် နိုဝင်ဘာလတွင် အိမ်ရှင်အဖြစ် လက်ခံကျင်းပသွားမည်ဖြစ်ကြောင်း မကြာသေးမီက ကြေညာခဲ့သည်။
SpoGomi ဆိုသည်မှာ “Sport” အားကစား နှင့် “Gomi” အမှိုက်ဟု အဓိပ္ပာယ်ရသော ဂျပန်စကားလုံးတို့ကို ပေါင်းစပ်၍ အမည်ပေးထားသည့် အားကစားပြိုင်ပွဲဖြစ်ပြီး အဖွဲ့ဝင် ၃ ဦးမှ ၅ ဦးအထိ ပါဝင်သော အသင်းများက သတ်မှတ်ထားသောအချိန်အတွင်း အမှိုက်အများဆုံး ကောက်နိုင်ရန်အတွက် ယှဉ်ပြိုင်ရခြင်းဖြစ်သည်။
အဆိုပါ ကမ္ဘာ့အမှိုက်ကောက် အားကစားပြိုင်ပွဲကို တိုကျိုမြို့တွင် ကျင်းပမည်ဖြစ်ပြီး ကမ္ဘာတစ်ဝန်းမှ အသင်းအဖွဲ့များသည် တိုကျိုလမ်းများပေါ်ရှိ အမှိုက်သရိုက်များကို အပြိုင်အဆိုင် ရှင်းလင်းသိမ်းဆည်းရမည်ဖြစ်သည်။
တစ်သင်းလျှင် သုံးဦးစီ ပါဝင်ယှဉ်ပြိုင်နိုင်မည်ဖြစ်ပြီး သတ်မှတ်ထားသော နေရာများနှင့် လမ်းများပေါ်တွင် တတ်နိုင်သမျှ အမှိုက်များကို အများဆုံးရရှိအောင် ကောက်ယူသိမ်းဆည်းရမည်ဖြစ်သည်။
ထို့ပြင် အမှိုက်များကိုလည်း မီးရှို့ဖျက်ဆီးနိုင်သော အမှိုက်၊ ပြန်လည်အသုံးပြုနိုင်သော အမှိုက်နှင့် သတ္တုဗူးများ စသည်ဖြင့် အရောင်အလိုက် အမျိုးအစားခွဲထားသော အိတ်များထဲသို့ မှန်ကန်စွာ ခွဲထည့်ရပါမည်။
SpoGomi ကို ဂျပန်နိုင်ငံမှ စတင်တီထွင်ခဲ့ခြင်းဖြစ်ပြီး ၂၀၀၈ နှစ်မှစ၍ ဒေသတွင်းပြိုင်ပွဲများ ပြုလုပ်ကျင်းပခဲ့သည်။ သို့ရာတွင် အဆိုပါအားကစားသည် ကမ္ဘာတစ်ဝန်း အလွန်လျင်မြန်စွာ ပျံ့နှံသွားခဲ့ပြီး ယခုအခါ နှစ်စဉ်နှစ်တိုင်း ထိုပြိုင်ပွဲများကို ရာနှင်ချီ၍ ကျင်းပနေကြောင်း သိရသည်။
ပုံမှန်အားဖြင့် အနိုင်ရသည့်အဖွဲ့ကို ပွဲစီစဉ်သူများက အသိအမှတ်ပြုလက်မှတ် သို့မဟုတ် ဖလားနှင့် ဆုကြေးငွေ အနည်းငယ် ပေးသော်လည်း SpoGomi ပွဲများသည် ဆုငွေအတွက် ပြုလုပ်ခြင်းမဟုတ်ဘဲ သဘာဝပတ်ဝန်းကျင်ကို သန့်ရှင်းစေလိုခြင်းနှင့် အသင်းလိုက် တန်ဖိုးရှိသော အချိန်ကို ယှဉ်ပြိုင်ခြင်းဖြင့် ပိုင်ဆိုင်စေလိုခြင်းတို့ကို မျှော်မှန်း၍ ပြုလုပ်ခြင်း ဖြစ်သည်။
Source: Odditycentral
