ပညာရေးသည် အသိပညာပေးစွမ်းနိုင်ခြင်းသာမက စရိုက်လက္ခဏာပုံဖော်ပေးခြင်း၊ ဉာဏ်ပညာနိုးကြားလာစေခြင်းနှင့် ပြုစုပျိုးထောင်ပေးခြင်းတို့ဖြစ်သည်ဟု စစ်ကိုင်းတိုင်း၊ စစ်ကိုင်းတောင်ရိုးပေါ်ရှိ အပြည်ပြည်ဆိုင်ရာ ဗုဒ္ဓဘာသာပညာရေးစင်တာ(IBEC) နှင့် ကျွန်းလှဗုဒ္ဓတက္ကသိုလ်တို့အားတည်ထောင်သူ၊ IBEC-ဗုဒ္ဓတက္ကသိုလ်(မြန်မာ)၏ ပါမောက္ခချုပ်ဖြစ်တော်မူသည့် IBEC ဆရာတော်မှမိန့်ကြားခဲ့သည်။
ဖိလစ်ပိုင်နိုင်ငံ၊ မနီလာမြို့အခြေစိုက် Asian University International မှ IBEC ဆရာတော်အား သြဂုတ် ၁၆ ရက်ကပြုလုပ်သည့် ပညာရေးဆိုင်ရာစီမံခန့်ခွဲမှုဂုဏ်ထူးဆောင်ပါရဂူဘွဲ့ချီးမြှင့်အပ်နှင်းပွဲ၌ ဆရာတော်မှမိန့်ခွန်းပြောကြားရာတွင် ထည့်သွင်းမိန့်ကြားတော်မူခဲ့ခြင်းဖြစ်သည်။
ပညာရေးစီမံခန့်ခွဲမှု၏ အနှစ်သာရကိုပြန်လည်သုံးသပ်ကြည့်ရာတွင် အဖွဲ့အစည်းများကို ထိထိရောက်ရောက် စီမံအုပ်ချုပ်ခြင်း(သို့)လူ့စွမ်းအားအရင်းအမြစ်၊ ပညာရေးအရင်းအမြစ်များကို မဟာဗျူဟာမြောက် စီမံဆောင်ရွက်ခြင်းထက်ပိုသည်ဟု မိန့်ကြားတော်မူခဲ့သည်။
“အဓိကအားဖြင့် ဒါဟာလူတွေနဲ့ပတ်သက်ပါတယ်။ အိပ်မက်တွေကိုပြုစုပျိုးထောင်ပေးပြီး တန်ဖိုးရှိတဲ့နေရာတွေကို ဖန်တီးပေးတာ၊ သင်ယူသူတိုင်းဟာ အရေးပါကြောင်းနဲ့တန်ဖိုးထားခံရကြောင်းခံစားရ အောင်ဖန်တီးပေးတာမျိုးဖြစ်ပါတယ်။ ပညာရေးဆိုတာအသိပညာကိုပေးစွမ်းနိုင်ခြင်းအပြင် စရိုက်လက္ခဏာကိုပုံဖော်ပေးတာ၊ ဉာဏ်ပညာကိုနိုးကြားလာစေတာနဲ့ ပြုစုပျိုးထောင်ပေးတာဖြစ်တယ်ဆိုတာကို ဖော်ပြခြင်းဖြစ်ပါတယ်”ဟု IBEC ဆရာတော်ကမိန့်ကြားတော်မူခဲ့သည်။
အပြည်ပြည်ဆိုင်ရာဗုဒ္ဓဘာသာပညာရေးစင်တာ (IBEC)သည် အကြမ်းဖက်ပဋိပက္ခများကြောင့် ပညာရေးဆိုင်ရာ၊ ရုပ်ပိုင်းဆိုင်ရာ စိတ်ပိုင်းဆိုင်ရာထိခိုက်ရသော ကလေးများ၏ခိုလှုံရာနေရာအပြင် ပညာရေးကိုစဉ်ဆက်မပြတ်သင်ယူလေ့လာနိုင်သည့်နေရာများကိုလည်း ဖန်တီးဆောင်ရွက်ပေးနေကာ ပညာရေးအား ပဋိပက္ခအနှောင့်အယှက်များမှကာကွယ်ရန် အသိပညာပေးခြင်းများနှင့် ပူးပေါင်းပါဝင်မှုများလုပ်နိုင်ရန် ကြိုးပမ်းလုပ်ဆောင်ခဲ့သည်ဟု မိန့်ကြားတော်မူခဲ့သည်။
” လက်ရှိအချိန်မှာ IBEC ကျောင်းတော်ကြီးဟာ စစ်ကိုင်းတိုင်းအပြင် ချင်း၊ ကချင်နဲ့ ကရင်ပြည်နယ်တွေလိုမျိုး ပဋိပက္ခကြောင့် ကျောင်းတွေပျက်စီးသွားတဲ့ ပြည်နယ်တွေမှာရှိတဲ့ IBEC ရဲ့ ရပ်ရွာအခြေပြုဘုန်းတော်ကြီးသင်ပညာရေးကျောင်းတွေကနေ ကျောင်းသား၊ ကျောင်းသူ(၄,၀၀၀)ကျော်ကိုလက်ခံထားပါတယ်”ဟု IBEC ဆရာတော်က မိန့်ကြားတော်မူခဲ့သည်။
ထို့ပြင် အဆင့်မြင့်ပညာရေးအတွက် ကျွန်းလှဗုဒ္ဓတက္ကသိုလ်နှင့် IBEC ဗုဒ္ဓတက္ကသိုလ်တို့တွင် ဗုဒ္ဓ၏ ဓမ္မတရားများ၊ လူမှုသိပ္ပံဘာသာရပ်များတွင် ဝိဇ္ဇာဘွဲ့၊ မဟာဘွဲ့နှင့် ပါရဂူဘွဲ့အထိသင်ကြားပေးလျက်ရှိသည်ဟုလည်း IBEC ဆရာတော်က မိန့်ကြားတော်မူခဲ့သည်။