မန္တလေးတိုင်းဒေသကြီး၊ မြစ်သားမြို့နယ်၊ ပင်လယ်(မိုင်းမော) မြို့ဟောင်းတူးဖော်သုတေသန ဆောင်ရွက်ခြင်းမှ ဗုဒ္ဓဆင်းတုတော်တစ်ဆူ ထပ်မံတွေ့ရှိရကြောင်း ရှေးဟောင်းသုတေသနနှင့် အမျိုးသားပြတိုက်ဦးစီးဌာန၏ နိုဝင်ဘာ ၉ ရက် သတင်းထုတ်ပြန်ချက်အရ သိရသည်။
၂၀၂၃-၂၀၂၄ ဘဏ္ဍာရေးနှစ်တွင် မန္တလေးတိုင်းဒေသကြီး၊ ကျောက်ဆည်ခရိုင်၊ မြစ်သား မြို့နယ်အတွင်းရှိ ပင်လယ်(မိုင်းမော)ပျူမြို့ဟောင်း၏အပြင်ဘက်တွင်ရှိသော ကန်ဆွယ်ကျေးရွာ၏ အရှေ့တောင်ဘက်ရှိ တူးဖော်မှုကုန်းအမှတ်-၂၂(က)အား ၂၀၂၃ ခုနှစ် နိုဝင်ဘာလ ၄ ရက် ရက်နေ့မှစတင်၍ တူးဖော် သုတေသနပြုခြင်းကို ဆောင်ရွက်လျက်ရှိရာ နိုဝင်ဘာလ ၇ ရက်တွင် ကျင်းကွက် အမှတ်-D5၊ မြေပြင်အနက် ၂၈ စင်တီမီတာ(၁၁ လက်မ)၌ ဗုဒ္ဓဆင်းတုတော်တစ်ဆူကို တူးဖော်တွေ့ရှိခဲ့ကြောင်း သိရသည်။
တူးဖော်တွေ့ရှိသည့် ဆင်းတုတော်အား စနစ်တကျမှတ်တမ်းတင်ပြီးနောက် သန့်ရှင်းရေးဆောင်ရွက်ရာ
ဆင်းတုတော်၏ အတိုင်းအတာမှာ ဉာဏ်တော်(ဆံတော်ဖျားမှအောက်ခြေ ပလ္လင်အထိ) ၆.၅ စင်တီမီတာ၊ ဦးခေါင်းတော်လုံးပတ် ၄.၂ စင်တီမီတာ၊ ပုခုံးအကျယ် ၁.၈ စင်တီမီတာ၊ နားတော် ၀.၈ စင်တီမီတာ၊ ဒူးခွင်အကျယ် ၂.၂ စင်တီမီတာ၊ ပလ္လင်တော် အောက်ခြေအချင်း ၂.၇ စင်တီမီတာရှိပြီး အလေးချိန်အားဖြင့် ၀.၀၄၀ ကီလိုဂရမ်ရှိကြောင်း သိရသည်။
ဆင်းတုတော်ကို ငွေဟုယူဆရသော သတ္တုဖြင့်ပြုလုပ်ထားပြီး ညာလက်တော်သည် ညာဒူးတော်ပေါ်တွင်တင်နေဟန်ဖြစ်ကာ လက်ချောင်းတော်များအောက်တွင် ကြာပွင့်ပုံပါရှိပြီး ဘယ်လက်တော်မှာ အဘယမုဒြာဟန်နှင့် သင်္ကန်းစကိုကိုင်ထားသော စီဝရ ဟတ္ထမုဒြာဟန်ရှိကြောင်း၊ အဘယမုဒြာဟန်လက်ဖဝါးပြင်ပေါ်တွင် ကြာပွင့်ပုံပါရှိကြောင်း သိရသည်။
အောက်ခြေပလ္လင်တော်၏ပုံသဏ္ဌာန်မှာ အဝိုင်းပုံ ပြော့ပလ္လင်၏အထက်တွင် ကြာနှစ်ထပ်ကြာပလ္လင်တင်ထားပြီး ခြေဖဝါးအောက်တွင် ကြာပွင့်ခံထား သောပုံသဏ္ဌာန်မျိုးဖြစ်ကြောင်း၊ ဆင်းတုတော်တွင် ဧကသီသင်္ကန်းတော်ကို ဝတ်ရုံသဖွယ်ရုံထားပြီး ရင်ညွန့်တွင် သင်္ကန်းအလိပ်လေးများကိုပေါ်လွင်အောင် ဖောင်းကြွသဏ္ဌာန်ပြုလုပ်ထားကာ ညာဘက်လက်ကောက်ဝတ်တွင် သင်္ကန်းအနားလိုင်းကို ထင်ရှားစွာပြုလုပ်ထားပြီး အောက်ဖက်ရှိ သင်းပိုင်သင်္ကန်း၏အနားလိုင်းမှာ အင်္ဂလိပ်အက္ခရာ“U”(ယူ) ပုံသဏ္ဌာန်ကွေးဝိုက်လျက်ရှိကာ ခြေမျက်စေ့အထက်တွင် ညီညာသပ်ရပ်စွာ ပုံဖော်ထားကြောင်း သိရသည်။
ဆင်းတုတော်၏မျက်နှာတော်တွင် စပါးစေ့ပုံမျက်လုံးတော်နှင့် လခြမ်းပုံမျက်ခုံးတော်ကို လည်းကောင်း၊ ထူထဲသောနှုတ်ခမ်းတော်နှစ်လွှာနှင့် နှာခေါင်းတော်ကို ပုံဖော်ထားပြီး နားတော်မှာ နားတွဲတော်နှင့်နားပေါက်တော်ထင်ရှားစွာပါရှိကာ ပကတိလူတို့၏နားတော်ပုံစံနှင့် တူညီကြောင်း တွေ့ရကြောင်း သိရသည်။
ဦးခေါင်းထက်တွင် မဏိတော်နှင့် ရောင်လျှံတော်မပါရှိဘဲ ဆံတော်တန်းကို နဖူးပြင်မှ ဦးခေါင်းထိပ်ထိ ၅ တန်းကို လည်းကောင်း၊ ဦးခေါင်းနောက်တွင် ဆံတော် ၉ တန်းကိုလည်းကောင်း ထင်ရှားစွာတွေ့ရှိရပြီး ဆင်းတုတော်၏ ဦးခေါင်းအနောက်ဘက် ဆံစ၏ အောက်လည်ပင်းတော်တွင် အပေါက်ငယ်တစ်ခုပါရှိကြောင်းသိရသည်။
ရှေးဟောင်းသုတေသနနှင့်အမျိုးသားပြတိုက်ဦးစီးဌာနသည် ပင်လယ်(မိုင်းမော)မြို့ဟောင်းကို ၁၉၇၈-၁၉၇၉ ဘဏ္ဍာရေးနှစ်၊ ဒီဇင်ဘာလမှစတင်၍ တူးဖော်ရေးရာသီတိုင်း တူးဖော်သုတေသနပြုခဲ့ပြီး ၂၀၂၂-၂၀၂၃ ဘဏ္ဍာရေးနှစ်အထိ တူးဖော်မှု ကုန်းပေါင်း ၂၃ ကုန်းကို တူးဖော်သုတေသနပြုခဲ့ပြီးဖြစ်ကြောင်း သိရသည်။
ထိုသို့တူးဖော်မှုပြုလုပ်ရာ ၁၉၈၁-၁၉၈၂ ဘဏ္ဍာရေးနှစ်တွင် ဆောင်ရွက်ခဲ့သော တူးဖော်မှုကုန်းအမှတ်-၈ တူးဖော်မှုမှ ငွေဆင်းတုတော်နှစ်ဆူကိုလည်းကောင်း၊ ၂၀၀၅ ခုနှစ်တွင် မိုင်းမောကျေးရွာ အရှေ့တောင်ဘက် ကင်းတားဆည်လက်တံဖောက်လုပ်ရာမှ ဒေသခံတစ်ဦးက ရွှေဆင်းတု ၈ ဆူ၊ ရွှေငွေအရောဆင်းတု ၄ ဆူ၊ ငွေစေတီ ၂ ဆူနှင့် ငွေသတ္တုစပ် ဆင်းတု ၁ဆူတို့ကိုလည်းကောင်း တွေ့ရှိခဲ့ရပြီးဖြစ်ကာ ၎င်းဆင်းတုတော်များ အားလုံးသည် ဉာဏ်တော်အမြင့် သိသာစွာ ကွာခြားမှုမရှိသော်လည်း လက်အနေအထားမုဒြာဟန်များမှာ အနည်းငယ် ကွဲပြားခြားနားမှုရှိသည်ကိုတွေ့ရကြောင်း သိရသည်။
တူးဖော်သုတေသနပြုရာမှ တွေ့ရှိရသော အထောက်အထားများအရ မိုင်းမော(ပင်လယ်) မြို့ဟောင်း၏ ဗုဒ္ဓဘာသာဗိသုကာနှင့်အနုပညာသမိုင်းရုပ်သွင်ပြင်သည် ပိုမိုပီပြင်မှုရှိလာပြီး ရှေးခေတ် သမိုင်းစဉ်နှင့် ရာဇဝင်ကျမ်းများ၊ ဖော်ပြချက်များ ပိုမိုခိုင်မာမှန်ကန်မှုရှိစေရေးအတွက် ရှေးဟောင်းသုတေသနအထောက်အထားများသည် အလွန်အရေးပါသောကြောင့် မိုင်းမော(ပင်လယ်) မြို့ဟောင်းတူးဖော်သုတေသနပြုမှုများမှ တွေ့ရှိအထောက်အထားများသည် မြန်မာ့သမိုင်းစဉ်အတွက် အထောက်အပံ့ကောင်းများပင်ဖြစ်ကြောင်း ရှေးဟောင်းသုတေသနနှင့်အမျိုးသားပြတိုက်ဦးစီးဌာနက အသိပေးထားသည်။
ရှေးဟောင်းသုတေသနနှင့်အမျိုးသားပြတိုက်ဦးစီးဌာနသည် မြန်မာနိုင်ငံအတွင်းရှိ သမိုင်းဝင်ရှေးဟောင်းဒေသများ၊ အဆောက်အအုံများ၊ ရှေးဟောင်းပစ္စည်းများ ရှာဖွေဖော်ထုတ်ကာကွယ်စောင့်ရှောက်ခြင်း၊ တူးဖော်သုတေသနပြုခြင်းလုပ်ငန်းများကို အရှိန်အဟုန်မြှင့်ဆောင်ရွက်လျက်ရှိကြောင်း သိရသည်။
