လာမည့်ရက်သတ္တပတ် တရုတ်နှစ်သစ်ကူး အားလပ်ရက်အတွင်း၌ တရုတ်ခရီးသွားများ ပိုမိုများပြားလာမည်ဟု မျှော်လင့်ရပြီး ရုရှားနှင့် သြစတြေးလျမှသည် ထိုင်းနှင့် တောင်ကိုရီးယားအထိ ၎င်းတို့ ထိပ်တန်းသွားရောက်ရာနေရာများပါဝင်ကြောင်း ခရီးသွားအေဂျင်စီများက ပြောကြားခဲ့ကြသည်။ ဂျပန်သို့ ခရီးသွားခြင်းမှာမူ အတန်ငယ်ကျဆင်းသွားခဲ့ကြောင်း သူတို့က ပြောကြားခဲ့ကြသည်။
တရုတ်နှစ်သစ်ကူး သို့မဟုတ် နွေဦးပွဲတော်သည် တရုတ်နိုင်ငံ၏ အရှည်ဆုံး ရုံးပိတ်ရက်များထဲမှတစ်ခုဖြစ်ပြီး တရုတ်ရာသီခွင်တွင် မြင်းနှစ်ကိုကြိုဆိုသော ၂၀၂၆ ခုနှစ်တွင် ဖေဖော်ဝါရီလ ၉ ရက် နေ့မှစတင်ကာ ၉ ရက်ကြာမြင့်မည်ဖြစ်ပြီး ပုံမှန်ထက် တစ်ရက်ပိုသည်။
ထိုအချိန်အတွင်း သန်းပေါင်းများစွာသော လူများသည် မိသားစုပြန်လည်စုံဆည်းကြရန် အိမ်ပြန်လေ့ရှိပြီး နိုင်ငံတစ်ဝန်းနှင့် ပြည်ပရှိ မိသားစုများဝင်များ အတူတကွ ဆင်နွှဲကြသောကြောင့် ဈေးဆိုင်များ၊ ရုပ်ရှင်ရုံများနှင့် စားသောက်ဆိုင်များတွင် သုံးစွဲမှုမြင့်တက်သည်။
ရက် ၄၀ ကြာခရီးသွားကာလအတွင်း ခရီးသွားခရီးစဉ်သည် ၂၀၂၅ ခုနှစ်တွင် ၉ ဒဿမ ၀၂ ဘီလျံရှိခဲ့ရာမှ ၉ ဒဿမ ၅ ဘီလျံအထိ စံချိန်တင်မြင့်တက်မည်ဟု တရုတ်က မျှော်မှန်းသည်။ ၂၀၂၆ ၏ ရက်ပိုရှည်သောပွဲတော်သည် အားလပ်ရက်ခရီးသွားများကို ပြည်တွင်းလည်ပတ်ခြင်း သို့မဟုတ် ပြည်ပအထိ သွားလာလည်ပတ်ခြင်းများ ပိုမိုပြုလုပ်လာရန် လှုံဆော်ပေးလိမ့်မည်ဟု အရာရှိများက မျှော်လင့်ထားသည်။
“တရုတ်နိုင်ငံရဲ့ နေရာအများစုမှာ အေးနေတဲ့အချိန် ထိုင်းနိုင်ငံမှာတော့ သူ့ရဲ့ရာသီဥတုအနေအထားကြောင့် ထိပ်တန်းပြည်ပခရီးစဉ်နေရာအဖြစ် ပြန်ရောက်ရှိလာပါပြီ” ဟု ရှန်ဟိုင်းအခြေစိုက် ခရီးသွားလုပ်ငန်း စပရင်းတိုးရ် ဒုတိယအထွေထွေမန်နေဂျာ Zhou Weihong က ပြောကြားခဲ့သည်။
စပရင်းတိုးရ်သည် စရိတ်နည်းလေကြောင်းလိုင်း စပရင်းအဲရ်လိုင်းစ်၏ ခရီးသွားလုပ်ငန်းခွဲတစ်ခုဖြစ်သည်။
၂၀၂၆ ခုနှစ်တွင် ပြည်တွင်းအပန်းဖြေခရီးစဉ်၏ ဝယ်လိုအားသည် နွေးထွေးသောနေရာများနှင့် နှင်းဖုံးဒေသများအကြား ကွဲပြားပြီး အပူပိုင်းဒေသဟိုင်နန်ကျွန်းနှင့် အရှေ့မြောက်ပိုင်း ချန်းဘေးတောင် ခရီးစဉ်များသည် ရေပန်းစားကြောင်း စပရင်းတိုးရ်က ဆက်လက်ပြောကြားခဲ့သည်။
၎င်း၏ ပလက်ဖောင်းတွင် ရုရှားသို့ ဘွတ်ကင်များသည် ၂၀၂၅ ခုနှစ်ထက် နှစ်ဆကျော်မြင့်တက်လာခဲ့ပြီး မြောက်ဥရောပသို့ ခရီးစဉ်များလည်း မြင့်တက်လာခဲ့သည်။
“ဒီနှစ်ကုန်အထိ ရုရှားကိုသွားမယ့် တရုတ်ခရီးသွားတွေ တိုးလာဖွယ်ရှိပါတယ်” ဟု Dragon Trail Research ၏ ဈေးကွက်ရှာဖွေရေးနှင့် ဆက်သွယ်ရေး ဒါရို-က်တာ မစ္စ စီယင်နာ ပါရူလစ်ကွတ်က ပြောကြားခဲ့သည်။
Ref: သယ်စထရိတ်တိုင်းမ်စ်