နျူစက်ရုံအားသိမ်းယူရန် ယူကရိန်း၏ ကြိုးပမ်းမှုကိုပျက်ပြယ်စေခဲ့ဟု ရုရှားဆို
ယူကရိန်းတပ်ဖွဲ့ဝင်များသည် ဇာပိုရီရှိအာနျူဓာတ်အားပေးစက်ရုံအား စက်တင်ဘာ ၂ ရက် သောကြာနေ့ညကတိုက်ခိုက်သိမ်းပိုက်ရန်ကြိုးစားခဲ့ကြောင်း ရုရှားကာကွယ်ရေးဝန်ကြီးဌာနက ၎င်း၏နေ့စဉ်သတင်းစာ ရှင်းလင်းပွဲ၌ စနေနေ့ကပြောကြားခဲ့သည်။
ယူကရိန်းရေတပ်မှ တပ်ဖွဲ့ဝင် ၂၅၀ ကျော်ရှိသောတပ်ဖွဲ့သည် သောကြာနေ့ ဒေသစံတော်ချိန် ည ၁၁ နာရီဝန်းကျင်တွင် ယူကရိန်းတောင်ပိုင်း ဇာပိုရီရှီအာစက်ရုံအနီးရှိ ရေကန်တစ်ခု၏ကမ်းစပ်နားတွင် ဆင်းရန် ကြိုးပမ်းခဲ့ကြောင်း ဝန်ကြီးဌာနကပြောကြားခဲ့သည်။
ဇာပိုရီရှီအာနျူကလီးယားဓာတ်အားပေးစက်ရုံတွင် အပြည်ပြည်ဆိုင်ရာ အဏုမြူစွမ်းအင် အေဂျင်စီ (အိုင်အေအီးအေ) မှ ကိုယ်စားလှယ်များ ရှိနေသော်လည်း ကိဗ်အစိုးရက အဆိုပါ စက်ရုံအား ထပ်မံသိမ်းယူရန်ကြိုးပမ်းခဲ့ကြောင်း ကာကွယ်ရေးဝန်ကြီးဌာနကပြောကြားခဲ့သည်။
ရုရှားတပ်ဖွဲ့များသည် စစ်ရဟတ်ယာဉ်များနှင့် တိုက်လေယာဉ်များဖြင့် ယူကရိန်း၏ တိုက်ခိုက်ရန်ကြိုးပမ်းမှုကို တားဆီးနိုင်ခဲ့ကြောင်းပြောကြားခဲ့သည်။အဆိုပါတိုက်ခိုက်မှုကြောင့် ယူကရိန်းရေယာဉ် အစီး ၂၀ ပျက်စီးသွားကာ တပ်ဖွဲ့ဝင်များလူစုကွဲသွားစေပြီးယူကရိန်း၏ တိုက်ခိုက်ရန်ကြိုးပမ်းမှုကိုဟန့်တားခဲ့သည်ဟုဆိုသည်။
သို့သော်ရိုက်တာသတင်းဌာနအနေဖြင့် အဆိုပါသတင်းအားသီးခြားအတည်ပြုနိုင်ခြင်းမရှိသေးပေ။မကြာသေးမီကာလများအတွင်း မော်စကိုနှင့်ကိဗ်တို့သည် ဥရောပ၏အကြီးဆုံး နျူဓာတ်အားပေးစက်ရုံအား တိုက်ခိုက်မှုနှင့်ပတ်သက်၍ အပြန်အလှန်စွပ်စွဲလျက်ရှိကြသည်။
အဆိုပါစက်ရုံအား မတ်လကရုရှားတပ်ဖွဲ့များက သိမ်းပိုက်နိုင်ခဲ့သော်လည်း ယူကရိန်းဓာတ်အားလိုင်းနှင့် ချိတ်ဆက်ထားဆဲဖြစ်ပြီး ယူကရိန်းဝန်ထမ်းများနှင့်သာ လည်ပတ်နေဆဲဖြစ်သည်ဟုဆိုသည်။
ဥရောပတိုက်တွင် ရှာနိုဘိုင်းလ်ပုံစံနျူကလီးယား ဘေးအန္တရာယ်ကို ဖြစ်ပေါ်စေနိုင်သည်ဟူသော စိုးရိမ်မှုများကြောင့် အိုင်အေအီးအေသည် ယခုသီတင်းပတ်အတွင်း နျူကလီးယားစက်ရုံသို့ မစ်ရှင်တစ်ခု စေလွှတ်ခဲ့သည်။
ယူကရိန်းနှင့်ရုရှားနှစ်ဘက်စလုံးက ၎င်းတို့ကြားအခြေနေမှာတင်းမာလျက်ရှိပြီး နျူကပ်ဆိုးအန္တရာယ်ဖြစ်နိုင်ချေလည်းမြင့်မားသည်ဟုဆိုသည်။ရုရှားသည် အဆိုပါစက်ရုံအား လက်နက်ကြီးဖြင့်ပစ်ခတ်ခံရခြင်းရန်မှကာကွယ်နိုင်သည့် အခြေစိုက်စခန်းအဖြစ်အသုံးပြုနေသည်ဟု ယူကရိန်းနှင့်အနောက်နိုင်ငံများကဆိုကြသည်။
ရုရှားနိုင်ငံမှကာကွယ်ရေးဝန်ကြီး Sergei Shoigu ကမူ ရုရှားအနေဖြင့် ဓာတ်အားပေးစက်ရုံနှင့်အနီးတွင် လက်နက်ကြီးများ တပ်ဆင်ထားခြင်းမရှိကြောင်းဆိုကာ ယူကရိန်းသည်သာ အဆိုပါစက်ရုံအား ၎င်း၏ တိုက်ခိုက်မှုမှတစ်ဆင့် နျူအကြမ်းဖက်မှု ကျူးလွန်ခြင်းဖြစ်သည်ဟု စွပ်စွဲခဲ့သည်။
ရုရှားသိမ်းပိုက်ထားသော ဇာပိုရီရှီအာတွင် ရုရှား က ခန့်ထား သောအစိုးရ၏ ကိုယ်စားလှယ်တစ်ဦးကမူ စက်ရုံ၏အခြေအနေသည် စနေနေ့နံနက်တွင် ငြိမ်သက်သွားခဲ့ပြီဖြစ်ကြောင်း ပြောကြားခဲ့သည်။
Source -Reuters/ic