နေပြည်တော်အခြေစိုက် “ထိုက်သူပန်”တိုင်းရင်းဆေးဝါးထုတ်လုပ်ရေးမှ နံနက်ခင်းအာဟာရဒါနကျွေးမွေးခြင်းနှင့် ညနေခင်းအာဟာရဒါနကျွေးမွေးခြင်းတို့ကို ၂၀၂၀ ပြည့်နှစ်မှစတင်၍ နေ့စဥ် လှူဒါန်းကျွေးမွေးခဲ့ရာ ညနေခင်းအာဟာရဒါနကျွေးမွေးမှုအနေဖြင့် ရက်ပေါင်း(၁၈၃၅)ရက်သို့ရောက်ရှိခဲ့ပြီဖြစ်ရာ (၅)နှစ်ပြည့်ပြီဖြစ်ကြောင်း သိရသည်။
ထို့ကြောင့် အာဟာရဒါနကျွေးမွေးလှူဒါန်းမှုရေရှည်တည်တံ့စွာကျွေးမွေးနိုင်စေရေးအတွက် “ထိုက်သူပန်”တန်ဖိုးနည်းအဝေးပြေးယာဥ်လိုင်းတစ်ခုကို မကြာမှီပြေးဆွဲသွားမည်ဖြစ်ကြောင်း “ထိုက်သူပန်”တိုင်းရင်းဆေးဝါးထုတ်လုပ်ရေး၏ ပဲ့ကိုင်ရှင်ဦးစိုးလှမြင့်က ပြောကြားခဲ့သည်။
” စလှူတဲ့အချိန်က မနက်စာကို(၅)သောင်းနဲ့ ညနေစာကို(၂)သိန်းလောက်ကျတယ်။ အားလုံး(၂)သိန်းခွဲဆိုရင် အေးအေးဆေးဆေးစားလို့ရတယ်။ အခုတစ်ရက်ကို(၅)သိန်းနဲ့ဆိုရင်တောင်မှမလွယ်ဘူး။ ကျွန်တော်က အလှူရှင်တွေကိုမမျှော်လင့်ဘူး။ ဒီလိုနေ့စဥ်ရက်ဆက် အလှူကြီးလှူဖို့ဆိုရင် ကျွန်တော်တို့မှာ လှူမယ့်သုံးမယ့်ငွေလိုတယ်။ အခုက “ထိုက်သူပန်”တိုင်းရင်းဆေးဝါးထုတ်လုပ်ရေးကရတဲ့ပိုက်ဆံနဲ့လှူတယ်။ ကုန်စျေးနှုန်းတွေကအချိန်နဲ့အမျှတက်နေတာ အခု (၂)သိန်းခွဲကနေ (၅)သိန်းအထိတက်လာပြီ”ဟု ဦးစိုးလှမြင့်ကပြောသည်။
ထို့ကြောင့် အလှူအတွက်အသုံးစရိတ်ရရှိစေရန်၊ မိဘပြည်သူများအကျိုးရှိစေရန်၊ မိဘပြည်သူများအနေဖြင့် ကုန်ကျစရိတ်သက်သာစွာဖြင့် ခရီးသွားလာနိုင်စေရန်ရည်ရွယ်၍ “ထိုက်သူပန်”တန်ဖိုးနည်းအ ဝေးပြေးယာဥ်လိုင်းအား မကြမှီပြေးဆွဲသွားရန် ဆောင်ရွက်လျက်ရှိသည်ဟု ပြောသည်။
“ကျွန်တော့်ရဲ့လုပ်ဆောင်မှုတိုင်းက မိဘပြည်သူတွေကိုဗဟိုပြုတာဖြစ်တဲ့အတွက် ဒီအလှူကြီးရေရှည်တည်တံ့နိုင်ဖို့ တန်ဖိုးနည်းအဝေးပြေးယာဥ်လိုင်းတစ်လိုင်းကို ပြေးဆွဲပေးဖို့လုပ်ဆောင်ခဲ့တာပါ။ ဒီကားတွေကိုစီးမယ်။ ဒီကားတွေနဲ့ပတ်သက်ပြီး သယ်ယူပို့ဆောင်ရေးလုပ်နေမယ်ဆိုရင် မိဘပြည်သူတွေသုံးတဲ့ပိုက်ဆံတွေဟာ ဒီအလှူကြီးထဲကိုပဲရောက်သွားမှာပါ။ ဒီရတဲ့ပိုက်ဆံတွေအားလုံးကို နေ့စဥ်အာဟာရဒါနကျွေးမွေးဖို့အတွက် အသုံးပြုသွားမှာပါ။ ခရီးစဥ်ကတော့ ရန်ကုန်- မန္တလေး-လားရှိုးအထိ ဆွဲရင်ဆွဲမှာပါ။ ကျွန်တော် အစကတွေးထားတာက ဒီအလှူကြီးကို(၅)နှစ်ပြည့်ရင်ရပ်မယ်လို့တွေးထားတယ်။ ဒါပေမယ့် ငလျင်ကြီးလှုပ်ပြီးတဲ့အချိန်မှာ ကျွန်တော်ဆက်ကျွေးဖို့ဆုံးဖြတ်ခဲ့ပါတယ်”ဟု ဦးစိုးလှမြင့်ကပြောသည်။
အဆိုပါ “ထိုက်သူပန်”ညနေခင်းအာဟာရဒါနကျွေး မွေးမှု(၅)နှစ်ပြည့်အား သြဂုတ် ၂၃ ရက်ညနေပိုင်းက နိဗ္ဗာန်စျေးအဖြစ် မုန့်ဟင်းခါး၊ ခေါက်ဆွဲကြော်၊ ကြာဇံကြော်၊ နို့စိမ်းခေါက်ဆွဲ၊ အအေးနှင့် မန္တလေး မြင့်မြင့်ခင် လမုန့်တို့ကိုကျွေးမွေးလှူဒါန်းခဲ့ပြီး ဖျော် ဖြေရေးအစီအစဥ်အပြင် လာရောက်စားသုံးသူတစ်ဦးလျင် (၅,၀၀၀)ကျပ်စီ လှူဒါန်းပေးခဲ့သည်။