နောက် (၃၆) နာရီအတွင်း လေဖိအားနည်းရပ်ဝန်း အားကောင်းလာနိုင်ကြောင်း မိုးလေဝသ ဌာနခွဲ(ရန်ကုန်)က ယနေ့တွင် အသိပေးထားသည်။
ယနေ့ နံနက်ပိုင်း တိုင်းထွာရရှိချက်အရ ကပ္ပလီပင်လယ်ပြင်တွင် ဖြစ်ပေါ်နေသော လေဖိအားနည်းဆဲလ် (Low Pressure Cell)သည် အနောက်မြောက်ဘက်သို့ ရွေ့လျားခဲ့ရာ ကပ္ပလီပင်လယ်ပြင်မြောက်ပိုင်း (ကပ္ပလီကျွန်းအနီး) သို့ ရောက်ရှိခဲ့ပြီး၊ အနောက်မြောက်ဘက်သို့ ဆက်လက် ရွေ့လျားနိုင်ကာ ဘင်္ဂလားပင်လယ်အော် အရှေ့အလယ်ပိုင်း (ကိုကိုးကျွန်းအနီး)သို့ ရောက်ရှိနိုင်ကြောင်း အသိပေးထားသည်။
ထိုကြောင့် မြန်မာ့ပင်လယ်ပြင်အပေါ်အကျိုးသက်ရောက်နိုင်မှုအခြေအနေမှာ ယနေ့မှစ၍ မေ(၂၃)ရက်အတွင်း မြန်မာ့ကမ်းရိုးတန်းတလျှောက်နှင့် ကမ်းလွန်ပင်လယ်ပြင်တို့တွင် ရံဖန်ရံခါ မိုးသက်လေပြင်းများကျရောက်ပြီး လှိုင်းအသင့်အတင့်မှ လှိုင်းကြီးနိုင်ကာ မိုးသက်လေပြင်းကျစဉ် မြေပြင်ရေပြင်လေသည် တစ်နာရီလျှင် (၃၅) မိုင်မှ မိုင် (၄၀) အထိ တိုက်ခတ်နိုင်ပြီး လှိုင်းအမြင့်မှာ မြန်မာ့ကမ်းရိုးတန်းတလျှောက်နှင့် ကမ်းလွန်ပင်လယ်ပြင်တို့တွင် (၅) ပေမှ (၁၂) ပေခန့် ရှိနိုင်သည်ဟု အသိပေးချက်တွင် ဖော်ပြထားသည်။
အဆိုပါ လေဖိအားရပ်ဝန်းအရှိန်ကြောင့် နေပြည်တော်၊ စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ဧရာဝတီတိုင်း၊ ရန်ကုန်တိုင်း ၊ တနင်္သာရီတိုင်း၊ ကချင်ပြည်နယ်၊ ချင်းပြည်နယ်၊ ရခိုင် ပြည်နယ်၊ ရှမ်းပြည်နယ်၊ ကယား ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာစိပ်စိပ်မှ နေရာအနှံ့အပြား မိုးထစ်ချုန်း ရွာသွန်းနိုင်ကာ နေရာကွက် ၍ မိုးကြီးခြင်း၊ ဒေသအလိုက် မိုးကြီးခြင်း၊ လျှပ်စီးလက်ခြင်း၊ မိုးခြိမ်းခြင်း၊ မိုးသီးကြွေခြင်း၊ မိုးကြိုးပစ်ခြင်းနှင့် မိုးသက်လေပြင်းတိုက်ခတ်ခြင်းတို့ ဖြစ်ပေါ်နိုင်သည်ဟု အသိပေးချက်အရ သိရသည်။